ବଲାଙ୍ଗୀର ଅଫିସ, ୩ା୧୨: ବଲାଙ୍ଗୀର ଜିଲା କୃଷକ ମହାସଂଘ ପକ୍ଷରୁ ଧାନକିଣା ଅବ୍ୟବସ୍ଥା ନେଇ ଜିଲାପାଳ କାର୍ଯ୍ୟାଳୟ ସମ୍ମୁଖରେ ବୁଧବାର ଧାରଣା ଦିଆଯାଇଥିଲା ା ଚାଷୀନେତା ତଥା ମହାସଂଘ ସଭାପତି ଡା. ସୁଧୀର କୁମାର ପରିଚ୍ଛାଙ୍କ ନେତୃତ୍ୱରେ ଚାଷୀମାନେ ବିଭିନ୍ନ ଦାବି ନେଇ ଧାରଣା ଦେବା ସହ ନାରାବାଜି କରିଥିଲେ ା ଜିଲାରେ ଧାନକିଣା ଅବ୍ୟବସ୍ଥା ଲାଗି ରହିଛି। ଚାଷୀମାନଙ୍କୁ ଏପର୍ଯ୍ୟନ୍ତ ଟୋକନ ମିଳିନାହିଁ ା ଟୋକନ ବ୍ୟବସ୍ଥାର ସମ୍ପୂର୍ଣ୍ଣ ସୁଧାର ଅଣାଯିବା, ଏକର ପିଛା ୧୩ କୁଇଣ୍ଟାଲ ବଦଳରେ ୨୦ କୁଇଣ୍ଟାଲ ଧାନବିକ୍ରି ବ୍ୟବସ୍ଥା ଲାଗୁ, କଟ୍ନିଛଟ୍ନି ବନ୍ଦ କରିବା ଏବଂ ପ୍ୟାକ୍ସ ଗୁଡିକରୁ ଧାନ ପରିବହନ ପାଇଁ କ୍ରୟ କରୁଥିବା ମିଲର୍ସମାନଙ୍କୁ ପରିବହନ ଦାୟିତ୍ୱ ଦିଆଯିବା ଦାବି ନେଇ ଧାରଣା ଦିଆଯାଇଥିଲା। ସରକାର ଏଫ୍ଏକ୍ୟୁ ମାନର ଧାନ କଥା କହି ସର୍ବନିମ୍ନ ସହାୟକ ମୂଲ୍ୟ ନିର୍ଦ୍ଧାରଣ କରୁଥିଲେ ମଧ୍ୟ ମଣ୍ଡି ଗୁଡିକରେ ଚାଷୀଙ୍କ ଧାନକୁ ଏଫ୍ଏକ୍ୟୁ କରାଯିବାର କୌଣସି ବ୍ୟବସ୍ଥା ନାହିଁ ା ସରକାର ଜାଣି ଶୁଣି ଏଭଳି ଅବ୍ୟବସ୍ଥା କରି ଚାଷୀଙ୍କ ଧାନକୁ କଟନି ଛଟନି କରି ମାଲେମାଲ ହେଉଛନ୍ତି ଓ ଚାଷୀକୁ ଶୋଷଣ କରୁଛନ୍ତି ବୋଲି ଅଭିଯୋଗ କରିଥିଲେ। ୧୦ ଏକରରୁ ଉର୍ଦ୍ଧ୍ୱ ଥିବା ଚାଷୀଙ୍କୁ ଏପର୍ଯ୍ୟନ୍ତ ଟୋକନ ଦିଆଯାଇନାହିଁ ା ଚାଷୀମାନେ ଧାନ ଅମଳ କରି ରଖିଥିଲେ ମଧ୍ୟ ଟୋକନ୍ ନଥିବାରୁ ମଣ୍ଡିରେ ବିକ୍ରୟ କରିପାରୁନାହାନ୍ତି। ଏହି ଧାରଣାରେ ମହାସଂଘ ସମ୍ପାଦକ ଯତୀ ପଧାନ, କୃଷ୍ଣ ବନ୍ଛୋର, ଯଦୁପତି ନାଥ, ମହେଶ୍ୱର ପଟେଲ, ବିନୋଦ ରାଉତ, ଆଶିଷ ଧରୁଆ, ପ୍ରବଣ ନାଥ ଓ ଅନ୍ୟମାନେ ଧାରଣାରେ ବସିଥିଲେ ା ୪ ଦଫା ଦାବିକୁ ଜିଲାପାଳ କାର୍ଯ୍ୟାଳୟ ଜରିଆରେ ମୁଖ୍ୟମନ୍ତ୍ରୀଙ୍କୁ ପ୍ରଦାନ କରାଯାଇଥିବା ଡା ପରିଚ୍ଛା ସୂଚନା ଦେଇଛନ୍ତି ା
