ସୋନପୁର,୩l୯(ମୃତ୍ୟୁଞ୍ଜୟ ଶତପଥୀ): ସୁବର୍ଣ୍ଣପୁର ସହର ସୋନପୁର ଥାନା ନିକଟସ୍ଥ ପଞ୍ଚରଥ ମନ୍ଦିରରୁ ଶନିବାର ରାତିରେ ମୂର୍ତ୍ତି ଚୋରି ହୋଇଥିଲା। ମନ୍ଦିର ପୂଜକ ରବିବାର ଏହି ସମ୍ପର୍କରେ ସୋନପୁର ଥାନାରେ ଲିଖିତ ଅଭିଯୋଗ କରିଥିଲେ। ଏନେଇ ପୋଲିସ ଏକ ମାମଲା(ନଂ.୨୦୦/୨୩) ରୁଜୁ କରି ତଦନ୍ତ ଆରମ୍ଭ କରିଥିଲା।
ତେବେ କିରନ ଚରଣ ଦାଶ ନାମକ ଜଣେ ରଙ୍ଗମିସ୍ତ୍ରୀଙ୍କ ପାଇଁ ଚୋରି ହୋଇଥିବା ମୂର୍ତ୍ତି ଉଦ୍ଧାର ହୋଇପାରିଛିି। ସୋନପୁର-ବଲାଙ୍ଗୀର ରାସ୍ତାର ଝିଙ୍କି ଟିକ୍ରା ନିକଟରେ ରଙ୍ଗ ମିସ୍ତ୍ରୀ କିରନ ରଙ୍ଗ କାମ କରୁଥିଲେ। ଏହି ସମୟରେ ଜଣେ ଅଚିହ୍ନା ଯୁବକ ତାଙ୍କ ନିକଟକୁ ଆସି କିଛି ସାମଗ୍ରୀ ବିକ୍ରି କରିବାକୁ ଚାହିଁଥିଲା। ରଙ୍ଗ ମିସ୍ତ୍ରୀ କିରନ କି ସାମଗ୍ରୀ ବୋଲି ପଚାରିବାରୁ ଯୁବକ ଜଣକ ଗୋଟିଏ ବ୍ୟାଗରୁ କିଛି ଧାତୁ ମୂର୍ତ୍ତି ଦେଖାଇଥିଲା। ଏହା ଚୋରୀ ସାମଗ୍ରୀ ବୋଲି ସନ୍ଦେହ କରିବା ସହ ସମ୍ପୃକ୍ତ ଯୁବକକୁ କିରନ ଧରି ପକାଇଥିଲେ। ହେଲେ ଯୁବକ ଜଣକ ଚତୁରତାର ସହ ବ୍ୟାଗ ଛାଡି ଘଟଣାସ୍ଥଳରୁ ଚମ୍ପଟ ମାରିଥିଲେ। ବ୍ୟାଗରୁ ଶିବ, ପାର୍ବତୀ, ବିଷ୍ଣୁ ଓ ଗଣେଶଙ୍କ ମୂର୍ତ୍ତି ସହ ଏକ କଳସ ଏବଂ ଘଣ୍ଟି ମିଳିଥିଲା। ଏହି ମୂର୍ତ୍ତି ପଞ୍ଚରଥ ମନ୍ଦିରରୁ ରାତିରେ ଚୋରି ହୋଇଥିବା ଜାଣିବା ପରେ କିରନ ସେଗୁଡିକୁ ସୋନପୁର ଥାନା ଜିମା ଦେଇଛନ୍ତି। ଉଦ୍ଧାର ମୂର୍ତ୍ତି ପଞ୍ଚରଥ ମନ୍ଦିରରୁ ଚୋରି ହୋଇଥିବା ସୋନପୁର ଆଇଆଇସି ପଦ୍ମାସିନି ମେହେର କହିଛନ୍ତି l
