ଭୁବନେଶ୍ୱର,୫ା୭(ବ୍ୟୁରୋ): ରାଜ୍ୟରେ ନକଲି କରୋନା ଔଷଧ ଜବତ ଘଟଣାରେ କ୍ରାଇମବ୍ରାଞ୍ଚର ଏସ୍ଟିଏଫ୍ ଟିମ୍ ର଼୍ୟାକେଟ୍ର ମୁଖ୍ୟ କାର୍ପଟଦାର ମୁମ୍ବାଇର ସୁଦୀପ ବାର୍ନାଜୀଙ୍କୁ ୧୦ ଦିନିଆ ରିମାଣ୍ଡରେ ଆଣିବ। ଏନେଇ ମୁମ୍ବାଇ କୋର୍ଟର ଅନୁମତି ପାଇଁ ଏସ୍ଟିଏଫ୍ ପକ୍ଷରୁ କଟକ ଟ୍ରାଏଲ୍ କୋର୍ଟରେ ଆବେଦନ କରାଯାଇଛି। ତେବେ ଏହା ଏକ ଲମ୍ବା ପ୍ରକ୍ରିୟା ବୋଲି ଏସ୍ଟିଏଫ୍ର ଜଣେ ଅଧିକାରୀ କହିଛନ୍ତି। ତାଙ୍କ ସୂଚନାନୁସାରେ, ସୁଦୀପ ଗିରଫ ହୋଇ ଏବେ ମହାରାଷ୍ଟ୍ର ଜୁଡିସିଆଲ ମାଜିଷ୍ଟ୍ରେଟ୍ ଅଧୀନରେ ଅଛନ୍ତି। ଆମ ପକ୍ଷରୁ କଟକ ଟ୍ରାଏଲ୍ କୋର୍ଟଙ୍କୁ ରିମାଣ୍ଡ ନିମନ୍ତେ ଲେଖାଯାଇଛି। କଟକ ମାମଲାରେ ସୁଦୀପଙ୍କ ସମ୍ପୃକ୍ତି ଥିବାରୁ ତାଙ୍କୁ ଏଠାକୁ ଅଣାଯାଇ ପଚରାଉଚରା କରିବାକୁ କଟକ ଟ୍ରାଏଲ୍ କୋର୍ଟ ମହାରାଷ୍ଟ୍ର କୋର୍ଟଙ୍କୁ ଅବଗତ କରିବେ। ସେଠାରୁ ଅନୁମତି ମିଳିଲେ ଏସ୍ଟିଏଫ୍ ଟିମ୍ ମୁମ୍ବାଇ ଯାଇ ସୁଦୀପଙ୍କୁ ଆଣି କଟକ ଟ୍ରାଏଲ୍ କୋର୍ଟରେ ଦାଖଲ କରିବ। ଏହାପରେ କଟକ କନିକା ଅଞ୍ଚଳରୁ ଜବତ ହୋଇଥିବା ନକଲି ଔଷଧ ଘଟଣାର ମୁଖ୍ୟ ଅଭିଯୁକ୍ତ ଶିବ ଜେନାଙ୍କ ସହ ସୁଦୀପଙ୍କର ମୁହଁାମୁହିଁ ଜେରା କରାଯିବ। ମୁଖ୍ୟତଃ ଓଡ଼ିଶାର କେଉଁଠିକୁ ଏହି ନକଲି ଔଷଧ ସପ୍ଲାଏ କରାଯାଇଛି, ବଜାରରେ ଏହି ନକଲି ଔଷଧ ରହିଯାଇଛି କି ନାହିଁ ଓ ଏଥିସହିତ ଆଉ କେଉଁମାନଙ୍କର ସମ୍ପୃକ୍ତି ରହିଛି ଆଦି ବିଭିନ୍ନ ଦିଗକୁ ନେଇ ଉଭୟଙ୍କୁ ଜେରା କରାଯିବ ବୋଲି ସୂଚନା ମିଳିଛି।
ଓଡ଼ିଶାରେ ନକଲି କରୋନା ଔଷଧ କାରବାରର ମୁଖ୍ୟ ଅଭିଯୁକ୍ତ କୁହାଯାଉଥିବା ଶିବଙ୍କୁ ଜୁନ୍ ୨୪ରେ ଏସ୍ଟିଏଫ୍ ଗିରଫ କରିଥିଲା। କଟକ କନିକା ଛକସ୍ଥିତ ନିଜ ମେଡ଼ିଲଏଡ୍ ମେଡ଼ିସ୍ମେଣ୍ଟ ପ୍ରାଇଭେଟ୍ ଲିମିଟେଡ୍ କମ୍ପାନୀ ମାଧ୍ୟମରେ ଶିବ କରୋନା ଚିକିତ୍ସା ପାଇଁ ବ୍ୟବହୃତ ନକଲି ଫାଭିମ୍ୟାକ୍ସ-୨୦୦ ଏବଂ ଫାଭିମ୍ୟାକ୍ସ-୪୦୦ ଔଷଧ ମୁମ୍ବାଇର ସୁଦୀପଙ୍କ ପାଖରୁ ଆଣିଥିଲେ। ଜୁନ୍ ୧୦ରେ ଘଟଣା ସମ୍ପର୍କରେ ମହାରାଷ୍ଟ୍ର ଡ୍ରଗ୍ସ କଣ୍ଟ୍ରୋଲର ଓଡ଼ିଶା ଡ୍ରଗ୍ସ କଣ୍ଟ୍ରୋଲରଙ୍କୁ ସୂଚନା ଦେବା ପରେ ସେଠାରେ ଚଢାଉ କରାଯାଇ ବିପୁଳ ନକଲି ଔଷଧ ଜବତ ହୋଇଥିଲା।
