ଇସଲାମାବାଦ, ୧୫।୯ : ପ୍ରବଳ ବନ୍ୟା ଯୋଗୁଁ ପାକିସ୍ତାନର ଅବସ୍ଥା ଅତ୍ୟନ୍ତ ଖରାପ ହେବାରେ ଲାଗିଛି। ଲକ୍ଷ ଲକ୍ଷ ଲୋକଙ୍କ ଘର ବନ୍ୟା ଜଳରେ ବୁଡ଼ି ରହିଛି। ପ୍ରଶାସନ ଏଭଳି ଲୋକଙ୍କୁ ବନ୍ୟା ପାଣି ଘେରରୁ ଉଦ୍ଧାର କରି ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଛି। ଏହା ସତ୍ତ୍ୱେ ଅନେକ ଲୋକ ଅଛନ୍ତି ଯେଉଁମାନେ ବନ୍ୟା ଜଳରେ ସେମାନଙ୍କର ଘର ବୁଡ଼ିଯିବା ପରେ ବି ନିଜ ଘର ଛାଡ଼ିବାକୁ ମନା କରିଦେଇଛନ୍ତି । ଏହି ଲୋକମାନେ ଯୁକ୍ତି କରିଛନ୍ତି ଯେ ଅସ୍ଥାୟୀ ଆଶ୍ରୟସ୍ଥଳକୁ ଯିବୁନି। ଅସ୍ଥାୟୀ ଆଶ୍ରୟସ୍ଥଳରେ ବାହାର ପୁରୁଷମାନେ ରହିଛନ୍ତି। ଏହା ଦ୍ୱାରା ଆମ ଘରର ମହିଳାମାନଙ୍କର ସମ୍ମାନ ହାନୀ ହେବ। ପାକିସ୍ତାନୀ ଅଧିକାରୀ କହିଛନ୍ତି ଯେ ଅଧିକାଂଶ ଅଞ୍ଚଳରୁ ବନ୍ୟା ଜଳ କମିଯିବା ପାଇଁ ତିନିରୁ ଛଅ ମାସ ସମୟ ଲାଗିପାରେ। ଏଭଳି ପରିସ୍ଥିତିରେ ଲୋକଙ୍କୁ ଦୀର୍ଘ ସମୟ ପର୍ଯ୍ୟନ୍ତ ଅସୁବିଧାର ସମ୍ମୁଖୀନ ହେବାକୁ ପଡିବ ।
ପାକିସ୍ତାନର ଏକ ଛୋଟ ଗାଁ ଅହମ୍ମଦ ଦୀନର ୪୦୦ ବାସିନ୍ଦା ବନ୍ୟା ଯୋଗୁଁ ଅନାହାର ଏବଂ ସ୍ବାସ୍ଥ୍ୟ ସମସ୍ୟାର ସମ୍ମୁଖୀନ ହେଉଛନ୍ତି। କିନ୍ତୁ ସେମାନେ ଘରୁ ବାହାରକୁ ଯିବାକୁ ମନା କରି ଦେଇଛନ୍ତି। ସେମାନେ କହିଛନ୍ତି ଯେ ରିଲିଫ କ୍ୟାମ୍ପକୁ ଯିବା ଅର୍ଥ ହେଉଛି ଗାଁର ମହିଳାମାନଙ୍କର ସମ୍ମାନହାନୀ।
ଗାଁର ବାସିନ୍ଦା କହିଛନ୍ତି ଯେ ଆମେ ବାଲୁଚ। ବାଲୁଚ ସେମାନଙ୍କ ମହିଳାମାନଙ୍କୁ ବାହାରକୁ ଯିବାକୁ ଦିଅନ୍ତି ନାହିଁ । ବାଲୁଚ ସେମାନଙ୍କ ପରିବାରକୁ ବାହାରକୁ ଯିବା ଅପେକ୍ଷା ଭୋକରେ ରହିବାକୁ ପସନ୍ଦ କରିବେ। ପାକିସ୍ତାନର ଅଧିକାଂଶ ଅଞ୍ଚଳରେ ମହିଳାମାନଙ୍କୁ ପୁରୁଷଙ୍କ ପରି ସମାନ ଅଧିକାର କିମ୍ବା ସମ୍ମାନ ଦିଆଯାଏ ନାହିଁ। ଏପରିକି ମହିଳାମାନଙ୍କୁ ଅନ୍ୟ ପୁରୁଷଙ୍କ ସହ କଥାବାର୍ତ୍ତା କରିବାକୁ ବାରଣ କରାଯାଇଥାଏ। ପରିବାର ପରିବର୍ତ୍ତେ ନିଜ ପସନ୍ଦର କାହାକୁ ବିବାହ କଲେ ଝିଅମାନଙ୍କୁ ହତ୍ୟା କରାଯାଏ।
