କଟକ ଅଫିସ,୧୫ା୯: ଏଚ୍ସିଜି ପଣ୍ଡା କ୍ୟାନ୍ସର ହସ୍ପିଟାଲର ଡାକ୍ତରୀ ଟିମ୍ ଅସ୍ଥି କର୍କଟରେ ଆକ୍ରାନ୍ତ ଜଣେ ୧୩ବର୍ଷର ନାବାଳକ ଗୋଡ଼ରୁ ସଫଳତାର ସହ ଏକ ଟ୍ୟୁମର ବାହାର କରି ତାକୁ ନୂଆ ଜୀବନ ଦେଇଛନ୍ତି। ନାବାଳକଙ୍କଠାରେ ପ୍ରଥମ ଲୋୟର ଲିମ୍ବ ସାଲ୍ଭେଜ ସର୍ଜରି କରାଯାଇ ଓଡ଼ିଶାରେ ପ୍ରଥମ ଥର ପାଇଁ ଏଭଳି ବିରଳ ସର୍ଜରି କରାଯାଇଥିବା ହସ୍ପିଟାଲ ପକ୍ଷରୁ ସୂଚନା ଦିଆଯାଇଛି। ଡାକ୍ତରମାନେ ଏହି ଅସ୍ତ୍ରୋପଚାର ଜରିଆରେ ପ୍ରଭାବିତ ଅସ୍ଥି ଅଂଶକୁ ବାହାର କରି ସେହି ସ୍ଥାନରେ ପ୍ରୋସ୍ଥେଟିକ୍ସ ଖଞ୍ଜି ଉକ୍ତ ବାଳକଙ୍କ ଅଙ୍ଗକୁ ସୁରକ୍ଷିତ ରଖିବାରେ ସଫଳ ହୋଇପାରିଛନ୍ତି। ଏହି ଅସ୍ତ୍ରୋପଚାର ସର୍ଜିକାଲ ଅଙ୍କୋଲୋଜିଷ୍ଟ ଡା. ଜ୍ୟୋତି ରଞ୍ଜନ ସ୍ବାଇଁ, ଅର୍ଥୋପେଡିକ ଅଙ୍କୋଲୋଜିଷ୍ଟ ଡା. କ୍ଷିତୀଶ ମହାନ୍ତି ଓ ସେମାନଙ୍କ ଚିକିତ୍ସା ଦଳ ଦ୍ୱାରା ସମ୍ପାଦିତ ହୋଇଛି। ବାଳକ ଜଣକ କର୍କଟ ରୋଗରେ ଆକ୍ରାନ୍ତ ହୋଇଥିବା ଚିହ୍ନଟ କରାଯିବା ପରେ ତାଙ୍କ ମାତାପିତା ଦୁଃଖରେ ଭାଙ୍ଗିପଡିଥିଲେ। ତେବେ ଏଠାରେ ଡାକ୍ତରୀଦଳଙ୍କ ଠାରୁ ଭରସା ପାଇ ପୁଅକୁ ଚିକିତ୍ସା ନିମନ୍ତେ ରାଜି ହୋଇଥିଲେ। ନାବାଳକ ଜଣକ ଏବେ ସୁସ୍ଥ ଥିବା ଜଣାଯାଇଛି।
