ନୂଆପଡା,୨୦ା୪ (ମକାରୁ ବେମାଲ): ନୂଆପଡ଼ା ସଦର ବ୍ଲକ ଛତିଶଗଡ଼ ସୀମାନ୍ତ ଚୁଳାଭାଟ ପଞ୍ଚାୟତ ଗଙ୍ଗାଦିଗଡ଼ ଗାଁ ଅଧିନ ୮ଟି ପଡାର ଅଧିବାସୀମାନେ ବିଭିନ୍ନ ଦାବି ନେଇ ଶନିବାର ଜିଲାପାଳ କାର୍ଯ୍ୟାଳୟ ମୁଖ୍ୟଗେଟ ସମ୍ମୁଖରେ ଘେରାଉ କରି ଧାରଣାରେ ବସିଥିଲେ। ଶ୍ରମିକ ନେତା ଭକ୍ତବନ୍ଧୁ ଧରୁଆଙ୍କ ନେତୃତ୍ୱରେ ଶତାଧିକ ମହିଳା ଓ ପୁରୁଷ ଏକତ୍ରିତ ହୋଇ ଦୀର୍ଘ ୨ ଘଣ୍ଟା ଧାରଣାରେ ବସିଲା ପରେ ଅତିରିକ୍ତ ଜିଲାପାଳ ସୁବାଷ ଚନ୍ଦ୍ର ରଏତ ଧାରଣା ସ୍ଥଳକୁ ପହଞ୍ଚତ୍ ସମସ୍ତ ଦାବି ଉପରେ ଆଲୋଚନା କରିଥିଲେ। ତଦନ୍ତ କରି ସମସ୍ତଙ୍କ ଦାବି ପୁରଣ କରାଯିବ ବୋଲି ପ୍ରତିଶ୍ରୁତି ଦେଲା ପରେ ଧାରଣା ପ୍ରତ୍ୟାହୁତ ହୋଇଥିଲା। ସେହି ସମୟରେ ଏକ ଦାବିପତ୍ର ପ୍ରଦାନ କରାଯାଇଥିଲା।
ସୂଚନା ଅନୁଯାୟୀ, ନୁଆପଡ଼ା ସଦର ବ୍ଲକ ପଶ୍ଚିମ ଦିଗକୁ ଛତିଶଗଡ଼ ସୀମାନ୍ତରେ ଚୁଳାଭାଟ ପଞ୍ଚାୟତ ରହିଛି। ଏହି ପଞ୍ଚାୟତ ଅଧୀନ ସୁନାବେଡ଼ା ଅଭୟାରଣ୍ୟ ଭିତରେ ୧୯୫୬ରେ ଗଙ୍ଗାଦିଗଡ଼ ଗାଁ ବସତି ସ୍ଥାପନ କରି ତା ଅଧିନରେ ୮ଟି ପଡା ଭାଲୁପାଣି, ବାଉଁଶଡୋଙ୍ଗରି, ଗୋନ୍ଦଳାବାହାରା, ମହୁଳପଡ଼ା, ଖଲିଆପଡ଼ା, ସନ୍ତୋଷପଡ଼ା, ବାଞ୍ଜିପାଣି ପଡ଼ା ରହିଛି। ଏହି ଆଠଟି ପଡ଼ାରେ ବସବାସ କରୁଥିବା ଅଧିବାସୀମାନେ ଦୀର୍ଘ ବର୍ଷ ହେବ ରାଜସ୍ବ ଗ୍ରାମର ମାନ୍ୟତା ପାଇଁ ଦାବି କରି ଆସୁଛନ୍ତି। ହେଲେ କୌଣସି ସୁଫଳ ମିଳିପାରି ନାହିଁ। ସରକାରଙ୍କ ପତ୍ରସଂଖ୍ୟା-୨୧୮୩/୨୦୨୦ ସେପ୍ଟେମ୍ବର ୨୧ ରେ ରାଜସ୍ବ ଗ୍ରାମର ମାନ୍ୟତା ପାଇଁ ବିଜ୍ଞପ୍ତି ଜାରି ହୋଇଥିଲା। ଏହି ଗାଁର ଅଧିବାସୀମାନେ ଆବଶ୍ୟକ କାଗଜାତ ନେଇ ନୂଆପଡ଼ା ତହସିଲ କାର୍ଯ୍ୟାଳୟରେ ଜମା ଦେଇଥିଲେ ମଧ୍ୟ କୌଣସି ପଦକ୍ଷେପ ନିଆ ଗଲା ନାହିଁ। ଏହି ଗାଁ ଗୁଡ଼ିକର ଅଧିକାଂଶ ଚାଷି ଜଙ୍ଗଲ ଜମି ଅଧିକାର ଶିରୋନାମା ପଟ୍ଟା ପାଇଛନ୍ତି। ସେହି ପଟ୍ଟାରେ କେବଳ ଜମିର ପରିମାଣ କେତେ ତାହା ଉଲ୍ଲେଖ ରହିଛି। ଖାତା ନଂ,ପ୍ଲଟ ନଂ ନ ଥିବାରୁ କୌଣସି କାର୍ଯ୍ୟରେ ଆସୁ ନାହିଁ। ଉକ୍ତ ଅଞ୍ଚଳର ଲୋକେ ଜାତିଗତ ପ୍ରମାଣ ପତ୍ର, ବାସସ୍ଥାନ ପ୍ରମାଣ ପତ୍ର ମିଳୁ ନ ଥିବାରୁ ପିଲାମାନଙ୍କୁ ପାଠ ପଢାରେ ବାଧକ ସାଜିଛି। ସେହିପରି ପିଏମ କିଷାନ, ସିଏମ କିଷାନ, ଆବାସ ଗୃହ ଭଳି ସରକାରୀ ଯୋଜନାରୁ ବଞ୍ଚତ୍ତ ଅଛନ୍ତି। ଚାଷି ପଞ୍ଜିକରଣ ହେଉ ନ ଥିବାରୁ ମଣ୍ଡିରେ ଧାନ ବିକ୍ରୟ କରି ପାରୁ ନାହାନ୍ତି। କୋଚିଆଠାରେ ଶାଗ ମାଛ ଦରରେ ବିକ୍ରୟ କରୁଛନ୍ତି। ଏହି ଜମି ପଟ୍ଟାକୁ ସଂଶୋଧନ କରି ନୂତନ ପଟ୍ଟା ପ୍ରଦାନ କରାଯାଉ ବୋଲି ଦାବି କରିଛନ୍ତି। ଗଙ୍ଗାଦିଡ ଅଧିନ ସମସ୍ତ ପଡାକୁ ରାଜସ୍ବ ଗ୍ରାମର ମାନ୍ୟତା, ଜଙ୍ଗଲ ଜମି ଅଧିକାର ଶିରୋନାମା ପଟ୍ଟା ସଂଶୋଧନ,ଭୂ-ଜଳ ପୂର୍ନଉଦ୍ଧାର ଓ ଜଙ୍ଗଲ ନଷ୍ଟ କରୁଥିବା ଅଧିକାରୀ କିମ୍ବା କାଠ ମାଫିଆ ମାନଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କାରାଯାଉ ବୋଲି ଦାବି କରିଛନ୍ତି। ଏହି ଧାରଣା ସମୟରେ ଜଙ୍ଗଲ ଜମି ଅଧିକାର କମିଟି ସଭାପତି ଘାସିରାମ ମାଝି, ସମ୍ପାଦକ ମଦନ ମାଝି, ପଦ୍ମନ ମାଝି, ସୋଭାଚନ୍ଦ୍ର ମାଝି, ଲାଲସିଂ ରାଉତ, ବୈଶାଖୁ ମାଝି, ରାଏସିଂ ମାଝି, ରାମଲାଲ ମାଝି, ଅମୃତତ ଲାଲ କେଉଟ, ଜିତେନ୍ଦ୍ର ମାଝି, କୃଷ୍ନ ରାଉତ ପ୍ରମୁଖ ଓ ଗ୍ରାମବାସୀ ଉପସ୍ଥିତ ଥିଲେ।
