ଲୋଇସିଂହା,୧୮।୮(ସୁଶାନ୍ତ ବାରିକ):ବଲାଙ୍ଗୀର ଜିଲା ଲୋଇସିଂହା ଏନଏସି ଅନ୍ତର୍ଗତ ଲୋଇସିଂହାସ୍ଥିତ ହରେକୃଷ୍ଣ ମହତାବ ହାଇସ୍କୁଲ ପରିସରରେ ଓଡିଶାର ପ୍ରଥମ ମୁଖ୍ୟମନ୍ତ୍ରୀ ହରେକୃଷ୍ଣ ମହତାବଙ୍କ ପ୍ରତିମୂର୍ତ୍ତି ସ୍ଥାପନ କରାଯାଇଛି। ୮୦ ତମ ସ୍ବାଧୀନତା ଦିବସ ଅବସରରେ ଶନିବାର ଏହି ପ୍ରତିମୂର୍ତ୍ତି ଉନ୍ମୋଚନ ପାଇଁ କାର୍ଯ୍ୟକ୍ରମ ସ୍ଥିର ହୋଇଥିଲା। ଚଳିତବର୍ଷ ବଲାଙ୍ଗୀରଠାରେ ଅନୁଷ୍ଠିତ ଜିଲାସ୍ତରୀୟ ସ୍ବାଧୀନତା ଦିବସ ଉତ୍ସବରେ ମୁଖ୍ୟଅତିଥି ଭାବେ ଯୋଗଦାନ କରିଥିବା ଉଚ୍ଚ ଶିକ୍ଷାମନ୍ତ୍ରୀ ସୂର୍ଯ୍ୟବଂଶୀ ସୂରଜ ପ୍ରତିମୂର୍ତ୍ତି ଉନ୍ମୋଚନ କରିଥାନ୍ତେ। କିନ୍ତୁ କୌଣସି କାରଣରୁ ଶେଷ ମୁହୂର୍ତ୍ତରେ ତାହା ବାତିଲ କରି ଦିଆଯାଇଥିଲା। ଷଡଯନ୍ତ୍ର କରି ଉକ୍ତ କାର୍ଯ୍ୟକ୍ରମକୁ ବାତିଲ କରାଯାଇଥିବା ସ୍ଥାନୀୟ ଅଞ୍ଚଳରେ ଆଲୋଚନା ହେଉଛି।
ପ୍ରକାଶ ଯେ, ସ୍ଥାନୀୟ ଏମଇ ସ୍କୁଲର ତତ୍କାଳୀନ ପ୍ରଧାନଶିକ୍ଷକ ରଘୁନାଥ ପ୍ରସାଦ ବହିଦାରଙ୍କ ପ୍ରସ୍ତାବକ୍ରମେ ଏବଂ ଉଦ୍ୟୋକ୍ତା ଯାଦବ ସାହୁ, କାଳୀଚରଣ ସାହୁ, ମନବୋଧ ସାହୁ, କାଶୀରାମ ଅଗ୍ରୱାଲ, ଶ୍ରୀରାମ ଅଗ୍ରୱାଲ, ହଜାରିଲାଲ ଅଗ୍ରୱାଲ ଓ ମହମ୍ମଦ ନବାବ ଖାନଙ୍କ ପ୍ରଚେଷ୍ଟାରେ ୧୯୫୭ ମସିହାରେ ଏହି ହାଇସ୍କୁଲ ପ୍ରତିଷ୍ଠା ଲାଭ କରିଥିଲା। ଓଡିଶାର ପ୍ରଥମ ମୁଖ୍ୟମନ୍ତ୍ରୀ ହରେକୃଷ୍ଣ ମହତାବଙ୍କ ନାମରେ ଏହି ବିଦ୍ୟାଳୟ ନାମିତ କରାଯାଇଥିଲା। ୧୯୫୭ରେ ମୁଖ୍ୟମନ୍ତ୍ରୀ ମହତାବ ଲୋଇସିଂହା ଗସ୍ତ କରି ଉକ୍ତ ବିଦ୍ୟାଳୟର ଭିତ୍ତିପ୍ରସ୍ତର ସ୍ଥାପନ କରିଥିଲେ। ସେହିବର୍ଷ ଅଗଷ୍ଟ ମାସରୁ ଅଷ୍ଟମ ଶ୍ରେଣୀ ପାଠପଢା ଆରମ୍ଭ ହୋଇଥିଲା। ୧୯୫୭ରୁ ୧୯୮୨ ମସିହା ପର୍ଯ୍ୟନ୍ତ ଝିଅ ପୁଅ ମିଶି ସେତେବେଳେ ପାଠ ପଢୁଥିଲେ। ୧୯୮୨ ମସିହାରେ ଲୋଇସିଂହାରେ ବାଳିକା ବିଦ୍ୟାଳୟ ପ୍ରତିଷ୍ଠା ପରେ ହରେକୃଷ୍ଣ ମହତାବ ହାଇସ୍କୁଲରେ କେବଳ ଛାତ୍ର ପାଠ ପଢୁଛନ୍ତି। ୨୦୨୫ରେ ବିଦ୍ୟାଳୟ ପରିସରରେ ମହତାବଙ୍କ ପ୍ରତିମୂର୍ତ୍ତି ସ୍ଥାପନ ପାଇଁ ବିଦ୍ୟାଳୟ କର୍ତ୍ତୃପକ୍ଷ ଏବଂ ପୁରାତନ ଛାତ୍ରଙ୍କ ପକ୍ଷରୁ ନିଷ୍ପତ୍ତି ହୋଇଥିଲା।
ପ୍ରତିଷ୍ଠାର ଦୀର୍ଘ ବର୍ଷ ପରେ ୨୦୨୬ ଅଗଷ୍ଟ ୧୫ ତାରିଖ ଦିନ ମହତାବଙ୍କ ପ୍ରତିମୂର୍ତ୍ତି ଉନ୍ମୋଚନ ପାଇଁ ତାରିଖ ସ୍ଥିର ହୋଇଥିଲା। ରାଜ୍ୟ ସରକାର ଓ ସଂସ୍କୃତି ବିଭାଗ ଅନୁଦାନରେ ଜିଲା ସଂସ୍କୃତି ବିଭାଗ ପକ୍ଷରୁ ବିଦ୍ୟାଳୟ ପରିସରରେ ପ୍ରତିମୂର୍ତ୍ତି ସ୍ଥାପନ କରାଯାଇଛି। ତାରିଖ ସ୍ଥିର ଓ କାର୍ଯ୍ୟକ୍ରମ ଚୂଡାନ୍ତ ହୋଇଥିବାରୁ ସଭା କାର୍ଯ୍ୟ ପାଇଁ ଟେଣ୍ଟ ମଧ୍ୟ ମରାଯାଇଥିଲା। ବହୁ ଉତ୍କଣ୍ଠା ସହ ସେହି ମୁହୂୂର୍ତ୍ତକୁ ବିଦ୍ୟାଳୟ କର୍ତ୍ତୃପକ୍ଷ, ଛାତ୍ର, ପୁରାତନ ଛାତ୍ରୀଛାତ୍ର ଓ ବୁଦ୍ଧିଜୀବୀ ଚାହିଁ ରହିଥିଲେ। ହେଲେ ଆକସ୍ମିକ ଭାବେ କାର୍ଯ୍ୟକ୍ରମକୁ ବାତିଲ କରାଯିବା ଘଟଣା ଅଞ୍ଚଳବାସୀଙ୍କୁ ବ୍ୟଥିତ କରିଛି। ବିଦ୍ୟାଳୟର ପ୍ରାକ୍ତନ ଶିକ୍ଷକ ବିଭୂତି ଭୂଷଣ ସାହାଣୀ କହିଛନ୍ତି, ଏହା ଶିକ୍ଷିତ ସମାଜକୁ ବଡ କଷ୍ଟ ଦେଇଛି। ଅନେକ ଉଦ୍ୟୋକ୍ତା ଏହି ବିଦ୍ୟାଳୟ ପ୍ରତିଷ୍ଠା କରି ଅଞ୍ଚଳରେ ଶିକ୍ଷାର ଦୀପଟିଏ ଜାଳିଥିଲେ। ବିଦ୍ୟାଳୟର ଆଲୁମିନି ସଦସ୍ୟ ତଥା ପୁରାତନ ଛାତ୍ର ସରୋଜ ବିଶ୍ୱାଳ କହିଛନ୍ତି, ମନରେ ବହୁତ ଉତ୍ସାହ ରହିଥିଲା ,କାର୍ଯ୍ୟକ୍ରମ ବାତିଲ ମନକୁ ଆଘାତ ଦେଇଛି। ଏହା ଯଦି ରାଜନୈତିକ ଚକ୍ରାନ୍ତ , ତେବେ ଲୋଇସିଂହା ଅଞ୍ଚଳ ପାଇଁ ଶୁଭଙ୍କର ନୁହେଁ। ବିଦ୍ୟାଳୟର ପ୍ରଧାନଶିକ୍ଷକ ସର୍ଜନ ନେଗୀ କହିଛନ୍ତି,ସମସ୍ତ ପ୍ରସ୍ତୁତି ସରି ଯାଇଥିଲା। ଉତ୍କଣ୍ଠା ସହ ଅପେକ୍ଷାରେ ଥିଲୁ। କିନ୍ତୁ କ’ଣ ପାଇଁ କାର୍ଯ୍ୟକ୍ରମ ବାତିଲ ହେଲା ଆମକୁ ଜଣାନାହିଁ ବୋଲି ସେ କହିଛନ୍ତି।
Dharitri – Odisha’s No.1 Odia Daily
