ଭୁବନେଶ୍ୱର,୨୭।୮(ବ୍ୟୁରୋ): ବିଦ୍ୟୁତ୍ ଚାଳିତ ଗାଡ଼ି ତଥା ଇ-ଯାନ ପଲିସିକୁ ଶୁକ୍ରବାର ରାଜ୍ୟ କ୍ୟାବିନେଟ୍ ମଞ୍ଜୁରୀ ଦେଇଛି। ପ୍ରଦୂଷଣ ରୋକିବା ଏବଂ ବିଦ୍ୟୁତ୍ ଚାଳିତ ଯାନକୁ ଲୋକପ୍ରିୟ କରିବା ନେଇ ଏହି ପଲିସି ଅଣାଯାଇଛି। ଏଣିକି ବିଦ୍ୟୁତ୍ ଚାଳିତ ଯାନ କିଣିବା ପାଇଁ ସରକାର ପ୍ରୋତ୍ସାହନ ଦେବେ । ୨ ଚକିଆ ଯାନ ପାଇଁ ୫ ହଜାର ଟଙ୍କାର ରିହାତି ବ୍ୟବସ୍ଥା ରହିଛି। ସେହିପରି ୩ ଚକିଆ ପାଇଁ ୧୨ ହଜାର ଓ ୪ ଚକିଆ ପାଇଁ ସର୍ବାଧିକ ୧ ଲକ୍ଷ ଟଙ୍କା ରିହାତି ଯୋଜନା ରହିଛି।
ସରକାରୀ ଅଫିସ କିମ୍ବା ଘରୋଇ କମ୍ପାନୀ ବିଦ୍ୟୁତ୍ ଚାଳିତ ଯାନ କିଣିଲେ ଅଧିକ ରିହାତି ମିଳିବ ବୋଲି ପଲିସିରେ ଉଲ୍ଲେଖ ରହିଛି। ଏହାସହ ରୋଡ ଟ୍ୟାକ୍ସ ଓ ପଞ୍ଜିକରଣ ଫି ଛାଡ଼ ହୋଇପାରେ। ସେହିପରି ବିଦ୍ୟୁତ୍ ଚାଳିତ ଯାନ ନିର୍ମାତା ଏବଂ ଯନ୍ତ୍ରାଂଶ ଓ ବ୍ୟାଟେରୀ ପ୍ରସ୍ତୁତିକାରୀଙ୍କୁ ପ୍ରୋତ୍ସାହିତ କରାଯିବ । ରାଜ୍ୟ ସରକାରୀ କର୍ମଚାରୀ ବିଦ୍ୟୁତ୍ ଚାଳିତ ଯାନ କିଣିଲେ ଶତ ପ୍ରତିଶତ ସୁଧ ମୁକ୍ତ ଋଣ ପ୍ରଦାନ କରାଯିବ। ଏହାସହ ୧୪ଟି ପ୍ରସ୍ତାବକୁ ମଞ୍ଜୁୁରୀ ଦେଇଛି ରାଜ୍ୟ କ୍ୟାବିନେଟ।
