ଚେନ୍ନାଇ,୬ା୫: ତାମିଲନାଡୁ ବିଧାନସଭା ନିର୍ବାଚନରେ ପରାଜୟ ପରେ ଦ୍ରାବିଡ଼ ମୁନ୍ନେତ୍ରା କାଝାଗମ୍ (ଡିଏମ୍କେ) ଅଧ୍ୟକ୍ଷ ଏମ୍.କେ. ଷ୍ଟାଲିନ୍ ମଙ୍ଗଳବାର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି। ସେ ତାଙ୍କ ଇସ୍ତଫାପତ୍ର ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକରଙ୍କୁ ଦେଇଥିବାବେଳେ ରାଜ୍ୟପାଳ ତାହାକୁ ଗ୍ରହଣ କରିଥିବା ଲୋକ ଭବନ ପକ୍ଷରୁ କୁହାଯାଇଛି।
୨୩୪ ଆସନ ବିଶିଷ୍ଟ ତାମିଲନାଡୁ ବିଧାନସଭା ନିର୍ବାଚନ ରାଜ୍ୟ ରାଜନୀତିରେ ବଡ଼ ପରିବର୍ତ୍ତନ ଆଣିଛି। ଅଭିନେତାରୁ ରାଜନେତା ହୋଇଥିବା ବିଜୟଙ୍କ ତାମିଲାଗା ଭେଟ୍ଟ୍ରି କାଝାଗମ୍ (ଟିଭିକେ) ୧୦୮ ଆସନରେ ଜିତି ଏକକ ସଂଖ୍ୟାଗରିଷ୍ଠ ଦଳ ଭାବେ ଉଭା ହୋଇଛି। ୫୯ ଆସନ ସହ ଶାସକ ଦଳ ଡିଏମ୍କେକୁ ଶକ୍ତ ଧକ୍କା ଲାଗିଛି। ଏପରିକି ନିଜେ ଷ୍ଟାଲିନ୍ ତାଙ୍କ ରାଜନୈତିକ ଗଡ଼ କୁହାଯାଉଥିବା କୋଲାଥୁର ଆସନରୁ ଟିଭିକେ ପ୍ରାର୍ଥୀ ଭି.ଏସ୍. ବାବୁଙ୍କଠାରୁ ୮,୭୯୫ ଭୋଟ ବ୍ୟବଧାନରେ ହାରିଯାଇଛନ୍ତି। ଟିଭିକେ ଭୋଟ ଭାଗ ୩୨ ପ୍ରତିଶତରୁ ଅଧିକ ଥିବାବେଳେ ଡିଏମ୍କେ ୨୪.୧୯% ଏବଂ ଏଆଇଏଡିଏମ୍କେ ୨୧.୨୨% ଭୋଟ ପାଇଛି। ପରାଜୟ ସତ୍ତ୍ୱେ ଡିଏମ୍କେକୁ ଭୋଟ ଦେଇଥିବା ଭୋଟରମାନଙ୍କୁ ଷ୍ଟାଲିନ୍ କୃତଜ୍ଞତା ଜଣାଇଛନ୍ତି।
