ବଲିଉଡର ‘ଚାନ୍ଦନୀ’ ଏବଂ ଲୋକଙ୍କ ହୃଦୟରେ ରାଜ କରୁଥିବା ଶ୍ରୀଦେବୀଙ୍କୁ ସିନେମା ଜଗତର ପ୍ରଥମ ମହିଳା ସୁପରଷ୍ଟାର ବୋଲି କୁହାଯାଏ। ଶ୍ରୀଦେବୀଙ୍କୁ ଲେଡି ଅମିତାଭ ବଚ୍ଚନ ଏବଂ ପ୍ରଥମ ସୁପରଷ୍ଟାର ମାନ୍ୟତା ଦିଆଯାଇଛି। ୧୯୬୩ ଅଗଷ୍ଟ ୧୩ରେ ଜନ୍ମଗ୍ରହଣ କରିଥିବା ଶ୍ରୀଦେବୀ ଚାରି ବର୍ଷ ବୟସରେ ଅଭିନୟ ଆରମ୍ଭ କରିଥିଲେ। ୧୯୬୭ ତାମିଲ ଚଳଚ୍ଚିତ୍ର ‘କନ୍ଦନ କରୁଣାଇ’ରେ ଶିଶୁ କଳାକାର ଭାବରେ ଅଭିନୟ କରିଥିଲେ। ବଲିଉଡରେ ପାଦ ଦେବା ପୂର୍ବରୁ ଶ୍ରୀଦେବୀ ତାମିଲ, ତେଲୁଗୁ, ମାଲାୟାଲମ ଏବଂ କନ୍ନଡ ଚଳଚ୍ଚିତ୍ରରେ କାମ କରିଥିଲେ। ଶ୍ରୀଦେବୀ ବଲିଉଡରେ ୪ ଦଶନ୍ଧିରୁ ଅଧିକ ସମୟ ଧରି ତାଙ୍କ ଅଭିନୟ ସହିତ ଲୋକଙ୍କ ମନୋରଞ୍ଜନ କରିଥିଲେ। ତାଙ୍କ ଜନ୍ମଦିନ ଅବସରରେ ଜାଣନ୍ତୁ ତାଙ୍କ ସମ୍ପର୍କିତ କିଛି ବିଶେଷ କଥା। ବହୁତ କମ ଲୋକ ଜାଣିଥିବେ ଯେ, ଶ୍ରୀଦେବୀଙ୍କ ପ୍ରକୃତ ନାମ ଶ୍ରୀଦେବୀ ନୁହେଁ । ଶ୍ରୀଦେବୀଙ୍କ ପ୍ରକୃତ ନାମ ଥିଲା ଆମ୍ମା ୟାଙ୍ଗର୍ ଆୟାପନ ।
କୁହାଯାଉଛି ଯେ ଫିଲ୍ମ ‘ଜୁରାସିକ ପାର୍କ’ରେ ଷ୍ଟିଭେନ ସ୍ପିଲବର୍ଗଙ୍କ ଦ୍ୱାରା ଶ୍ରୀଦେବୀଙ୍କୁ ଏକ ଛୋଟ ଭୂମିକା ଦିଆଯାଇଥିଲା। ସେତେବେଳେ ଶ୍ରୀଦେବୀ ଏହି ଭୂମିକାକୁ ମନା କରି କହିଥିଲେ, ଏହା ତାଙ୍କ ସ୍ଥିତି ଅନୁଯାୟୀ ନୁହେଁ। ଶ୍ରୀଦେବୀ ବଲିଉଡର ଅଧିକାଂଶ କଳାକାରଙ୍କ ସହ କାମ କରିଛନ୍ତି। ତାଙ୍କ ସମସ୍ତ ଚଳଚ୍ଚିତ୍ର ସୁପରହିଟ ହୋଇଥିଲା।
୧୯୮୯ରେ ମୁକ୍ତିଲାଭ କରିଥିବା ଫିଲ୍ମ ‘ଚଲବାଜ’ର ସୁପରହିଟ ଗୀତ’ ନା ଜାନେ କାହାଁ ସେ ଆୟା ହୈ’ ଶୁଟିଂ ୧୦୩ ଡିଗ୍ରୀ ଜ୍ୱରରେ କରିଥିଲେ। ଶ୍ରୀଦେବୀ ଅନିଲ କପୁରଙ୍କ ସହ ତାଙ୍କ କ୍ୟାରିୟରରେ ସର୍ବାଧିକ ସଂଖ୍ୟକ ଫିଲ୍ମ କରିଛନ୍ତି। କୁହାଯାଏ ଯେ, ଫିଲ୍ମ ‘ବେଟା’ ପ୍ରଥମେ ଶ୍ରୀଦେବୀଙ୍କୁ ଦିଆଯାଇଥିଲା କିନ୍ତୁ ସେ ଅନିଲଙ୍କ ସହ ଅନେକ ଫିଲ୍ମ କରିଛନ୍ତି ବୋଲି କହି ସେ ଏହା କରିବାକୁ ମନା କରିଦେଇଥିଲେ। ଶ୍ରୀଦେବୀଙ୍କର ଦୁଇ ଝିଅ ଖୁସି ଏବଂ ଜାହ୍ନଭି ଅଛନ୍ତି। କୁହାଯାଉଛି ଯେ, ସ୍ବାମୀ ବୋନି କପୁର ଶ୍ରୀଦେବୀଙ୍କ ଦୁଇଟି ଫିଲ୍ମ ଦେଖିବା ପରେ ଉଭୟଙ୍କ ନାମ ଦେଇଥିଲେ। ଏହି ଫିଲ୍ମ ହେଲା ‘ଯୁଦାଇ’ ଏବଂ ‘ହମାରା ଦିଲ ଆପକେ ପାସ ହ’।
