ନର୍ଥ ସାଉଣ୍ଡ (ଆଣ୍ଟିଗୁଆ),୪।୪: ସ୍ଥାନୀୟ ଭିଭିଆନ ରିଚାଡର୍ସ ଷ୍ଟାଡିୟମରେ ଓ୍ବେଷ୍ଟଇଣ୍ଡିଜ ଓ ଭ୍ରମଣକାରୀ ଶ୍ରୀଲଙ୍କା ମଧ୍ୟରେ ଅନୁଷ୍ଠିତ ଦ୍ୱିତୀୟ ତଥା ଅନ୍ତିମ ଟେଷ୍ଟ ମ୍ୟାଚ୍ ଶନିବାର ଅମୀମାଂସିତ ରହିଛି। ଶ୍ରୀଲଙ୍କାର ଦୁଇ ଓପନର ଲାହିରୁ ଥିରିମାନେ ଓ ଅଧିନାୟକ ଦିମୁଥ କରୁଣାରତ୍ନେ ପ୍ରଥମ ଉଇକେଟରେ ୧୦୧ ରନର ଶତକୀୟ ଭାଗୀଦାରି କରି ମ୍ୟାଚ୍କୁ ଡ୍ର ରଖିବାରେ ମୁଖ୍ୟ ଭୂମିକା ଗ୍ରହଣ କରିଥିଲେ। ପୂର୍ବରୁ ଏହି ଗ୍ରାଉଣ୍ଡରେ ଖେଳାଯାଇଥିବା ପ୍ରଥମ ଟେଷ୍ଟ ମଧ୍ୟ ଅମୀମାଂସିତ ରହିଥିଲା। ଫଳରେ ଦୁଇ ମ୍ୟାଚ ବିଶିଷ୍ଟ ଏହି ସିରିଜ ୦-୦ ବ୍ୟବଧାନରେ ଡ୍ର ରହିଛି। ପ୍ରଥମ ଇନିଂସରେ ୧୨୬ ରନର ଶତକୀୟ ଇନିଂସ ଓ ଦ୍ୱିତୀୟ ଇନିଂସରେ ୮୫ ରନର ଅର୍ଦ୍ଧଶତକୀୟ ପାଳି ଖେଳିଥିବା ଘରୋଇ ଓପନର କ୍ରେଗ୍ ବ୍ରାଥଓ୍ବେଟ୍ ପ୍ଲେୟର ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି। ସେହିପରି ସାରା ସିରିଜରେ ସ୍ଥିର ପ୍ରଦର୍ଶନ କରିଥିବା ଶ୍ରୀଲଙ୍କା ଦ୍ରୁତ ବୋଲର ସୁରଙ୍ଗା ଲାକମଲ ପ୍ଲେୟର ଅଫ୍ ଦି ସିରିଜ ବିବେଚିତ ହୋଇଛନ୍ତି।
ଟସ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ଓ୍ବେଷ୍ଟଇଣ୍ଡିଜ ପ୍ରଥମ ଇନିଂସରେ ୩୫୪ ରନ କରି ଅଲଆଉଟ ହୋଇଥିଲା। ଜବାବରେ ଶ୍ରୀଲଙ୍କା ୨୫୮ ରନକରି ଅଲଆଉଟ ହୋଇଥିଲା। ଫଳରେ ଓ୍ବେଷ୍ଟଇଣ୍ଡିଜ ୯୬ ରନର ମହତ୍ତ୍ୱପୂର୍ଣ୍ଣ ଅଗ୍ରଣୀ ହାସଲ କରିଥିଲା। ଏହାପରେ ଦ୍ୱିତୀୟ ଇନିଂସରେ ଓ୍ବେଷ୍ଟଇଣ୍ଡିଜ ୪ ଉଇକେଟ ହରାଇ ୨୮୦ ରନ କରି ଇନିଂସ ଘୋଷଣା କରିଥିଲା। ଫଳରେ ଶ୍ରୀଲଙ୍କା ସମ୍ମୁଖରେ ୩୭୭ ରନର ବିଜୟଲକ୍ଷ୍ୟ ଧାର୍ଯ୍ୟ ହୋଇଥିଲା। ଜବାବରେ ଶ୍ରୀଲଙ୍କା ଦ୍ୱିତୀୟ ଇନିଂସ ଆରମ୍ଭ କରି ପଞ୍ଚମ ତଥା ଅନ୍ତିମ ଦିବସ ଖେଳ ଶେଷ ସୁଦ୍ଧା ୭୯ ଓଭରରେ ୨ ଉଇକେଟ ହରାଇ ୧୯୩ ରନ ସଂଗ୍ରହ କରିଥିଲା। ଓଶାଡା ଫର୍ନାଣ୍ଡୋ ୬୬ ଓ ଦୀନେଶ ଚାଣ୍ଡିମଲ ୧୦ ରନକରି ଅପରାଜିତ ରହିଥିଲେ। ତେବେ ଶତକୀୟ ଭାଗୀଦାରି ସ୍ଥାପନ କରିଥିବା ଦୁଇ ଓପନର ଥିରିମାନେ ୩୯ ଓ କରୁଣାରତ୍ନେ ୭୫ ରନ ସଂଗ୍ରହ କରି ଯଥାକ୍ରମେ ଅଲଜାରି ଜୋଶେଫ ଓ କାଏଲ ମେୟର୍ସଙ୍କ ଦ୍ୱାରା ଆଉଟ ହୋଇଥିଲେ। ଅସମାପ୍ତ ଦ୍ୱିତୀୟ ଇନିଂସ ସ୍କୋର ୨୯/୦ରୁ ଶ୍ରୀଲଙ୍କା ଖେଳ ଆରମ୍ଭ କରିଥିଲା। ଓଭରନାଇଟ ବ୍ୟାଟ୍ସମ୍ୟାନ ଥିରିମାନେ ୧୭ ଓ କରୁଣାରତ୍ନେ ୧୧ରୁ ଖେଳ ଆରମ୍ଭ କରି ଶନିବାର ଆଉଟ ହୋଇଥିଲେ।
ସଂକ୍ଷିପ୍ତ ସ୍କୋର:
ଓ୍ବେଷ୍ଟଇଣ୍ଡିଜ ପ୍ରଥମ ଇନିଂସ: ୧୧୧.୧ ଓଭରରେ ୩୫୪ ଅଲଆଉଟ।
ଶ୍ରୀଲଙ୍କା ପ୍ରଥମ ଇନିଂସ: ୧୦୭ ଓଭରରେ ୨୫୮ ଅଲଆଉଟ।
ଓ୍ବେଷ୍ଟଇଣ୍ଡିଜ ଦ୍ୱିତୀୟ ଇନିଂସ: ୭୨.୪ ଓଭରରେ ୨୮୦/୪ (ଇନିଂସ ଘୋଷଣା)
ଶ୍ରୀଲଙ୍କା ଦ୍ୱିତୀୟ ଇନିଂସ: ୭୯ ଓଭରରେ ୧୯୩/୨
(ଓଶାଡ଼ା ଫର୍ନାଣ୍ଡୋ- ୬୬*, ଦୀନେଶ ଚାଣ୍ଡିମଲ- ୧୦*, କରୁଣାରତ୍ନେ- ୭୫, ଥିରିମାନେ- ୩୯, ଜୋଶେଫ୍- ୧/୩୩, ମେୟର୍ସ- ୧/୫)।
କ୍ୟାପଶନ: ଦ୍ୱିତୀୟ ଇନିଂସର ପ୍ରଥମ ଉଇକେଟରେ ୧୦୧ ରନର ପାର୍ଟନରଶିପ୍ ସ୍ଥାପନ କରିଥିବା ଶ୍ରୀଲଙ୍କା ଓପନର ଦିମୁଥ କରୁଣାରତ୍ନେ ଓ ଲାହିରୁ ଥିରିମାନେ
