କୁଲିଜ୍ (ଆଣ୍ଟିଗୁଆ), ୭ା୩ (ଏପି)- ଶ୍ରୀଲଙ୍କା ସ୍ପିନରଙ୍କ ପ୍ରଭାବୀ ବୋଲିଂ ଯୋଗୁ ଏଠାରେ ଖେଳାଯାଇଥିବା ଓ୍ବେଷ୍ଟଇଣ୍ଡିଜ ବିପକ୍ଷ ଦ୍ୱିତୀୟ ଅନ୍ତର୍ଜାତୀୟ ଟି୨୦ ମ୍ୟାଚକୁ ଶ୍ରୀଲଙ୍କା ୪୩ ରନରେ ଜିତିନେଇଛି। ଫଳରେ ଦୁଇ ଦଳ ମଧ୍ୟରେ ଚାଲିଥିବା ୩ ମ୍ୟାଚ ବିଶିଷ୍ଟ ସିରିଜ ୧-୧ ସ୍ତରକୁ ଚାଲି ଆସିଛି। ମ୍ୟାଚରେ ପ୍ରଥମେ ବ୍ୟାଟିଂ କରିଥିବା ଶ୍ରୀଲଙ୍କା ନିର୍ଦ୍ଧାରିତ ଓଭରରେ ୬ ଉଇକେଟ ବିନିମୟରେ ୧୬୦ ରନ କରିଥିଲା। ଓ୍ବାନିଣ୍ଡୁ ହସରଙ୍ଗା, ଆକିଲା ଧନଞ୍ଜୟ ଓ ଦାନୁଷ୍କା ଗୁଣତିଳକା ମିଳିତ ଭାବେ ୮ ଉଇକେଟ ଦଖଲ କରିବାରୁ ଘରୋଇ ଦଳ ୧୮.୪ ଓଭରରେ ୧୧୭ ରନ କରି ଅଲଆଉଟ ହୋଇଯାଇଥିଲା। କୁଲିଜ୍ଠାରେ ନିହାତି ବିଜୟ ଆବଶ୍ୟକ କରୁଥିବା ଶ୍ରୀଲଙ୍କା ଏହି ମ୍ୟାଚ ପାଇଁ ଦଳରେ ୪ ସ୍ପିନର ଖେଳାଇଥିଲା। ମନ୍ଥର ପିଚ୍ ଯୋଗୁ ବଡ଼ ଶଟ୍ ଖେଳିବା ବ୍ୟାଟ୍ସମ୍ୟାନମାନଙ୍କ ପକ୍ଷେ କଷ୍ଟକର ଥିଲା। ନିୟମିତ ଭାବେ ଉଇକେଟ ପତନ ଘଟିବାରୁ ଓ୍ବେଷ୍ଟଇଣ୍ଡିଜ ସ୍କୋରିଂ ମୁମେଣ୍ଟମ ବଜାୟ ରଖିବାରେ ସକ୍ଷମ ହୋଇପାରି ନ ଥିଲା। ପ୍ରଥମ ମ୍ୟାଚରେ ହ୍ୟାଟ୍ରିକ ଅର୍ଜନ ସହ ଓ୍ବେଷ୍ଟଇଣ୍ଡିଜ ବ୍ୟାଟ୍ସମ୍ୟାନ କିରନ ପୋଲାର୍ଡଙ୍କୁ ଗୋଟିଏ ଓଭରରେ ୬ ଛକା ମାରିବା ସୁଯୋଗ ଦେଇଥିବା ଧନଞ୍ଜୟ ପାଓ୍ବାରପ୍ଲେରେ ୪ ଓଭର ବୋଲିଂ କରି ୧୩ ରନ ବିନିମୟରେ ଗୋଟିଏ ଉଇକେଟ ଅକ୍ତିଆର କରିଥିଲେ। ଅନ୍ୟପକ୍ଷରେ ପ୍ରଥମ ମ୍ୟାଚ ଖେଳି ନ ଥିବା ବାମହାତୀ ରିଷ୍ଟ ସ୍ପିନର ଲକ୍ଷଣ ସଣ୍ଡାକନ ୩.୪ ଓଭର ବୋଲିଂ କରି ମାତ୍ର ୧୦ ରନ ବିନିମୟରେ ୩ ଉଇକେଟ ନେଇଥିଲେ। ତନ୍ମଧ୍ୟରେ ଓ୍ବେଷ୍ଟଇଣ୍ଡିଜ ଅଧିନାୟକ କିରନ ପୋଲାର୍ଡ (୧୩ରନ)ଙ୍କ ଗୁରୁତ୍ୱପୂର୍ଣ୍ଣ ଉଇକେଟ ଅନ୍ତର୍ଭୁକ୍ତ। ମ୍ୟାନ ଅଫ୍ ଦି ମ୍ୟାଚ ବିବେଚିତ ହସରଙ୍ଗା ତାଙ୍କ ୪ ଓଭର ବୋଲିଂରେ ୧୭ ରନ ବିନିମୟରେ ୩ ଉଇକେଟ ହାସଲ କରିଥିଲେ। ଶ୍ରୀଲଙ୍କା ଇନିଂସରେ ସେ ୧୯ରନ କରି ଅପରାଜିତ ରହିଥିଲେ।
ସଂକ୍ଷିପ୍ତ ସ୍କୋର
ଶ୍ରୀଲଙ୍କା ଇନିଂସ: ୨୦ ଓଭରରେ ୧୬୦/୬ (ଦାନୁଷ୍କା ଗୁଣତିଳକା-୫୬, ପାଥୁମ ନିଶାଙ୍କା-୩୭, ଆଶେନ ବାନ୍ଦରା-୨୧, ଡ୍ବେନ ବ୍ରାଭୋ-୨/୨୫)।
ଓ୍ବେଷ୍ଟଇଣ୍ଡିଜ ଇନିଂସ: ୧୮.୪ ଓଭରରେ ୧୧୭/ଅଲଆଉଟ (ଓବେଡ୍ ମ୍ୟାକ୍କଏ-୨୩, ଲେଣ୍ଡଲ ସିମନ୍ସ-୨୧; ଲକ୍ଷଣ ସଣ୍ଡାକନ-୩/୧୦, ଓ୍ବାନିଣ୍ଡୁ ହସରଙ୍ଗା-୩/୧୭, ଦୁଶ୍ମନ୍ତ ଚାମିରା-୨/୨୬)।
