ନୂଆଦିଲ୍ଲୀ,୨୯।୧୧ : କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ମଙ୍ଗଳବାର କହିଛନ୍ତି ଯେ ସୋସିଆଲ ମିଡିଆର ଦ୍ରୁତ ବିକାଶ ସହିତ ମିଥ୍ୟା ଖବରର ପ୍ରସାରଣ ମଧ୍ୟ ବୃଦ୍ଧି ପାଇଛି। ଏସିଆ-ପାସିଫିକ ବ୍ରଡକାଷ୍ଟିଂ ୟୁନିଅନ (ଏବିୟୁ) ସାଧାରଣ ସଭା ୨୦୨୨ରେ ଯୋଗଦେଇ ସେ ଏହି ମନ୍ତବ୍ୟ ଦେଇଛନ୍ତି। କେନ୍ଦ୍ର ମନ୍ତ୍ରୀ କହିଛନ୍ତି, ଯେଉଁ ବେଗରେ ସୂଚନା ପ୍ରସାର କରାଯାଉଛି ସେକ୍ଷେତ୍ରରେ, ଗୁରୁତ୍ୱପୂର୍ଣ୍ଣ ହେଉଛି ସଠିକତା। ମିଥ୍ୟା ଖବର ସମ୍ପର୍କରେ ଠାକୁର କହିଛନ୍ତି ଯେ ଯାଞ୍ଚ ହୋଇ ନଥିବା ଦାବିକୁ ପ୍ରତିହତ କରିବା ଏବଂ ସତ୍ୟକୁ ଲୋକଙ୍କ ନିକଟରେ ଉପସ୍ଥାପନ କରିବା ପାଇଁ କେନ୍ଦ୍ର ପ୍ରେସ ସୂଚନା ବ୍ୟୁରୋରେ ଏକ ଫ୍ୟାକ୍ଟ ଚେକ ୟୁନିଟ ପ୍ରତିଷ୍ଠା କରାଯାଇଛି।
ମନ୍ତ୍ରୀ କହିଛନ୍ତି ଯେ ଦାୟିତ୍ୱବୋଧ ଗଣମାଧ୍ୟମ ସଂଗଠନଗୁଡ଼ିକ ପାଇଁ ସର୍ବୋଚ୍ଚ ମାର୍ଗଦର୍ଶିକା ହେବା ଉଚିତ। ସେ ଦୂରଦର୍ଶନ ଏବଂ ଅଲ ଇଣ୍ଡିଆ ରେଡିଓକୁ ସର୍ବଦା ସତ୍ୟ ରିପୋର୍ଟ କରୁଥିବା ଦ୍ୱାରା ଲୋକଙ୍କ ବିଶ୍ୱାସ ଜିତିବା ନେଇ ଶ୍ରେୟ ଦେଇଛନ୍ତି। ଜାତୀୟ ବିପର୍ଯ୍ୟୟ ପରିଚାଳନା ଯୋଜନାରେ ଗଣମାଧ୍ୟମର ଗୁରୁତ୍ୱପୂର୍ଣ୍ଣ ଭୂମିକା ରହିଛି ବୋଲି ସେ ଦର୍ଶାଇଛନ୍ତି ।
କରୋନା ମହାମାରୀ ସମୟରେ ଘରେ ଅଟକି ରହିଥିବା ଲୋକଙ୍କୁ ସାହାଯ୍ୟ କରିବା ପାଇଁ ଆଗକୁ ଆସିବା କ୍ଷେତ୍ରରେ ଗଣମାଧ୍ୟମ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ମିଡିଆ ହିଁ ଏଭଳି ସଙ୍କଟ ସମୟରେ ଲୋକଙ୍କୁ ବାହ୍ୟ ଜଗତ ସହିତ ଯୋଡିଥିଲା। ମନ୍ତ୍ରୀ କହିଛନ୍ତି ଯେ ଭାରତୀୟ ଗଣମାଧ୍ୟମ ଦ୍ୱାରା କରୋନା ସଚେତନତା ବାର୍ତ୍ତା, ଗୁରୁତ୍ୱପୂର୍ଣ୍ଣ ସରକାରୀ ନିର୍ଦ୍ଦେଶାବଳୀ ଏବଂ ଡାକ୍ତରଙ୍କ ସହ ମାଗଣା ଅନଲାଇନ ପରାମର୍ଶ ଦେଶର ପ୍ରତ୍ୟେକ କୋଣରେ ପହଞ୍ଚି ପାରିଥିଲା।
ପ୍ରସାର ଭାରତୀ ମହାମାରୀ ସମୟରେ ଶହେରୁ ଅଧିକ ସଦସ୍ୟଙ୍କୁ ହରାଇଥିଲେ ମଧ୍ୟ ଏହା ସର୍ବସାଧାରଣଙ୍କ ପାଇଁ କର୍ତ୍ତବ୍ୟ ଜାରି ରଖିବା ବନ୍ଦ କରି ନଥିଲା। ଗଣମାଧ୍ୟମ ସରକାର ଏବଂ ଲୋକଙ୍କ ମଧ୍ୟରେ ଏକ ଲିଙ୍କ ଭାବରେ କାର୍ଯ୍ୟ କରିବା ଉଚିତ ତଥା ଉଭୟ ଜାତୀୟ ତଥା ଆଞ୍ଚଳିକ ସ୍ତରରେ ନିରନ୍ତର ମତାମତ ପ୍ରଦାନ କରିବା ଜରୁରୀ ବୋଲି ସେ କହିଥିଲେ।
