ଭୁବନେଶ୍ୱର, ୨୪।୫(ବ୍ୟୁରୋ):ଭୁବନେଶ୍ୱର ଏମ୍ସରେ ସ୍ବତନ୍ତ୍ର ମେଡିକାଲ୍ ଅନ୍କୋଲୋଜି ୟୁନିଟ୍ ସୋମବାର ଖୋଲିଛି। ଏଥିରେ ମେଡିକାଲ ଅନ୍କୋଲୋଜି/ହେମାଟୋଲୋଜି ବିଭାଗର ମେଡିକାଲ ଅନ୍କୋଲୋଜି ଡିଭିଜନ ପକ୍ଷରୁ ଏକ ଉତ୍ସର୍ଗୀକୃତ ଡେ’ କେୟାର୍ ଏବଂ ଓପିଡି ସେବା ଆରମ୍ଭ ହୋଇଛି। ଏମ୍ସର ନିର୍ଦ୍ଦେଶକ ଡା. ମୁକେଶ ତ୍ରିପାଠୀ ହସ୍ପିଟାଲର ଜି ବ୍ଲକ୍ରେ ଥିବା ଏହି ୟୁନିଟ୍କୁ ଉଦ୍ଘାଟନ କରି କହିଛନ୍ତି, ଏହା କର୍କଟ ରୋଗୀଙ୍କୁ କେମୋଥେରାପି ଚିକିତ୍ସା କ୍ଷେତ୍ରରେ ଏମ୍ସର ପ୍ରତିବଦ୍ଧତାକୁ ଦୋହରାଇବା ସହିତ ଏଠାରେ ଅଧିକ ଉତ୍ସାହ ଏବଂ ଉତ୍ସର୍ଗୀକୃତ ସେବା ମିଳିବ। ଏମ୍ସ ମେଡିକାଲ୍ ଅନ୍କୋଲୋଜି ବିଭାଗର ଏହି ବ୍ୟବସ୍ଥା ନିଶ୍ଚିତ ଭାବରେ କେମୋଥେରାପି ଆବଶ୍ୟକ କରୁଥିବା କର୍କଟ ରୋଗୀଙ୍କୁ ସାହାଯ୍ୟ କରିବ ବୋଲି ଡା. ତ୍ରିପାଠୀ କହିଛନ୍ତି। କଟକ ଆଚାର୍ଯ୍ୟ ହରିହର କର୍କଟ ସେବା କେନ୍ଦ୍ର ପରେ ସରକାରୀ ସ୍ତରରେ ଏମ୍ସରେ ଏହି ଦ୍ୱିତୀୟ ଉତ୍ସର୍ଗୀକୃତ ମେଡିକାଲ ଅନ୍କୋଲୋଜି ୟୁନିଟ୍ ସ୍ଥାପନ ହୋଇଛି। ଏମ୍ସରେ ପୂର୍ବରୁ ଅନ୍କୋଲୋଜି ବିଭାଗ ହେମାଟୋଲୋଜି ବିଭାଗ ସହିତ ଏକକାଳୀନ ଓପିଡି ଓ ଡେ’ କେୟାର ସେବା ପ୍ରଦାନ କରୁଥିଲା। ତେବେ ଅନ୍କୋଲୋଜି ବିଭାଗରେ ବହୁ ସଂଖ୍ୟକ ରୋଗୀ ପରାମର୍ଶ ଲୋଡ଼ୁଥିବାରୁ ଏନେଇ ସ୍ବତନ୍ତ୍ର ସ୍ଥାନର ଆବଶ୍ୟକତା ଥିଲା। ବର୍ତ୍ତମାନ ପାଇଁ ଏହି ବିଭାଗରୁ ସେବା ନେବାକୁ ଆସୁଥିବା କର୍କଟ ରୋଗୀମାନେ ସିଧାସଳଖ ଜି ବ୍ଲକ୍ରେ ପଞ୍ଜୀକରଣ କରିପାରିବେ। ଫଳରେ ଆଉ ଲମ୍ବା ସମୟ ପାଇଁ ଅପେକ୍ଷା କରିବାକୁ ପଡ଼ିବ ନାହିଁ। ମେଡିକାଲ୍ ଅନ୍କୋଲୋଜି ସେବା ପ୍ରତି ମଙ୍ଗଳବାର ଏବଂ ଗୁରୁବାର ପ୍ରଦାନ କରାଯିବ। ଡେ’ କେୟାର୍ ସେବା ସପ୍ତାହର ସବୁଦିନ ଚାଲିବ ବୋଲି ଏମ୍ସ ପକ୍ଷରୁ ସୂଚନା ଦିଆଯାଇଛି।
ଉକ୍ତ ୟୁନିଟ୍ର ଶୁଭାରମ୍ଭ ଅବସରରେ ଏମ୍ସର ମେଡିକାଲ ଅଧୀକ୍ଷକ ଡ. ସଚ୍ଚିଦାନନ୍ଦ ମହାନ୍ତି ଏହି ସେବାରେ ସାମିଲ ହୋଇଥିବା ଚିକିତ୍ସକ ଓ କର୍ମଚାରୀଙ୍କୁ ଅଭିନନ୍ଦନ ଜଣାଇଥିଲେ। ମେଡିକାଲ ଅନ୍କୋଲୋଜି/ହେମାଟୋଲୋଜି ବିଭାଗ ମୁଖ୍ୟ ଡା. ପ୍ରବୋଧ ଦାସ, ଜେଏମ୍ଏସ୍ ଡା. ଜେ. ଏସ୍. ପିଲାଇ, ଆସୋସିଏଟ୍ ପ୍ରଫେସର ଡା. ସୌରଭ କୁମାର ମିଶ୍ର ଏବଂ ବିଭାଗର ସହକାରୀ ପ୍ରଫେସର ଡା. ଇଲାଭାରାସି ଭାନିଡାସାନେ ମଧ୍ୟ ଉପସ୍ଥିତ ଥିଲେ। ଡା. ଇଲାଭାରାସୀ ଓ ଡା. ସୌରଭ ନୂତନ ଭାବେ ଏହି ବିଭାଗରେ ଅଧ୍ୟାପିକା/ଅଧ୍ୟାପକ ଭାବେ ଯୋଗଦେଇ ଏମ୍ସ ଭୁବନେଶ୍ୱରରେ ମେଡିକାଲ ଅନ୍କୋଲୋଜି ସେବା ଆରମ୍ଭ କରିଛନ୍ତି। ଭବିଷ୍ୟତରେ ମେଡିକାଲ ଅନ୍କୋଲୋଜିରେ ଡିଏମ୍ ପାଠ୍ୟକ୍ରମ ଆରମ୍ଭ କରିବାକୁ ଯୋଜନା ରହିଥିବା ଏମ୍ସ ପକ୍ଷରୁ ସୂଚନା ଦିଆଯାଇଛି।
