ନୂଆଦିଲ୍ଲୀ,୩୧।୫ :ଶୁକ୍ର ଗ୍ରହ ସମ୍ପର୍କରେ ଗବେଷଣା ଲାଗି ତତ୍କାଳୀନ ସୋଭିଏଟ୍ ରୁଷ୍ ୧୯୭୨ରେ ପଠାଇଥିବା ଏକ ମହାକାଶ ଯାନ ପୃଥିବୀ ପୃଷ୍ଠକୁ ଖସିବାର ସମ୍ଭାବନା ସୃଷ୍ଟି ହୋଇଛି। ଭେନେରା ୮ ମିଶନ ଅନ୍ତର୍ଗତ ମହାକାଶ ଯାନ କସ୍ମସ-୪୮୨ ଲଞ୍ଚ ହେବା ପରେ ଏହା ପୃଥିବୀ କକ୍ଷପଥ ଅତିକ୍ରମ କରିବାରେ ବିଫଳ ହୋଇଥିଲା। ମହାକାଶ ସ୍ଥିତି ସମ୍ପର୍କରେ ସତର୍କ କରାଉଥିବା ଏକ ସଂସ୍ଥା ମାର୍କୋ ଲାଙ୍ଗବ୍ରୋକ୍ର ରିପୋର୍ଟ ଅନୁଯାୟୀ କସ୍ମସ୍ ୪୮୨ ଏବେ ବି ପୃଥିବୀ ଚତୁଃପାର୍ଶ୍ୱରେ ଚୂଡ଼ାନ୍ତ ଟ୍ରାଜେକ୍ଟୋରିରେ ରହିଛି। ୨୦୨୫-୨୬ ବେଳକୁ ଏହା ପୃଥିବୀ ବାୟୁମଣ୍ଡଳ ମଧ୍ୟରେ ପ୍ରବେଶ କରିପାରେ ବୋଲି ଲାଙ୍ଗବ୍ରୋକ୍ ଆକଳନ କରିଛି।
ମହାକାଶ ଯାନ ୭,୭୦୦ କିଲୋମିଟରରୁ ଅଧିକ ତଳକୁ ଖସିଥିବା ଜଣାପଡ଼ିଛି। ଗତ ମେ’ ୧ରେ ଏହା ୧୯୮x୧୯୫୭ କିଲୋମିଟର ଅର୍ବିଟରେ ରହିଥିବା ଜଣେ ମହାକାଶ ବିଜ୍ଞାନୀ କହିଛନ୍ତି। ଶୁକ୍ର ଗ୍ରହରେ ଅବତରଣ କରିବାକୁ ଥିବା ୧,୧୮୦ କିଲୋଗ୍ରାମ ଓଜନର ଏହି ମହାକାଶ ଯାନ ସେଠାର ଘନ ବାୟୁମଣ୍ଡଳ ମଧ୍ୟରେ ପ୍ରବେଶ କରିବା ଲାଗି ଆବଶ୍ୟକ ଟେକ୍ନୋଲୋଜି ଓ ଉପାଦାନରେ ନିର୍ମାଣ କରାଯାଇଥିଲା। ତେଣୁ ପୃଥିବୀ ବାୟୁମଣ୍ଡଳରେ ପୁନଃପ୍ରବେଶ କଲେ ଏହାର ଲ୍ୟାଣ୍ଡର କ୍ଷତିଗ୍ରସ୍ତ ନ ହୋଇପାରେ ବୋଲି କୁହାଯାଉଛି। ଏହା ୫୨ ଡିଗ୍ରୀ ଉତ୍ତର ଏବଂ ୫୨ ଡିଗ୍ରୀ ଦକ୍ଷିଣ ଅକ୍ଷାଂଶ ମଧ୍ୟରେ ଖସିବା ସମ୍ଭାବନା ରହିଛି ଯାହା ମଧ୍ୟରେ ୟୁରୋପ, ଏସିଆ, ଆମେରିକାର କେତେକ ଅଞ୍ଚଳ ଏବଂ ସମ୍ପୂର୍ଣ୍ଣ ଆଫ୍ରିକା ଓ ଅଷ୍ଟ୍ରେଲିଆ ରହୁଛି।
