କୋଲକାତା, ୩ା୧ (ପି.ଟି.)-ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲିଙ୍କୁ ମୃଦୁ ହୃଦ୍ଘାତ ହୋଇଛି। ଶନିବାର ସକାଳେ ଜିମ୍ରୁ ଫେରିବା ପରେ ସେ ଛାତିରେ ଯନ୍ତ୍ରଣା ଅନୁଭବ କରିବାରୁ ତାଙ୍କୁ ସ୍ଥାନୀୟ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି। ୪୮ବର୍ଷୀୟ ଗାଙ୍ଗୁଲିଙ୍କୁ କ୍ରିଟିକାଲ କେୟାର ୟୁନିଟ୍(ସିସିୟୁ)ରେ ରଖାଯାଇ ଚିକିତ୍ସା କରାଯାଉଛି। କରୋନାରି ଆଞ୍ଜିଓଗ୍ରାମ୍ ପରେ ତାଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଥିବା ତାଙ୍କୁ ଚିକିତ୍ସା କରୁଥିବା ଡାକ୍ତରମାନେ ସୂଚନା ଦେଇଛନ୍ତି। ଦେଶର କ୍ରିକେଟ ମହଲ ଗାଙ୍ଗୁଲିଙ୍କ ଦ୍ରୁତ ଆରୋଗ୍ୟ କାମନା କରିଛି। ସେମାନଙ୍କ ମଧ୍ୟରେ ରହିଛନ୍ତି, ସଚିନ ତେନ୍ଦୁଲକର ଓ ବିରାଟ କୋହଲି। ଭାରତୀୟ ଅଧିନାୟକ ବିରାଟ କୋହଲି ଟୁଇଟ୍ କରି କହିଛନ୍ତି, ଗାଙ୍ଗୁଲିଙ୍କ ଦ୍ରୁତ ଆରୋଗ୍ୟ କାମନା କରି ସେ ଭଗବାନଙ୍କ ନିକଟରେ ପ୍ରାର୍ଥନା କରୁଛନ୍ତି। ଗାଙ୍ଗୁଲିଙ୍କ ଦୀର୍ଘଦିନର ଟିମ୍ମେଟ୍ ତେନ୍ଦୁଲକର କହିଛନ୍ତି ସେ ଏହି ଖବର ନିକଟରେ ଜାଣିବାକୁ ପାଇଛନ୍ତି। ବିସିସିଆଇ ସଭାପତି ଶୀଘ୍ର ସୁସ୍ଥ ହୋଇ ଘରକୁ ଫେରିବେ ବୋଲି ତାଙ୍କର ଦୃଢ଼ ବିଶ୍ୱାସ ରହିଛି। ବିସିସିଆଇ ସମ୍ପାଦକ ଜୟ ଶାହା କହିଛନ୍ତି, ଗାଙ୍ଗୁଲିଙ୍କ ସ୍ବାସ୍ଥ୍ୟାବସ୍ଥାରେ କ୍ରମେ ଉନ୍ନତି ପରିଲକ୍ଷିତ ହେଉଛି। ଏ ବିଷୟ ସେ ତାଙ୍କ ପରିବାରବର୍ଗଙ୍କଠାରୁ ଜାଣିବାକୁ ପାଇଛନ୍ତି। ଗାଙ୍ଗୁଲିଙ୍କ ପୂର୍ବତନ ଟିମ୍ମେଟ ଯଥା ବୀରେନ୍ଦ୍ର ସେହ୍ବାଗ, ହରଭଜନ ସିଂ, ଅନିଲ କୁମ୍ବଲେ ଓ ଗୌତମ ଗମ୍ଭୀର, ଟିମ୍ ଇଣ୍ଡିଆ କ୍ରିକେଟର ଶିଖର ଧାଓ୍ବନ ଓ ମହମ୍ମଦ ସାମି ପ୍ରମୁଖ ମଧ୍ୟ ଦ୍ରୁତ ଆରୋଗ୍ୟ କାମନା କରି ଭଗବାନଙ୍କ ନିକଟରେ ପ୍ରାର୍ଥନା କରିଛନ୍ତି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଗାଙ୍ଗୁଲିଙ୍କ ସ୍ବାସ୍ଥ୍ୟାବସ୍ଥାକୁ ନେଇ ଚିନ୍ତା ପ୍ରକଟ କରିଛନ୍ତି। ସୂଚନାଯୋଗ୍ୟ, ଗାଙ୍ଗୁଲି ୨୦୧୯ ଅକ୍ଟୋବରରେ ବିସିସିଆଇ ସଭାପତି ଭାବେ ଦାୟିତ୍ୱ ଗ୍ରହଣ କରିଥିଲେ। ତାଙ୍କ ତତ୍ତ୍ୱାବଧାନରେ ବିସିସିଆଇ କୋଭିଡ୍ ସମୟରେ ୟୁଏଇରେ ସଫଳତାର ସହ ୨୦୨୦ ଆଇପିଏଲ୍ ଆୟୋଜନ କରିପାରିଥିଲା। ପୁନଶ୍ଚ ଗାଙ୍ଗୁଲି ବିସିସିଆଇ ସଭାପତି ହେବା ପରେ ଭାରତ ନଭେମ୍ବରରେ ପ୍ରଥମ ପିଙ୍କ୍ ବଲ ଦିବାରାତ୍ର ଟେଷ୍ଟ ଆୟୋଜନ କରିପାରିଥିଲା।
