ମୁମ୍ବାଇ,୨୧ ।୨: ବଲିଉଡ ଗାୟକ ସୋନୁ ନିଗମ ଓ ତାଙ୍କ ବନ୍ଧୁ ରବ୍ୱାନି ମୁସ୍ତାଫା ଖାଁଙ୍କ ଉପରେ ଆକ୍ରମଣ ହୋଇଛି । ମୁମ୍ବାଇର ଚେମ୍ବୁର ଅଞ୍ଚଳରେ ଏକ ଶୋ’ ଚାଲୁଥିବା ସମୟରେ ଏହି ଆକ୍ରମଣ ହୋଇଛି । ଗାୟକ ସୋନୁ ନିଗମଙ୍କ ବନ୍ଧୁ ରବ୍ୱାନି ମୁସ୍ତାଫା ଖାଁ ଅଧିକ ଆହତ ହୋଇଛନ୍ତି । ତାଙ୍କୁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ସୋନୁ ମଧ୍ୟ ତାଙ୍କ ସହ ହସ୍ପିଟାଲ ଯାଇଥିଲେ । ଏହାପରେ ସେଠାରୁ ସୋନୁ ଯାଇ ପୋଲିସରେ ଲିଖିତ ଅଭିଯୋଗ କରିଛନ୍ତି ।
ଆହତ ହୋଇଥିବା ରବ୍ୱାନି ସ୍ୱର୍ଗତ ଓସ୍ତାଦ ଗୁଲାମ ମୁସ୍ତଫା ଖାଁଙ୍କ ପୁଅ ତଥା ସୋନୁଙ୍କ ଗୁରୁ । ରବ୍ୱାନି ଓ ସୋନୁ ଭଲ ବନ୍ଧୁ ବୋଲି କୁହାଯାଏ । ବିଶେଷ ସୂତ୍ରର ସୂଚନା ଅନୁଯାୟୀ, ଉଦ୍ଧବ ଠାକରେଙ୍କ ଗ୍ରୁପର ବିଧାୟକ ପ୍ରକାଶ ଫାଟେରପେକରଙ୍କ ପୁଅ ତାଙ୍କ ସାଥିଙ୍କ ସହ ମିଶି ସୋନୁ ନିଗମ ଓ ରବ୍ୱାନିଙ୍କ ଉପରେ ଆକ୍ରମଣ କରିଛନ୍ତି । ଆଉ ଏକ ସୂତ୍ରର ସୂଚନା ଅନୁଯାୟୀ, ସୋନୁଙ୍କୁ ଧକ୍କା ମରାଯାଇଥିବା ବେଳେ ସେ ସାମାନ୍ୟ ଆହତ ହୋଇଛନ୍ତି ।
ସୂଚନାଯୋଗ୍ୟ, ଗତ ୪ଦିନ ହେବ ସ୍ଥାନିୟ ବିଧାୟକ ପ୍ରକାଶ ଫାଟେରପେକରଙ୍କ ପକ୍ଷରୁ ‘ଚେମ୍ବୁର ଫେଷ୍ଟିଭାଲ’ ଚାଲିଥିଲା । ସୋମବାର ଏହାର ଶେଷ ଦିନ ଥିଲା । ଷ୍ଟେଜ ଉପରେ ଯେତେବେଳେ ସୋନୁ ପରଫର୍ମ କରୁଥିଲେ ସେତେବେଳେ ବିଧାୟକ ପ୍ରକାଶ ଫାଟେରପେକରଙ୍କ ପୁଅ ସୋନୁଙ୍କ ମ୍ୟାନେଜର ସହ ଦୁର୍ବବ୍ୟହାର କରିଥିଲେ ।
ପରଫରମାନ୍ସ ପରେ ଯେତେବେଳେ ସୋନୁ ତଳକୁ ଆସିଥିଲେ ସେତେବେଳେ ବିଧାୟକଙ୍କ ପୁଅ ତାଙ୍କ ସହ ସେଲ୍ଫି ନେବାକୁ ଚେଷ୍ଟା କରିଥିଲେ । ହେଲେ ସୋନୁଙ୍କ ବଡିଗାର୍ଡ ହାରି ତାଙ୍କୁ ସେଲ୍ଫି ନେବାକୁ ମନା କରିଥିଲେ । ଏତିକିରେ ବିଧାୟକଙ୍କ ପୁଅ ରାଗିଯାଇ ହାରିଙ୍କୁ ଧକ୍କା ମାରିଦେଇଥିଲେ, ଏତିକିବେଳେ ସେ ସୋନୁଙ୍କୁ ବି ଧକ୍କା ମାରିଥିଲେ । ହେଲେ ସେ ତଳେ ପଡିଯିବା ପୂର୍ବରୁ ହାରି ତାଙ୍କୁ ଧରି ନେଇଥିଲେ । ଆଉ ରାଗରେ ବିଧାୟକଙ୍କ ପୁଅ ସେଠାରେ ଥିବା ରବ୍ୱାନି ମୁସ୍ତଫା ଖାଁଙ୍କୁବି ଧକ୍କା ମାରିବାରୁ ସେ ଗୁରୁତର ଆହତ ହୋଇଛନ୍ତି ।
