ନୂଆଦିଲ୍ଲୀ, ୧୬।୭: ଜନ୍ତରମନ୍ତରଠାରେ ଅନଶନରେ ବସିଥିବା ବିଶିଷ୍ଟ ସମାଜସେବୀ ସୋନମ ଓ୍ୱାଙ୍ଗଚୁକଙ୍କ ବିଗୁଡ଼ୁଥିବା ସ୍ୱାସ୍ଥ୍ୟାବସ୍ଥାକୁ ନେଇ ଆସନ୍ତା ଗୁରୁବାର ଦିଲ୍ଲୀ ହାଇକୋର୍ଟ ଏକ ଜନସ୍ୱାର୍ଥ ମାମଲାର ଜରୁରୀ ଶୁଣାଣି କରିବେ ା ଏନ୍ଇଇଟି ପରୀକ୍ଷାର ଅନିୟମିତତା ବିରୋଧରେ କେନ୍ଦ୍ର ଶିକ୍ଷାମନ୍ତ୍ରୀଙ୍କ ଇସ୍ତଫା ଦାବିକରି ‘କକ୍ରୋଚ ଜନତା ପାର୍ଟି’ ପକ୍ଷରୁ ଚାଲିଥିବା ଆନ୍ଦୋଳନକୁ ସମର୍ଥନ ଜଣାଇ ସେ ଗତ ଜୁନ ୨୮ରୁ ଆମରଣ ଅନଶନରେ ଅଛନ୍ତି ା ଅନଶନ ଯୋଗୁ ପ୍ରାୟ ୮.୯ କେଜି ଓଜନ ହରାଇବା ସହ ବାରମ୍ୱାର ଲୋ ବ୍ଲଡ ସୁଗାର, ମୁଣ୍ଡ ବୁଲାଇବା ଏବଂ ଅତ୍ୟଧିକ ଶାରୀରିକ ଦୁର୍ୱଳତାର ଶିକାର ହୋଇଛନ୍ତି ା ସ୍ଥିତିକୁ ଦୃଷ୍ଟିରେ ରଖି ତାଙ୍କୁ ତୁରନ୍ତ ଜୀବନ ରକ୍ଷାକାରୀ ଔଷଧ ଯୋଗାଇବା ପାଇଁ ଦିଲ୍ଲୀ ହାଇକୋର୍ଟରେ ଏକ ଜନସ୍ୱାର୍ଥ ମାମଲା ରୁଜୁ ହୋଇଛି ା ଓକିଲମାନଙ୍କ କାର୍ଯ୍ୟବନ୍ଦ ଆନ୍ଦୋଳନ ଚାଲିଥିଲେ ହେଁ ମାମଲାର ଗମ୍ଭୀରତାକୁ ଦୃଷ୍ଟିରେ ରଖି ମୁଖ୍ୟ ବିଚାରପତି ଡି.କେ. ଉପାଧ୍ୟାୟ ଏବଂ ବିଚାରପତି ତେଜସ କାରିଆଙ୍କ ଖଣ୍ଡପୀଠ ଗୁରୁବାର ଏହାର ଶୁଣାଣି କରିବାକୁ ଦିନ ଧାର୍ଯ୍ୟ କରିଛନ୍ତି ଏବଂ ଏଥିସହ ଦିଲ୍ଲୀ ଓ କେନ୍ଦ୍ର ସରକାରଙ୍କୁ ନୋଟିସ୍ ଜାରି କରିଛନ୍ତି। ଆବେଦନକାରୀ ଆଡ୍ଭୋକେଟ ରାକେଶ କୁମାର ସୈନି କୋର୍ଟଙ୍କୁ ଜଣାଇଛନ୍ତ ଯେ, ସମଗ୍ର ଦେଶ ଆଗରେ ଜଣେ ସଚେତନ ନାଗରିକଙ୍କ ଜୀବନ ସଙ୍କଟରେ ପଡ଼ିବା ଦୁର୍ଭାଗ୍ୟଜନକ। ଏହି ଆବେଦନ ଜରିଆରେ ସେ ସୋନମ୍ ଓ୍ୱାଙ୍ଗଚୁକଙ୍କୁ ତୁରନ୍ତ ଜୀବନ ରକ୍ଷାକାରୀ ଜରୁରୀ ଚିକିତ୍ସା ଯୋଗାଇବା, ଆବଶ୍ୟକ ସ୍ଥଳେ ଜବରଦସ୍ତି ଖାଦ୍ୟ ଦେବା ଏବଂ ସରକାର ତୁରନ୍ତ ତାଙ୍କ ସହ ଆଲୋଚନା କରି ଏହି ସମସ୍ୟାର ସମାଧାନ କରିବାକୁ ଦାବି କରିଛନ୍ତି ା
ଏନ୍ଇଇଟି ଏବଂ ଅନ୍ୟାନ୍ୟ ପରୀକ୍ଷା ବ୍ୟବସ୍ଥାରେ ଅନିୟମିତତା ପାଇଁ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିରେ ଆକ୍ଟିଭିଷ୍ଟ ସୋନମ୍ ଓ୍ୱାଙ୍ଗ୍ଚୁକ୍ ଦିଲ୍ଲୀର ଯନ୍ତରମନ୍ତରରେ ଚଳାଇଥିବା ଅନଶନ ବୁଧବାର ୧୮ ଦିନ ପୂରଣ କରିଥିବାବେଳେ ସରକାର ତାଙ୍କୁ ଅଣଦେଖା କରିବା ଓ ବିକ୍ଷୋଭକାରୀଙ୍କ ସହ ଆଲୋଚନା କରିବାକୁ ମନା କରିଦେବା ନିଷ୍ଠୁରତା ବୋଲି କକ୍ରୋଚ ଜନତା ପାର୍ଟି (ସିଜେପି) ନେତା ଅଭିଜିତ୍ ଦୀପ୍କେ ଅଭିଯୋଗ କରିଛନ୍ତି। ଏନ୍ଇଇଟି-ୟୁଜି ପରୀକ୍ଷା ଅନିୟମିତତା ବିରୋଧରେ ଯନ୍ତରମନ୍ତରରେ ସିଜେପିର ବିକ୍ଷୋଭ ବୁଧବାର ୨୬ତମ ଦିନରେ ପହଞ୍ଚତ୍ଛି। ପରୀକ୍ଷା ଅନିୟମିତତାକୁ ନେଇ ଆତ୍ମହତ୍ୟା କରିଥିବା ଛାତ୍ରୀଛାତ୍ରଙ୍କୁ ନ୍ୟାୟ ଦାବିରେ ଜୀବନକୁ ବାଜି ଲଗାଇଥିବା ଓ୍ୱାଙ୍ଗ୍ଚୁକ୍ଙ୍କ ପାଇଁ ସରକାର ଏପର୍ଯ୍ୟନ୍ତ ମୁହଁ ଖୋଲୁନାହାନ୍ତି। ସରକାର କେବଳ ଉତ୍ତରଦାୟୀ ନୁହନ୍ତି, ନିର୍ଦ୍ଦୟ ମଧ୍ୟ ବୋଲି ଦୀପ୍କେ xରେ ଲେଖିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କ’ଣ ପାଇଁ ଆଲୋଚନା କରିବାକୁ ମନା କରୁଛନ୍ତି ଏବଂ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ କାହିଁକି ଏପର୍ଯ୍ୟନ୍ତ ନିଜକୁ ଉତ୍ତରଦାୟୀ କରୁନାହାନ୍ତି ପ୍ରଶ୍ନର ଉତ୍ତର ମିଳିବା ଆବଶ୍ୟକ ବୋଲି ଦୀପ୍କେ କହିଛନ୍ତି।
