ହୀମାଚଳ ପ୍ରଦେଶସ୍ଥିତ ଏକ ଆକର୍ଷଣୀୟ ସହର ହେଉଛି ସୋଲନ୍। ପର୍ଯ୍ୟଟନ ଦୃଷ୍ଟି କୋଣରୁ ବି ଏହା ବେଶ୍ ସମୃଦ୍ଧ। କାରଣ ପର୍ଯ୍ୟଟକଙ୍କ ଦେଖିବା ନିମନ୍ତେ ଏଠାରେ ରହିଛି ଅନେକ ଆଧ୍ୟାତ୍ମିକ ପୀଠ ସମେତ ବହୁ ମନୋରମ
ଦର୍ଶନୀୟ ସ୍ଥାନ…
ସୋଲନ୍ ହେଉଛି ହୀମାଚଳ ପ୍ରଦେଶସ୍ଥିତ ଏକ ଆକର୍ଷଣୀୟ ତଥା ମନୋରମ ସହର। ଏଠାରେ ରହିଛି ଏକାଧିକ ସୌନ୍ଦର୍ଯ୍ୟପୂର୍ଣ୍ଣ ପର୍ଯ୍ୟଟନସ୍ଥଳୀ। ଖାସ୍କରି ଏଠାରେ ଦେଖିବାକୁ ମିଳୁଥିବା ସବୁଜ ବନାନୀ ଘେରା ଉଚ୍ଚଉଚ୍ଚ ପାହାଡର ଅପୂର୍ବ ପ୍ରାକୃତିକ ଦୃଶ୍ୟ ତଥା ଆଧ୍ୟାତ୍ମିକ ପୀଠର ସୌନ୍ଦର୍ଯ୍ୟ ବେଶ୍ ମନଛୁଆଁ ହୋଇଥାଏ। କେବଳ ପର୍ଯ୍ୟଟନ ଦୃଷ୍ଟି କୋଣରୁ ନୁହେଁ ଏଠାକାର ସଂସ୍କୃତି ଓ କଳା ମଧ୍ୟ ବେଶ୍ ସମୃଦ୍ଧ ଆଉ ହୃଦୟସ୍ପର୍ଶୀ। ସେଥିପାଇଁ ବର୍ଷକ ବାରମାସ ଏଠାରେ ପର୍ଯ୍ୟଟକଙ୍କର ବେଶ୍ ଗହଳି ପରିଲକ୍ଷିତ ହୋଇଥାଏ।
କ’ଣ ଦେଖିବେ
ଏଠାରେ ପର୍ଯ୍ୟଟକ ମା’ ଶୋଲିନି ଦେବୀଙ୍କ ମନ୍ଦିର, ଜାଟୋଲି ମନ୍ଦିର, ବଡ଼ି କି ଧାର୍, ଚେଲ୍, କସୌଲି, ମୋହନ୍ ପାର୍କ, ସୋଲନ ବାଇପାସ୍, ସିଲି ଅଭୟାରଣ୍ୟ, ଅମରାବତୀ ହିଲ୍, ହିଷ୍ଟୋରିକାଲ୍ ଥୋଡ଼ୋ ଗ୍ରାଉଣ୍ଡ, କୁନିହାର୍ ଭାଲେ, ନଉନି ଦୁର୍ଗ ଇତ୍ୟାଦି ପର୍ଯ୍ୟଟନସ୍ଥଳୀ ଦେଖିବାକୁ ପାଇବେ। କେବଳ ସେତିକି ନୁହେଁ, ସୋଲନ୍ରେ ହେଉଥିବା ଶୋଲିନି ମହୋତ୍ସବ ବି ପର୍ଯ୍ୟଟକଙ୍କୁ ଖୁବ୍ ଆକର୍ଷିତ କରିଥାଏ। ଆକର୍ଷଣୀୟ ପ୍ରାକୃତିକ ସୌନ୍ଦର୍ଯ୍ୟରେ ଭରା ସୋଲନ୍ର ଏହିସବୁ ପର୍ଯ୍ୟଟନସ୍ଥଳୀଗୁଡ଼ିକ ଯେତିକି ମନୋରମ ହୋଇଥାଏ ସେତିକି ଆଶ୍ଚର୍ଯ୍ୟକର ବି ଲାଗିଥାଏ।
ଅନ୍ୟାନ୍ୟ ଆକର୍ଷଣ
ପର୍ଯ୍ୟଟକ ଏଠାରେ କେବଳ ପର୍ଯ୍ୟଟନସ୍ଥଳୀ ବୁଲି ଦେଖିବେ ତାହା ନୁହେଁ, ଏଠାରେ ଟ୍ରେକିଂ, ମାଉଣ୍ଟେନିଂର ଭରପୂର ମଜା ମଧ୍ୟ ନେଇପାରିବେ।
ଅର୍ଥନୀତି
ଏହି ସହରର ଅର୍ଥନୀତି ମୁଖ୍ୟତଃ ଟମାଟୋ, ପ୍ଲମ୍, ଆପ୍ରିକଟ୍, କିଓ୍ବି ଏବଂ ସେଓ ଉତ୍ପାଦନ ଉପରେ ନିର୍ଭର କରିଥାଏ। ତା’ଛଡ଼ା ଏଠାରେ ଛତୁ ଚାଷ ବହୁତ ଭଲ ହୋଇଥାଏ ବୋଲି ବି ସୂଚନା ରହିଛି। ଚାଷବାସ ବ୍ୟତିତ ପର୍ଯ୍ୟଟନରୁ ବି ଏଠାକାର ବାସିନ୍ଦା ବେଶ୍ ଦୁଇ ପଇସା ଲାଭ କରିଥାନ୍ତି।
କଳା ଓ ସଂସ୍କୃତିରେ ସର୍ବୋତ୍ତମ
ଏଠାକାର କଳା ଓ ସଂସ୍କୃତି ବେଶ୍ ସମୃଦ୍ଧ। ସ୍ଥାନୀୟ ଅଞ୍ଚଳର ପାରମ୍ପରିକ ନୃତ୍ୟ ଓ ଗୀତ ବେଶ୍ ମନଛୁଆଁ ହୋଇଥାଏ। ଅତିଥି ଚର୍ଚ୍ଚାରେ ବି ବେଶ୍ ମାହିର ଏଠାକାର ବାସିନ୍ଦା।
ଇକୋ-ଟୁରିଜିମ୍ରେ ବି ନାଁ ରହିଛି
ଇକୋ-ଟୁରିଜିମ୍ କ୍ଷେତ୍ରରେ ବି ସୋଲନ୍ର ରହିଛି ବେଶ୍ ନାଁ ଆଉ ଖ୍ୟାତି। ପାହାଡ, ପର୍ବତ ଘେରା ଏହି ଅଞ୍ଚଳର ଲୋକମାନେ ପରିଷ୍କାର, ପରିଚ୍ଛନ୍ନତା ଉପରେ ବିଶେଷ ଧ୍ୟାନ ଦେଇଥାନ୍ତି ବୋଲି ବି ସୂଚନା ରହିଛି।
କେବେ ଓ କେମିତି ଯିବେ
ସୋଲନ୍ର ପାଣିପାଗ ବର୍ଷସାରା ବେଶ୍ ଅନୁକୂଳ ରହିଥାଏ। ଏଠାରେ ନା ବେଶୀ ଗରମ ହୁଏ ନା ବେଶୀ ଶୀତ। ସେଥିପାଇଁ ଏଠାକୁ ବର୍ଷସାରା ପର୍ଯ୍ୟଟକ ବୁଲି ଆସିଥାନ୍ତି। ହେଲେ, ସ୍ଥାନୀୟ ପାଣିପାଗ ସୂଚନାକେନ୍ଦ୍ରର ମତାନୁଯାୟୀ, ଖରାଦିନେ ଏଠାକୁ ବୁଲିଯିବା ସର୍ବୋତ୍ତମ ହୋଇଥାଏ। ସେହିପରି ଏଠାକୁ ଯିବା ସକାଶେ ଗମନାଗମନର ବି ଭଲ ବ୍ୟବସ୍ଥା ରହିଛି। ବସ୍, ଟ୍ରେନ୍ ହେଉ ଅବା ବିମାନ ଯୋଗେ ବି ଏଠାକୁ ଯାଇହେବ। ପର୍ଯ୍ୟଟକ ଚାହିଁଲେ ନିଜସ୍ବ ଗାଡିରେ ମଧ୍ୟ ଆରାମରେ ଯାଇ ଏଠାରେ ପହଁଞ୍ଚତ୍ପାରିବେ।
