ଦାରିଙ୍ଗବାଡି, ୮ /୧ (ଅରୁଣ ସାହୁ): ଓଡ଼ିଶାର କଶ୍ମୀର କୁହାଯାଉଥିବା ଦାରିଙ୍ଗବାଡିରେ ପୁଣି ଶୀତ ଲେଉଟିଛି । ଗତ ୨ ଦିନ ହେଲା ଦାରିଙ୍ଗବାଡି ସମେତ ସିମନବାଡି, ଶ୍ରାନିକେତା, ସିଆଙ୍ଗବାଲି, ଦାସିଙ୍ଗବାଡି, ସୋନପୁର, ସିର୍କାବର୍ଗ, ଦନେକବାଡି, କିରିକୁଟି, ବାଡାବାଙ୍ଗା ଆଦି ଅଞ୍ଚକରେ ଅସହ୍ୟ ଜାଡ଼ ଅନୁଭୂତ ହୋଇଛି । ଏପରିକି ସିମନବାଡି, ଦାରିଙ୍ଗବାଡିରେ ରହିଥିବା ଚାଷ ଜମି ପାଳ ଗଦା ଉପରେ ତୁଷାରପାତ ହୋଇଥିବା ଦେଖିବାକୁ ମିଳୁଛି । ଅସହ୍ୟ ଜାଡ଼ ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇପଡିଛି। ତାପମାତ୍ରା ୭ ଡିଗ୍ରୀ ତଳେ ରହିଥିବା କୁହାଯାଇଛି । ବିଭିନ୍ନ ସ୍ଥାନରେ ଅପରାହ୍ନ ଠାରୁ ଏହି ଶୀତ ଆରମ୍ଭ ହୋଇ ପରଦିନ ସକାଳ ୧୦ଟା ପର୍ଯ୍ୟନ୍ତ ଜାଡ଼ ଅନୁଭୂତ ହେଉଛି । ପାଣିରେ ହାତ ଦେଇ ହେଉନଥିବା ଲୋକ ପ୍ରତିକ୍ରିୟା ରଖିଛନ୍ତି । ସନ୍ଧ୍ୟା ହେଲେ ନିଆଁର ସହାୟତା ନେବାକୁ ପଡୁଛି। ଗରୀବ ରେଖା ତଳେ ରହିଥିବା ଲୋକଙ୍କ ପାଇଁ ଶୀତ କଷ୍ଟ ଆଣିଥିବା ବେଳେ ପର୍ଯ୍ୟଟକ ଏହି ଶୀତର ମଜା ନେଉଛନ୍ତି। ସେହିପରି ଶୀତକୁ ନେଇ ଶୀତ ମହୋତ୍ସବ ଅନୁଷ୍ଠିତ ହେଉଥିବା ବେଳେ ଆଜି ସନ୍ଧ୍ୟା ଠାରୁ ଏହାର ଶୁଭାରମ୍ଭ ହେବ। ପର୍ଯ୍ୟଟକ ଓ ଜିଲା ଓ ଜିଲ୍ଲା ବାହାରୁ ଆସୁଥିବା ପର୍ଯ୍ୟଟକ, ଦର୍ଶକ ହଜାର ସଂଖ୍ୟାରେ ମହୋତ୍ସବରେ ଯୋଗଦାନ କରିବା ପାଇଁ ସମସ୍ତ ବ୍ୟବସ୍ଥା କରାଯାଇଛି । ସୂଚନା ଯୋଗ୍ୟ ଯେ, ପ୍ରତିବର୍ଷ ଏହି ସମୟରେ ଗୋଟିଏ ସପ୍ତାହ ଧରି ପ୍ରବଳ ଶୀତ ସହ ତୁଷାରପାତ ହେଉଥିବା ନଜିର ରହିଛି।
