ଭୁବନେଶ୍ୱର,୧୮।୨(ବ୍ୟୁରୋ): ତଳସ୍ତରର କାରିଗରଙ୍କ ଦକ୍ଷତା ଓ କଳାକୁ ସମସ୍ତେ ଚିହ୍ନିବେ। ସେମାନଙ୍କୁ ଉଚିତ୍ ପ୍ରାପ୍ୟ ମିଳିବ। ଓଡ଼ିଶାର ସଂସ୍କୃତି ସହ କାରିଗରି ବିଶ୍ୱସ୍ତରରେ ପହଞ୍ଚତ୍ବ ବୋଲି ଶୁକ୍ରବାର ସ୍ଥାନୀୟ ବୁଦ୍ଧ ମନ୍ଦିରଠାରେ ବ୍ରାଣ୍ଡ୍ ‘ସ୍ନେହା ସମ୍ପୂର୍ଣ୍ଣା’ର ପ୍ରଥମ ମହିଳା ହସ୍ତତନ୍ତ ପ୍ରଦର୍ଶନୀରେ ମୁଖ୍ୟ ଅତିଥି ଭାବେ ଯୋଗଦେଇ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ଅତନୁ ସବ୍ୟସାଚୀ ନାୟକ କହିଛନ୍ତି। ସେ କହିଛନ୍ତି, ଏହାକୁ ଆରମ୍ଭ କରିଥିବା ୩ ମହିଳା ତ୍ରିଶକ୍ତି ହୋଇ କାରିଗରମାନଙ୍କୁ ଆଗକୁ ବଢ଼ିବାରେ ସାହାଯ୍ୟ କରନ୍ତୁ। ସମ୍ମାନିିତ ଅତିଥି ଭାବେ ଭୁବନେଶ୍ୱର ମେୟର ସୁଲୋଚନା ଦାସ ଯୋଗଦେଇ କହିଛନ୍ତି, ହସ୍ତଶିଳ୍ପ ଓ ହସ୍ତକଳାର ଆଦର ଦିନକୁ ଦିନ ବଢ଼ୁଛି। କାରିଗରଙ୍କ ହାତତିଆରି ଶାଢ଼ି ଜାତୀୟ ତଥା ଅନ୍ତର୍ଜାତୀୟସ୍ତରରେ ମଧ୍ୟ ପ୍ରଶଂସିତ ହେଉଛି। କିନ୍ତୁ କାରିଗରମାନେ ଏହାର ଉଚିତ୍ ମୂଲ୍ୟ ପାଇପାରୁନାହାନ୍ତି। ବ୍ୟବସାୟ କରୁଥିବା ଲୋକ ଏହାର ଫାଇଦା ଉଠାଉଛନ୍ତି। ମହିଳାଙ୍କ ଦ୍ୱାରା ଆରମ୍ଭ ହୋଇଥିବା ‘ସ୍ନେହା ସମ୍ପୂର୍ଣ୍ଣା’ ମହିଳାଙ୍କ ଉନ୍ନତିରେ ସହାୟକ ହେଉ ବୋଲି ଆଶାବ୍ୟକ୍ତ କରିଥିଲେ। ମହିଳାଙ୍କ ଆତ୍ମବିଶ୍ୱାସ, ଦକ୍ଷତା ବୃଦ୍ଧି ସହ ଭଲ ଶାଢ଼ିଟିଏ ପାଇଁ ଆଉ ଦୂରକୁ ଯିବାକୁ ପଡ଼ିବ ନାହିଁ ବୋଲି ବିଶିଷ୍ଟ ଅତିଥି ଭାବେ ଯୋଗଦେଇ ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ, ମିଶନ ଶକ୍ତି ପରାମର୍ଶଦାତା ଲୋପାମୁଦ୍ରା ବକ୍ସିପାତ୍ର ଓ ସମାଜସେବୀ ନମ୍ରତା ଚଢ଼ା କହିଥିଲେ। ଏହି ଅବସରରେ ଅତିଥିମାନେ ଅନ୍ଲାଇନରେ ‘ସ୍ନେହା ସମ୍ପୂର୍ଣ୍ଣା’ ୱେବ୍ସାଇଟ୍ ଓ ପ୍ରଦର୍ଶନୀର ଉଦ୍ଘାଟନ କରିଥିଲେ। ଏହି ପ୍ରଦର୍ଶନୀରେ ଖଣ୍ଡୁଆ ପାଟ, ବାଗଲପୁରୀ, ମତ୍ସ୍ୟ, ଓଲଟା ଶୁଆ ଆଦି ବିଭିନ୍ନ ଶାଢ଼ି ଦେଖିବାକୁ ମିଳୁଛି। ୨୨୦୦ରୁ ୫୦ ହଜାର ଟଙ୍କା ପର୍ଯ୍ୟନ୍ତ ଶାଢ଼ି ଉପଲବ୍ଧ ରହିଛି।
ତଥା ସ୍ତମ୍ଭକାର ପ୍ରୀତିଛନ୍ଦା ଧଳ, କବି ବନ୍ଦନା ପଣ୍ଡା ଓ ସମାଜସେବୀ ସଂଘମିତ୍ରା ପାଢ଼ୀଙ୍କ ମିଳିତ ଉଦ୍ୟମରେ ଏହି ବ୍ରାଣ୍ଡ୍ ଆରମ୍ଭ ହୋଇଛି। ୨୨ ମହିଳା କାରିଗରଙ୍କ ହାତର ନିଖୁଣ କାରିଗରିରେ ‘ସ୍ନେହା ସମ୍ପୂର୍ଣ୍ଣା’ ପରିଚୟ ପାଇଥିବା ସମାଜସେବୀ ଧଳ କହିଥିଲେ। କାର୍ଯ୍ୟକ୍ରମକୁ ସୁପ୍ରିୟା ପଣ୍ଡା ସଂଯୋଜନା କରିଥିଲେ। ଏହା ପରେ ପ୍ରୀତିଜ୍ୟୋତ୍ସ୍ନା ଦେଓଙ୍କ ସଂଯୋଜନାରେ ଏକ ଟକ୍ ଶୋ ‘ସୂତାର କାରିଗରି ସୁନାର ଓଡ଼ିଶା’ ଆରମ୍ଭ ହୋଇଥିଲା। ଏଥିରେ ଓଡ଼ିଶୀ ନୃତ୍ୟଶିଳ୍ପୀ ସୁଜାତା ମହାପାତ୍ର, ଲେଖିକା ପ୍ରୀତି ରାୟ, ସମାଜସେବୀ ସ୍ନେହା ମିଶ୍ର, ସମାଜସେବୀ ମୀରା ପରିଡ଼ା ଓ ସମାଜସେବୀ ଧଳ ନିଜ ମତ ରଖିଥିଲେ।
