ନୂଆଦିଲ୍ଲୀ,୧୦।୧୨ : ଶିଶୁମାନଙ୍କ ପ୍ରତି ଯୌନ ଅପରାଧକୁ ନେଇ ସୁପ୍ରିମକୋର୍ଟ ପୂର୍ବରୁ ଚିନ୍ତା ପ୍ରକଟ କରିଛନ୍ତି। ଏଥି ସହିତ ମହିଳା ଏବଂ ଶିଶୁ ବିକାଶ ମନ୍ତ୍ରୀ ସ୍ମୃତି ଇରାନୀ କହିଛନ୍ତି ଯେ ଯୌନ ଅପରାଧରୁ ଶିଶୁଙ୍କ ସୁରକ୍ଷା ମାମଲାର ସମାଧାନ ପାଇଁ ହାରାହାରି ସମୟ ୫୦୯ ଦିନ ସମୟ ଲାଗୁଛି। ଏହା ସହିତ ସେ କହିଛନ୍ତି ଯେ ପିଲାମାନଙ୍କ ବିରୋଧରେ ଅପରାଧର ସମାଧାନ ପାଇଁ ବିଚାରପତିଙ୍କଠାରୁ ପରାମର୍ଶ ନିଆଯାଇଛି ଯାହାଦ୍ୱାରା ମାମଲାଗୁଡ଼ିକର ଶୀଘ୍ର ସମାଧାନ ପାଇଁ ଏକ ଫ୍ରେମଓ୍ବାର୍କ ଗଟନ କରାଯାଇ ପାରିବ।
ଶନିବାର ଯୌନ ଅପରାଧରୁ ଶିଶୁମାନଙ୍କର ସୁରକ୍ଷା ଉପରେ ଜାତୀୟ ହିତାଧିକାରୀ ପରାମର୍ଶର ଏକ କାର୍ଯ୍ୟକ୍ରମକୁ ସମ୍ବୋଧିତ କରି ସ୍ମୃତି ଇରାନୀ କହିଛନ୍ତି ଯେ ପୋକ୍ସୋ ମାମଲାର ୫୬ ପ୍ରତିଶତ ଯୌନ ନିର୍ଯାତନା ଅପରାଧ ସହ ଜଡିତ। ପିଲାମାନଙ୍କୁ ଯୌନ ନିର୍ଯାତନା, ଯୌନ ଉତ୍ପୀଡ଼ନ ଏବଂ ଅଶ୍ଳୀଳତା ଅପରାଧରୁ ରକ୍ଷା କରିବା ପାଇଁ ପୋକ୍ସୋ ଆକ୍ଟ ୨୦୧୨ ଲକ୍ଷ୍ୟ ରଖିଛି ଏବଂ ଏହିପରି ଅପରାଧର ବିଚାର ପାଇଁ ସ୍ବତନ୍ତ୍ର କୋର୍ଟ ଗଠନ ପାଇଁ ବ୍ୟବସ୍ଥା କରାଯାଇଛି।
ସେ ଏହା ମଧ୍ୟ କହିଛନ୍ତି ଯେ ମାନ୍ୟବର ବିଚାରପତିମାନଙ୍କୁ ମୋର ଅନୁରୋଧ ଆପଣ ଦୟାକରି ଆମକୁ ଢାଞ୍ଚାଗତ ଭାବରେ କୁହନ୍ତୁ ମନ୍ତ୍ରଣାଳୟ ଦ୍ୱାରା ଆଉ କ’ଣ କରାଯାଇପାରିବ ଯାହା ଦ୍ୱାରା ଆମେ ଆମ ଦେଶର ନ୍ୟାୟ ବ୍ୟବସ୍ଥା ସହ ସହଭାଗିତା ସୁନିଶ୍ଚିତ କରିପାରିବା ଯାହା ଆମ ପିଲାମାନଙ୍କର ବିଚାରକୁ ତ୍ୱରାନୱିତ କରିପାରିବ।
