ମାଲକାନଗିରି,୨୫ା୧୨(ଦୁର୍ଯ୍ୟୋଧନ ପାତ୍ର): ମାଲକାନଗିରି ଜିଲା ସଦରରେ ଥିବା ସ୍ମାର୍ଟ ପଏଣ୍ଟ ଦୋକାନ ନିର୍ଦ୍ଧାରିତ ଦରଠାରୁ ଅଧିକ ନେଇ ଠକୁଥିବା ଅଭିଯୋଗ ଆଣିଲେ ଜଣେ ଗ୍ରାହକ।
ସୂଚନା ଅନୁଯାୟୀ, ଜିଲା ସଦର ମହକୁମା ସୁକୁମା ବାଇପାସ୍ ଛକ ନିକଟରେ ରିଲିଆନ୍ସ ସ୍ମାର୍ଟ ପଏଣ୍ଟ ନାମକ ଦୋକାନ ଥିବାବେଳେ ଏଠାରେ ପ୍ରତିିଦିନ ଗ୍ରାହକ ବିଭିନ୍ନ ସାମଗ୍ରୀ କିଣିଥାନ୍ତି। ତେବେ ଏହି ଗୋଟିଏ ସ୍ଥାନରେ ଅନେକ ସାମଗ୍ରୀ ଉପଲବ୍ଧ ଥିବାରୁ ଅଧିକରୁ ଅଧିକ ଗ୍ରାହକ ଏଠାକୁ ଯାଉଥିବା ବେଳେ କୋରୁକୋଣ୍ଡା ବ୍ଲକର ହିମାଂଶୁ ଭୂଷଣ ଜେଠୀ ଏହି ଦୋକାନରୁ ବିଭିନ୍ନ ସାମଗ୍ରୀ କିଣିଥିଲେ। ତେବେ ଜେଠୀ ସାମଗ୍ରୀ କିଣି ଅର୍ଥ ମଧ୍ୟ ଦେଇଥିଲେ। କିନ୍ତୁ ଘରକୁ ଆସି ଜେଠୀ ରସିଦ ଯାଞ୍ଚ କରିବା ବେଳେ ସେ କିଣିଥିବା ଏକ ସାମଗ୍ରୀରେ ତାଙ୍କଠାରୁ ଅଧିକ ଦର ନେଇଥିବା ରସିଦରେ ଦେଖିବାକୁ ପାଇଥିଲେ। ଯେଉଁଥିରେ ଉକ୍ତ ସାମଗ୍ରୀରେ ଲେଖା ରହିଥିବା ଦରଠାରୁ ଅଧିକ ନେଇଥିବା ସେ ଜାଣିବା ପରେ ଏନେଇ ସେ ଖାଉଟି ଅଦାଲତର ଦ୍ୱାରସ୍ଥ ହେବାକୁ ନିଷ୍ପତି ନେଇଥିବା କହିିଛନ୍ତି। ତେବେ ଜେଠୀ ସେଠାରୁ ଏକ ଲୁଣ ପ୍ୟାକେଟ କିଣିଥିବା ବେଳେ ଏହାର ଦର ୨୫ ଟଙ୍କା ଲେଖା ଥିଲା, ଯାହାକୁ ଉକ୍ତ ସ୍ମାର୍ଟ ପଏଣ୍ଟର କର୍ମଚାରୀ ୨୬ଟଙ୍କା ୪୬ ପଇସା ବିଲ କରି ତାଙ୍କଠାରୁ ନେଇଥିଲେ। ଏନେଇ ସ୍ମାର୍ଟ ପଏଣ୍ଟର ଉକ୍ତ କର୍ମଚାରୀଙ୍କୁ ପଚାରିବାରୁ ସେ କହିଛନ୍ତି, ଏହା ଭୁଲ ବଶତଃ ହୋଇଯାଇଛି। ଗ୍ରାହକ ଆସିଲେ ତାଙ୍କ ଠାରୁ ନେଇଥିବା ଅଧିକ ଅର୍ଥ ଆମେ ଫେରେଇ ଦେବୁ ବୋଲି ସେ ପ୍ରକାଶ କରିଛନ୍ତି ।
