ଭୁବନେଶ୍ୱର,୬।୧୧(ବ୍ୟୁରୋ): ସ୍ମାର୍ଟସିଟି ଭୁବନେଶ୍ୱରକୁ ଏକ ମଡେଲ ସିଟିରେ ପରିଣତ କରିବା ପାଇଁ ଭୁବନେଶ୍ୱର ମହାନଗର ନିଗମ(ବିଏମ୍ସି) ପକ୍ଷରୁ ବିଭିନ୍ନ ଯୋଜନା ଆରମ୍ଭ କରାଯାଉଛି। ତେବେ ଅଧିକାଂଶ ଯୋଜନା କାର୍ଯ୍ୟକାରୀ ହେବାର କେଇଟା ଦିନରେ ବାଟବଣା ହୋଇଯାଉଛି। ସହର ରାସ୍ତାକୁ ବୁଲା ଗୋରୁମୁକ୍ତ କରିବାକୁ ବିଏମ୍ସି ପଦକ୍ଷେପ ନେଉଥିବା କହୁଛି। ହେଲେ ନିୟମିତ ବୁଲା ଗୋରୁଙ୍କୁ ଉଦ୍ଧାର କରି କାଞ୍ଜିଆହୁଦା ଓ ଗୋଶାଳାରେ ରଖିବା ପ୍ରକ୍ରିୟା ଶିଥିଳ ହୋଇପଡ଼ିଥିବାରୁ ରାଜଧାନୀରେ ଏମାନଙ୍କ ସଂଖ୍ୟା ଦିନକୁ ଦିନ ବଢ଼ିବାରେ ଲାଗିଛି। ସହରରେ ହଜାର ହଜାର ସଂଖ୍ୟାରେ ଗୋରୁ ବିଚରଣ କରୁଥିବାବେଳେ ମାତ୍ର ଗୋଟିଏ ଗୋଶାଳା ଖୋଲି ହାତବାନ୍ଧି ବସିଛି ବିଏମ୍ସି। ଦ୍ୱିତୀୟ ଗୋଶାଳା ପାଇଁ ଯୋଜନା କରାଯାଉଥିବା ବାରମ୍ବାର ସୂଚନା ଦିଆଯାଉଥିଲେ ମଧ୍ୟ ଏଯାଏ ସ୍ଥାନ ଚିହ୍ନଟ ନ ହେବା ପ୍ରଶ୍ନବାଚୀ ସୃଷ୍ଟି କରୁଛି। ଫଳରେ ବୁଲା ଗୋରୁ ଓ ଷଣ୍ଢ ରାସ୍ତାରେ ବିଚରଣ କରିବା ସହ ଶୋଇ ରହି ଟ୍ରାଫିକ୍ ସମସ୍ୟା ସୃଷ୍ଟି କରୁଛନ୍ତି। ଏଥିସହ ଦୁର୍ଘଟଣାର କାରଣ ସାଜୁଛନ୍ତି। ଦିନଠାରୁ ରାତିର ସ୍ଥିତିକୁ ଦେଖିଲେ ସତେଯେମିତି ସ୍ମାର୍ଟସିଟି ରାସ୍ତା ଗୋରୁଗୋଠ ପାଲଟିଥିବା ପରି ମନେ ହେଉଛି। ବିଶେଷକରି ନୟାପଲ୍ଲୀ, ଏକ ନମ୍ବର ହାଟ, ନନ୍ଦନକାନନ ରାସ୍ତା, ରସୁଲଗଡ଼, ପୁରୁଣା ଭୁବନେଶ୍ୱର ସମେତ ବିଭିନ୍ନ ହାଟ ଅଞ୍ଚଳରେ ଗୋରୁପଲ ଦେଖିବାକୁ ମିଳୁଛି। ନିକଟ ହାଟବଜାରରୁ ପରିବାପତ୍ର ଓ ହୋଟେଲର ବଳକା ଖାଦ୍ୟ ଖାଇବାକୁ ଭିଡ଼ ଲଗାଉଛନ୍ତି। ସେହିଭଳି ବିଏମ୍ସି ଅଳିଆ ଗଦାରୁ ଖାଦ୍ୟ ସଂଗ୍ରହବେଳେ ଅଳିଆକୁ ଚାରିଆଡେ ଖେଳାଇ ପକାଉନ୍ତି। ବୁଲି ବୁଲି ଖାଇବା ସହ ଏକାଠି ହୋଇ ରାସ୍ତା ଉପରେ ଶୋଇ ରହୁଛନ୍ତି। ଏଥିସହ ପଲିଥିନ ଓ ଅଖାଦ୍ୟ ଖାଇ ରୋଗଗ୍ରସ୍ତ ହୋଇପଡ଼ୁଛନ୍ତି ଏହି ନିରୀହ ପ୍ରାଣୀ। ଚିକିତ୍ସା ଅଭାବରୁ ଅନେକ ସମୟରେ ସେମାନଙ୍କର ମୃତ୍ୟୁ ହେଉଥିବା ମଧ୍ୟ ନଜିର ରହିଛି। ଏହାକୁ ନେଇ ପଶୁପ୍ରେମୀଙ୍କ ମଧ୍ୟରେ ଉଦ୍ବେଗ ପ୍ରକାଶ ପାଉଛି।
ଖାରବେଳନଗରରେ ବିଏମ୍ସି ପକ୍ଷରୁ ଏକ କାଞ୍ଜିଆହୁଦା ରହିଛି। କର୍ମଚାରୀ ନିଯୁକ୍ତି ପାଇଛନ୍ତି ଓ ପରିଚାଳନା ବାବଦକୁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ ହେଉଛି। ପୂର୍ବରୁ ବୁଲା ଗୋରୁଙ୍କୁ କାବୁ କରି ଏଠାରେ ରଖାଯାଉଥିଲା। ଗୋରୁଙ୍କୁ ଚିହ୍ନଟ ପୂର୍ବକ କାନରେ ସ୍ବତନ୍ତ୍ର ଟ୍ୟାଗ୍ ସହ ନମ୍ବର ଲଗାଯାଉଥିଲା। ଗୋରୁ ମାଲିକଙ୍କ ନାମ, ଠିକଣା ଓ ଫୋନ୍ ନମ୍ବର ରହିଥାଏ। ମାଲିକ ଆସି ଟ୍ୟାଗ୍ ଦେଖି ନିଜ ଗୋରୁଙ୍କୁ ଜରିମାନା ଦେଇ ନେଇଯାଉଥିଲେ। କାଞ୍ଜିଆହୁଦା ଖୋଲିବାର କିଛି ବର୍ଷ ପର୍ଯ୍ୟନ୍ତ ଏସବୁ କାର୍ଯ୍ୟ ଚାଲିଥିଲା। ଶହୀଦନଗରସ୍ଥିତ ପ୍ରାଣୀ ଚିକିତ୍ସାଳୟ ପରିଚାଳନା କରୁଥିଲା। ବର୍ତ୍ତମାନ ଏହି କାଞ୍ଜିଆହୁଦା ଖାଲି ପଡିଛି। ଏଠାରେ କୌଣସି ବୁଲାଗୋରୁଙ୍କୁ ରଖାଯାଉନାହିଁ।
ଏବେ ବୁଲା ଗୋରୁଙ୍କୁ ଉଦ୍ଧାର ପରେ ଜାମୁକୋଳିସ୍ଥିତ ଗୋଶାଳାରେ ରଖାଯାଉଛି। ହେଲେ କିଛିଦିନ ସେଠାରେ ରଖାଯିବାପରେ ଗୋରୁମାନଙ୍କୁ ପୁଣି ଛାଡ଼ି ଦିଆଯାଉଥିବା ଭଳି ଅଭିଯୋଗ ଉଠୁଛି। ତେବେ ବିଏମ୍ସି କର୍ତ୍ତୃପକ୍ଷ ଏପରି ଅଭିଯୋଗକୁ ଖଣ୍ଡନ କରିଛନ୍ତି। ଉଦ୍ଧାର ହେଉଥିବା ଗୋରୁ ବା ଷଣ୍ଢଙ୍କୁ ସେମାନଙ୍କ ମୃତ୍ୟୁ ପର୍ଯ୍ୟନ୍ତ ଗୋଶାଳାରେ ରଖାଯାଉଥିବା ବିଏମ୍ସି ପକ୍ଷରୁ କୁହାଯାଇଛି। ତେବେ ଗୋଶାଳାର କ୍ଷମତା ମାତ୍ର ୨୫୩ ରହିଥିବାବେଳେ ହଜାର ହଜାର ସଂଖ୍ୟାରେ ଗୋରୁ ରାଜଧାନୀରେ ବୁଲୁଛନ୍ତି। ତେଣୁ ଅଧିକ ଗୋଶାଳା ଖୋଲାଯିବା ସହ ଗୋରୁ ଉଦ୍ଧାର ଓ ଚିହ୍ନଟ କାର୍ଯ୍ୟ ତ୍ୱରାନ୍ବିତ କରିବାକୁ ଦାବି ହେଉଛି।
