ପୁରୀ ଅଫିସ,୧୯।୧୦: ପୁରୀ ସମୁଦ୍ରରେ ମଙ୍ଗଳବାର ୬ ଜଣ ପର୍ଯ୍ୟଟକ ଗାଧୋଉଥିବା ବେଳେ ଭାସିଯାଇଛନ୍ତି। ତେବେ ସେମାନଙ୍କ ମଧ୍ୟରୁ ଜଣେ ପର୍ଯ୍ୟଟକଙ୍କ ମୃତ୍ୟୁ ହୋଇଯାଇଥିବାବେଳେ ୪ଜଣଙ୍କୁ ଉଦ୍ଧାର କରାଯାଇଛି। ଅନ୍ୟ ଜଣେ ପର୍ଯ୍ୟଟକ ନିଖୋଜ ଥିବା ଜଣାପଡ଼ିଛି। ମୃତକ ଜଣକ ହେଲେ ପଶ୍ଚିମବଙ୍ଗ ଅଞ୍ଚଳର ଅନୁପମ ମଣ୍ଡଳ।
ସୂଚନା ଥାଉକି, ସେକ୍ଟର ୧୩ କ୍ୟାମେଲିଆ ବିଚ୍ ନିକଟରେ ଅପରାହ୍ନରେ ଅନୁପମ ପରିବାର ସହ ପୁରୀ ବୁଲିବାକୁ ଆସି ସମୁଦ୍ରରେ ଗାଧୋଉ ଥିଲେ। ହଠାତ୍ ସେ ବୁଡ଼ି ଯିବାରୁ ପରିବାର ଲୋକେ ଲାଇଫଗାର୍ଡଙ୍କୁ ଜଣାଇଥିଲେ। ଲାଇଫଗାର୍ଡ ପହଞ୍ଚି ଉଦ୍ଧାର କରିବା ପୂର୍ବରୁ ତାଙ୍କର ମୃତ୍ୟ ହୋଇଯାଇଥିଲା। ସେହିପରି ପଶ୍ଚିମବଙ୍ଗରୁ ଆସିଥିବା ୪ ପର୍ଯ୍ୟଟକ ଗାଧୋଉଥିବା ସମୟରେ ପରିବାର ଲୋକେ ତାଙ୍କୁ ନ ଦେଖିବାରୁ ଲାଇଫଗାର୍ଡଙ୍କୁ କହିଥିଲେ। ଦୀର୍ଘ ସମୟ ପର୍ଯ୍ୟନ୍ତ ଖୋଜାଯାଇଥିଲେ ମଧ୍ୟ ତାଙ୍କର କୌଣସି ପତ୍ତା ମିଳିନାହିଁ। ଏ ନେଇ ଅଗ୍ନିଶମ ବିଭାଗର ଏସ୍ଆଇ ଧନଞ୍ଜୟ ମଲ୍ଲିକ କହିଛନ୍ତି, ବେଳଭୂମିରେ ସମ୍ପୃକ୍ତ ଯୁବକଙ୍କୁ ଶେଷ ଥର ପାଇଁ ଦ୍ୱିପ୍ରହର ୨ଟା ବେଳେ ଦେଖାଯାଇଥିବା ବେଳେ ଏପର୍ଯ୍ୟନ୍ତ କୌଣସି ପତ୍ତା ମିଳିନାହିଁ। ପୂରା ଟିମ୍ ଖୋଜିବା ଜାରି ରଖିଛି।
