ନୂଆଦିଲ୍ଲୀ,୨୫।୫: ୨୮ ମେ’ରେ ହେବାକୁ ଥିବା ନୂଆ ସଂସଦ ଭବନର ଉଦ୍ଘାଟନୀ ସମାରୋହକୁ ବର୍ଜନ କରିବା ନିଷ୍ପତ୍ତି ଉପରେ ପୁର୍ନବିଚାର କରିବାକୁ ବିରୋଧୀ ଦଳଙ୍କୁ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି। ଅର୍ଥମନ୍ତ୍ରୀ କହିଛନ୍ତି, ଏହା ଗଣତନ୍ତ୍ରର ମନ୍ଦିର ଅଟେ। ୨୮ ମେ’ରେ ନୂତନ ସଂସଦ ଭବନର ଉଦ୍ଘାଟନ ପାଇଁ ତାମିଲନାଡୁର ୨୦ଜଣ ଆଦିନମ (ମହନ୍ତ)ଙ୍କୁ ନିମନ୍ତ୍ରଣ କରାଯାଇଛି। ଏହି ଅବସରରେ ବ୍ରିଟିଶମାନଙ୍କଠାରୁ ଶକ୍ତି ହସ୍ତାନ୍ତରର ପ୍ରତୀକ ଭାବରେ ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କୁ ଦିଆଯାଇଥିବା ଆନୁଷ୍ଠାନିକ ରାଜଦଣ୍ଡ ‘ସେଙ୍ଗୋଲ’ ମଧ୍ୟ ସ୍ଥାପନ କରାଯିବ।
ସେ କହିଛନ୍ତି, ଆଶ୍ଚର୍ଯ୍ୟଜନକ ଯେ ରାଷ୍ଟ୍ରପତିଙ୍କୁ ସମାଲୋଚନା କରିଥିବା ଲୋକମାନେ ବର୍ତ୍ତମାନ ହଠାତ୍ ତାଙ୍କ ପାଇଁ କଥା ହେଉଛନ୍ତି। ଉଦ୍ଘାଟନୀ ସମାରୋହକୁ ବର୍ଜନ କରୁଥିବା ଅନେକ ରାଜନୈତିକ ଦଳ ବିଷୟରେ ତାଙ୍କ ମନ୍ତବ୍ୟ ବିଷୟରେ ପଚରାଯିବାରୁ ସେ ଉତ୍ତର ଦେଇ କହିଛନ୍ତି ଯେ, ସଂସଦ ହେଉଛି ଗଣତନ୍ତ୍ରର ମନ୍ଦିର ଏବଂ ଏହି ଦଳଗୁଡିକ ସେମାନଙ୍କର ନିଷ୍ପତ୍ତିର ପୁର୍ନବିଚାର କରିବା ସହ ସମାରୋହରେ ଯୋଗଦେବା ଉଚିତ୍।
