ମସଲା ଆମର ଦୈନନ୍ଦିନ ଜୀବନର ଏକ ଅବିଚ୍ଛେଦ୍ୟ ଉପାଦାନ ପାଲଟିଛି। ପୂର୍ବରୁ ଗୃହିଣୀମାନେ ମସଲା ବାଟି ବ୍ୟଞ୍ଜନରେ ବ୍ୟବହାର କରୁଥିବାବେଳେ ଏବେ ସବୁଠି ପ୍ୟାକେଟ ସ୍ପାଇସ୍ର ଚାହିଦା ରହିଛି। ଏହି ଚାହିଦାକୁ ଅନେକାଂଶରେ ପୂରଣ କରିଛି ଦିବ୍ୟ ମଲ୍ଟିଗ୍ରେନ୍ସ ପ୍ରାଇଭେଟ୍ ଲିଃର ମସଲା ପ୍ରସ୍ତୁତକାରୀ ୟୁନିଟ୍ ହୋମ୍ଫିଲ୍ସ। ତେବେ ସରକାର ନିଜ ଉଦ୍ୟୋଗ ନୀତିକୁ ସରଳ କଲେ ମସଲା ଶିଳ୍ପ ଆହୁରି ବ୍ୟାପକ ହୋଇପାରିବ ବୋଲି କୁହନ୍ତି ହୋମ୍ଫିଲ୍ସ ପରିଚାଳନା ନିର୍ଦ୍ଦେଶକ ବିଚିତ୍ରାନନ୍ଦ ସେନାପତି। ମା’ବାପାଙ୍କ ସହ ରାଉରକେଲାରେ ରହୁଥିବାବେଳେ ସେ ସ୍ନାତକ ଡିଗ୍ରୀ ହାସଲ ପରେ ଚାକିରି ଅନ୍ବେଷଣ ପରିବର୍ତ୍ତେ ମାର୍କେଟିଂ କରୁଥିଲେ। ପରେ ସେ ଭୁବନେଶ୍ୱର ଆସି ନିଜର ସ୍ବତନ୍ତ୍ର କମ୍ପାନୀ ପ୍ରତିଷ୍ଠା କଲେ। ଗ୍ରାହକଙ୍କୁ ସୁସ୍ବାଦୁ ଓ ଉତ୍ତମ ଗୁଣବତ୍ତାର ମସଲା ଯୋଗାଇ ସେମାନଙ୍କ ହୃଦୟରେ ରହିବା ତାଙ୍କର ଉଦ୍ଦେଶ୍ୟ ବୋଲି ଧରିତ୍ରୀ ସହ ସାକ୍ଷାତ୍କାର ବେଳେ ମତ ଦେଇଛନ୍ତି ବିଚିତ୍ରାନନ୍ଦ।
– ହୋମ୍ଫିଲ୍ସ ଉତ୍ପାଦଗୁଡ଼ିକ ଅନ୍ୟମାନଙ୍କଠାରୁ କିଭଳି ଭାବରେ ଭିନ୍ନ?
ହୋମ୍ଫିଲ୍ସ ଉତ୍ପାଦରେ କୌଣସି ପ୍ରକାର କୃତ୍ରିମ ରଙ୍ଗ, ରସାୟନିକ ପଦାର୍ଥ କିମ୍ବା ଫ୍ଲେଭର ମିଶି ନ ଥାଏ। ଏହା ଏକ ପ୍ରିମିୟମ ଗୁଣବତ୍ତାଯୁକ୍ତ ପଦାର୍ଥ। ଖାଦ୍ୟ ପ୍ରସ୍ତୁତି ପ୍ରକ୍ରିୟାରେ ହୋମ୍ଫିଲ୍ସ ମସଲାକୁ କମ୍ ମାତ୍ରାରେ ବ୍ୟବହାର କଲେ ମଧ୍ୟ ଏହା ଠିକ୍ ଭାବରେ କାର୍ଯ୍ୟ କରିଥାଏ। ଖାଦ୍ୟର ରଙ୍ଗ ଓ ସ୍ବାଦ ଏହି କମ୍ପାନୀର ଉତ୍ପାଦଗୁଡ଼ିକୁ ଅନ୍ୟମାନଙ୍କଠାରୁ ସ୍ବତନ୍ତ୍ର ପରିଚୟ ଦିଏ।
– ଆପଣ ସରକାରଙ୍କଠାରୁ କେଉଁ ପ୍ରକାର ସହଯୋଗ ଆଶା କରୁଛନ୍ତି?
ଏହି ଉଦ୍ୟୋଗର ଉନ୍ନତି ଦିଗରେ ସହଯୋଗ କରିବାକୁ ହେଲେ ପ୍ରଥମେ ସରକାରଙ୍କୁ ଏକ ଭ୍ରଷ୍ଟାଚାରମୁକ୍ତ ବାତାବରଣ ତିଆରି କରିବାକୁ ପଡ଼ିବ। ଏଥିସହିତ ଔଦ୍ୟୋଗିକ ନୀତିକୁ ସରଳ ଏବଂ ସୁବିଧାଜନକ କରିବା ଆବଶ୍ୟକ। ସବୁଠାରୁ ମହତ୍ତ୍ୱପୂର୍ଣ୍ଣ କଥା ହେଉଛି, ସରକାର ବ୍ୟାଙ୍କଗୁଡ଼ିକ ମାଧ୍ୟମରେ ଏମ୍ଏସ୍ଏମ୍ଇକୁ ସହଜରେ ଫଣ୍ଡିଂ ସୁବିଧା ପ୍ରଦାନ କରିବା ଦରକାର। ବ୍ୟାଙ୍କଗୁଡିକରୁ ଆର୍ଥିକ ସହାୟତା ପାଇବା ବର୍ତ୍ତମାନ ଏତେ ସହଜ ନୁହେଁ। ତେଣୁ ସରକାର ଏ ଦିଗରେ ସହଯୋଗର ହାତ ବଢ଼ାଇବା ଉଚିତ।
– କୋଭିଡ୍-୧୯ ଆସିବା ପରଠାରୁ ଲୋକେ ଅନ୍ଲାଇନ୍ ପ୍ଲାଟ୍ଫର୍ମକୁ ଅଧିକ ପସନ୍ଦ କରୁଛନ୍ତି। ଅନ୍ଲାଇନ୍ ମାର୍କେଟର ଏହି ଟ୍ରେଣ୍ଡ୍ ଉପରେ କ’ଣ କହିବେ?
ବର୍ତ୍ତମାନ ସମୟକୁ ଦେଖିଲେ ଏହି ଟ୍ରେଣ୍ଡ୍ ଠିକ୍। କାରଣ ଗ୍ରାହକ ସଂଖ୍ୟା ବଢ଼ାଇବା ଏବଂ ସେମାନଙ୍କ ନିକଟରେ ପହଞ୍ଚିବା ପାଇଁ ଏହାକୁ ଏକ ନୂତନ ବ୍ୟବସ୍ଥା କିମ୍ବା ବିକଳ୍ପ ବୋଲି କୁହାଯାଇପାରିବ।
– ଭବିଷ୍ୟତ ପାଇଁ କିଛି ବିସ୍ତୃତ
ଯୋଜନା ରହିଛି କି?
ହଁ, ପ୍ରଥମରୁ ହିଁ ଆମେ ନିଜ ୟୁନିଟ୍କୁ ବିସ୍ତାର କରିବା ପ୍ରକ୍ରିୟା ଚଳାଇଛୁ। ଆମେ କଟକ ଜିଲାର ରାମଦାସପୁର ଇଣ୍ଡଷ୍ଟ୍ରିଆଲ୍ ଇଷ୍ଟେଟ୍ରେ ଦୈନିକ ୩୦ ମେଟ୍ରିକ୍ ଟନ୍ ଉତ୍ପାଦନ କ୍ଷମତା ବିଶିଷ୍ଟ ଏକ ଭଲ ରପ୍ତାନି ଅଭିମୁଖୀ ପ୍ଲାଣ୍ଟ ଆରମ୍ଭ କରିବାକୁ ଯାଉଛୁ।
– ଅନ୍ଲାଇନ୍ କାରବାର ବ୍ୟବସାୟର ଏକ ସୁବିଧାଜନକ ପନ୍ଥା ବୋଲି ଆପଣ ଭାବୁଛନ୍ତି କି?
ହଁ, ବିଭିନ୍ନ ସମୟରେ ଚାଲୁଥିବା ଟ୍ରେଣ୍ଡ୍କୁ ସ୍ବୀକାର କରିବାକୁ ଆମେ ବାଧ୍ୟ। ନଚେତ୍ ଆମେ ବର୍ତ୍ତମାନର ପ୍ରତିଯୋଗିତାମୂଳକ ବଜାରରେ ପଛରେ ରହିଯିବା।
– ବ୍ୟବସାୟ ଓ ପରିବାର ମଧ୍ୟରେ ସମାନତା କିପରି ରଖୁଛନ୍ତି।
ଗୋଟେ ପଟେ ଜୀବନ ହେଲେ ଅନ୍ୟପକ୍ଷେ ଜୀବିକା ରହିଛି। ଉଭୟ ଜୀବନ ଓ ଜୀବିକା ମଧ୍ୟରେ ସନ୍ତୁଳନ ରଖିବାକୁ ହେଲେ ସମୟବଦ୍ଧ ସୂଚୀ ଓ ନିରବଚ୍ଛିନ୍ନ ଅଧ୍ୟବସାୟ ରହିବା ଆବଶ୍ୟକ। ସେହିପରି ଉଭୟ ପକ୍ଷରୁ ମଧ୍ୟ ସମ ପରିମାଣରେ ସହଯୋଗ ମିଳିବା ଜରୁରୀ। କଷ୍ଟ ହେଲେ ମଧ୍ୟ ସମୟ ଓ ଶକ୍ତିର ଉପଯୋଗ କରି ସମାନତା ରକ୍ଷା କରୁଛି।
