ଜଗତ୍ସିଂହପୁର ଅଫିସ, ୨୭ା୯:ଜଗତ୍ସିଂହପୁରର ଗୋପାଳସାଗରସ୍ଥିତ ମା’ ବନଦୁର୍ଗା ପୂଜା କମିଟି ପକ୍ଷରୁ ୬୦ ବର୍ଷ ହେବ ଦୁର୍ଗାପୂଜା ହୋଇଆସୁଛି। କୋଭିଡ୍-୧୯ କାରଣରୁ ଗତ ୨ ବର୍ଷ ହେବ ପୂଜା ନିରାଡ଼ମ୍ବରପୂର୍ଣ୍ଣ ଥିଲା । ଚଳିତବର୍ଷ ଆଡମ୍ବରପୂର୍ଣ୍ଣ କରିବା ପାଇଁ ସମସ୍ତ ପ୍ରସ୍ତୁତି ଚାଲିଛି। ଏଥି ମଧ୍ୟରେ ମୂର୍ତ୍ତି ନିର୍ମାଣ ଅନ୍ତିମ ପର୍ଯ୍ୟାୟରେ ପହଞ୍ଚତ୍ଛି। ବିଗତବର୍ଷଗୁଡିକ ପରି ଏଥର ମଧ୍ୟ ମା’ବନଦୁର୍ଗା ଚାନ୍ଦି ଅଳଙ୍କାରରେ ଝଲସିବେ। ଚାନ୍ଦିରେ ତିଆରି ମୁକୁଟ, ହାର, ବାହୁଟି ଓ ନାକରେ ନୋଥ ଆଦି ଅଳଙ୍କାର ପରିଧାନ କରିବେ। ମା’ଙ୍କ ଆଙ୍ଗୁଠିିରେ ୮ଟି ସୁନା ମୁଦି ପିନ୍ଧାଯିବ। ଭବିଷ୍ୟତରେ ଚାନ୍ଦି ମେଢ ଏବଂ ସୁନା ହାର କରିବା ପାଇଁ କମିଟି ପକ୍ଷରୁ ଚିନ୍ତା କରାଯାଉଥିବା କୁହାଯାଇଛି
ପୁରାଣ ବର୍ଣ୍ଣିତ କଥାବସ୍ତୁ ଅନୁସାରେ, ପ୍ରଭୁ ରାମଚନ୍ଦ୍ର ଯେତେବେଳେ ସେତୁ ବନ୍ଧ କରୁଥିଲେ ସେଥିରେ ବାଧା ସୃଷ୍ଟି ହୋଇଥିଲା। ଗୋଟିଏ ପଦ୍ମଫୁଲ ଅଭାବ ଯୋଗୁ ଏଭଳି ପରିସ୍ଥିତି ସୃଷ୍ଟି ହୋଇଥିଲା। ଏଭଳି ଅଭାବନୀୟ ପରିସ୍ଥିତିରେ ପ୍ରଭୁ ରାମଚନ୍ଦ୍ର ନିଜର ଏକ ନେତ୍ର ଦାନ କରି ସେତୁ ବନ୍ଧ ପୂର୍ଣ୍ଣ କରିବାକୁ ଚେଷ୍ଟା କରିଥିଲେ। ଏହି ସମୟରେ ମା’ବନଦୁର୍ଗା ଆବିର୍ଭୂତା ହୋଇ ସେତୁ ନିର୍ମାଣରେ ସହଯୋଗ କରିଥିଲେ। ଏହା ସମାଜ ପାଇଁ ନୂଆ ବାର୍ତ୍ତା ଦେଇଛି। ତେଣୁ ସମାଜ ମଙ୍ଗଳରେ ମା’ଙ୍କ କୃପା ହାସଲ କରିବା ପାଇଁ କମିଟି ପକ୍ଷରୁ ପ୍ରତିବର୍ଷ ଏହି ପୂଜା କରାଯାଉଛି॥ ପ୍ରତିବର୍ଷ ପରି ଚଳିତବର୍ଷ ମଣ୍ଡପରେ ମା’ ବନଦୁର୍ଗା, ରାମ, ଲକ୍ଷ୍ମଣ, ହନୁମାନ ଓ ବିଭୀଷଣଙ୍କ ମୂର୍ତ୍ତି ଶୋଭା ପାଇବ। ପୂଜାପାଠ ଉପରେ ଅଧିକ ଧ୍ୟାନ ଦିଆଯିବ। ଏହି ପୂଜାରେ ମାର୍କଣ୍ଡପୁର ଏବଂ ଜଗତସିଂହପୁର ଗ୍ରାମର ପାଖାପାଖି ୬୦୦ ଘର ଏବଂ ୧୫୦ରୁ ଅଧିକ ବ୍ୟବସାୟୀଙ୍କ ସହଯୋଗ କରିଥାନ୍ତି । ପ୍ରତିବର୍ଷ ଶାନ୍ତି ଓ ଶୃଙ୍ଖଳାର ସହ ଏହି ପୂଜା ହୋଇଆସୁଛି। ଭରତ ଲେଙ୍କା, ନଟବର ସ୍ବାଇଁ, ହରେକୃଷ୍ଣ ଜେନା, ରତ୍ନାକର ଲେଙ୍କା ଓ ଭଗବାନ ବାରିକ ପ୍ରମୁଖ ମା’ ବନଦୁର୍ଗାଙ୍କ ପୂଜା ଆରମ୍ଭ କରିଥିଲେ । ଏବେ କମିଟି ସଭାପତି ରାଜେନ୍ଦ୍ର କୁମାର ଲେଙ୍କା, ସମ୍ପାଦକ କୈଳାସ ଚନ୍ଦ୍ର ସାହୁ, ଉପସଭାପତି ହରି ପ୍ରଧାନ, ସହ ସମ୍ପାଦକ ଜୟନ୍ତ କୁମାର ସାହୁ, କୋଷାଧ୍ୟକ୍ଷ ପ୍ରତିମା ମହାନ୍ତି. ଉପଦେଷ୍ଟା ହେମନ୍ତ କୁମାର ଲେଙ୍କା, ଗୋଲେଖ ସିଂହ, ସୁରେଶ ସ୍ବାଇଁ, ପ୍ରଶାନ୍ତ କୁମାର ସିଂହ, ଦେବେନ୍ଦ୍ର ସ୍ବାଇଁଙ୍କ ସମେତ କାର୍ଯ୍ୟକାରୀ କମିଟି ସଭ୍ୟଙ୍କ ସହଯୋଗରେ ପୂଜା ଆୟୋଜନ କରାଯାଉଛି।
ଚଳିତବର୍ଷ ପୂଜାରେ ଅଧିକ ସଂଖ୍ୟକ ଲୋକଙ୍କୁ ଆକର୍ଷିତ କରିବା ପାଇଁ ବିଭନ୍ନ ପଦକ୍ଷେପ ନିଆଯାଉଛି। ଆକର୍ଷଣୀୟ ମେଢ, ମୂର୍ତ୍ତି, ଆଲୋକ ସାଜସଜ୍ଜା ଏବଂ ବାଦ୍ୟରୋଳ ସାଙ୍ଗକୁ ଅଷ୍ଟମୀରେ ମେଲୋଡି ଆୟୋଜନ କରାଯିବା ପାଇଁ ବ୍ୟବସ୍ଥା ହେଉଛି। ଭସାଣିରେ ଡ୍ରମ ସାଙ୍ଗକୁ ଶିଙ୍ଗ ବାଜା ବାଜିବ।
