ଗଞ୍ଜାମ,୨୮ା୮(ଡି.ଏନ୍.ଏ.)-ଗଞ୍ଜାମ ଥାନାରେ କାର୍ଯ୍ୟରତ ଏସ୍ଆଇ ଚନ୍ଦନ ବେହେରା ଶୁକ୍ରବାର ଗାଡି ଯାଞ୍ଚ କରୁଥିବାବେଳେ ୨ ଯୁବକ ତାଙ୍କୁ ଆକ୍ରମଣ କରିଛନ୍ତି। ଏନେଇ ୨ଜଣଙ୍କୁ ଗିରଫ କରାଯାଇଛି। ସେମାନେ ହେଲେ ରମ୍ଭା ଥାନା ନିଳାଦ୍ରୀପୁର ଗ୍ରାମର ସତୀଶ ସ୍ବାଇଁ (୩୦) ଓ ସୂର୍ଯ୍ୟକାନ୍ତ ସ୍ବାଇଁ(୨୫)।
ଗଞ୍ଜାମ ଥାନା ପକ୍ଷରୁ ଋଷିକୂଲ୍ୟା ବ୍ରିଜ୍ ନିକଟରେ ଯାନବାହନର କାଗଜପତ୍ର, ହେଲ୍ମେଟ ଓ ମାସ୍କ ଆଦି ଯାଞ୍ଚ କରାଯାଉଥିଲା। ଏହି ସମୟରେ ଗୋଟିଏ ବାଇକରେ ରମ୍ଭା ଥାନା ନିଳାଦ୍ରୀପୁରର ସତୀଶ, ସୂର୍ଯ୍ୟକାନ୍ତ ଓ କ୍ଷେତ୍ର ସ୍ବାଇଁ (୨୬) ବ୍ରହ୍ମପୁରରୁ ଗ୍ରାମକୁ ଫେରୁଥିଲେ। କେହି ମାସ୍କ ପିନ୍ଧି ନ ଥିବାବେଳେ ଗାଡି ଚାଳକ ମଧ୍ୟ ହେଲ୍ମେଟ୍ ପିନ୍ଧି ନ ଥିଲେ। ପୋଲିସ ବାଇକ ଅଟକାଇ ପଚାରିବାରୁ ସୂର୍ଯ୍ୟକାନ୍ତ ଗାଳିଗୁଲଜ କରିଥିଲେ। ଏସ୍ଆଇ ଚନ୍ଦନ ବେହେରା ବାରଣ କରିବାରୁ ତାଙ୍କ ମୁହଁକୁ ବାଇକ୍ ଚାବିରେ ଭୂଷି ଦେଇଥିଲେ। ସେ ତଳେ ପଡିଯିବା ପରେ ତାଙ୍କୁ ଆକ୍ରମଣ କରିଥିଲେ। ସ୍ଥାନୀୟ ଲୋକେ ଓ ଅନ୍ୟ କର୍ମଚାରୀ ଆହତ ଚନ୍ଦନଙ୍କୁ ଉଦ୍ଧାର କରି ଚିକିତ୍ସା ପାଇଁ ଗଞ୍ଜାମ ମେଡିକାଲକୁ ନେଇଥିଲେ। ପରେ ଅନ୍ୟ ପୋଲିସ କର୍ମଚାରୀ ସ୍ଥାନୀୟ ଜନସାଧାରଣଙ୍କ ସହାୟତାରେ ଦୁଇଜଣଙ୍କୁ ଗିରିଫ କରିଥିଲେ। ଗଞ୍ଜାମ ଥାନାରେ ନଂ.୧୧୦/୨୦ରେ ମାମଲା ରୁଜୁ କରାଯାଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।
