ତ୍ରିନିଦାଦ,୨।୮: ଭାରତୀୟ ଦଳର ଯୁବ ଓପନିଂ ବ୍ୟାଟ୍ସମ୍ୟାନ ଶୁବମନ ଗିଲଙ୍କୁ କିଛି ଦିନ ହେବ ପାଇଁ ତାଙ୍କ ପ୍ରଦର୍ଶନ ପାଇଁ ସମାଲୋଚନା କରାଯାଇଥିଲା। ଶେଷରେ ୱେଷ୍ଟଇଣ୍ଡିଜ ବିପକ୍ଷ ତୃତୀୟ ଦିନିକିଆରେ ୮୫ ରନ୍ର ଇନିଂସ ଆଧାରରେ ଗିଲ ଆଲୋଚକଙ୍କୁ ଜବାବ ଦେଇଛନ୍ତି। ୩ ମ୍ୟାଚ ବିଶିଷ୍ଟ ଦିନିକିଆ ସିରିଜର ନିର୍ଣ୍ଣାୟକ ମ୍ୟାଚରେ ଇଶାନ କିଶନଙ୍କ ସହ ଗିଲ ମଧ୍ୟ ଦଳକୁ ଏକ ଭଲ ଆରମ୍ଭ କରିଥିଲେ। ଏଥି ସହିତ ଗିଲ ତାଙ୍କ ଇନିଂସ ଆଧାରରେ ଏକ ରେକର୍ଡ ଭାଙ୍ଗିଥିଲେ।
ଏହି ମ୍ୟାଚ୍ରେ ୮୫ ରନ୍ର ଇନିଂସ ଖେଳି ଗିଲ ବର୍ତ୍ତମାନ ଦିନିକିଆ ଫର୍ମାଟରେ ୨୭ ଇନିଂସ ପରେ ସର୍ବାଧିକ ରନ ସ୍କୋର କରିବାର ରେକର୍ଡ ସୃଷ୍ଟି କରିଛନ୍ତି। ଏହାପୂର୍ବରୁ ଏହି ରେକର୍ଡ ପାକିସ୍ତାନ ଦଳର ବର୍ତ୍ତମାନର ବାମହାତୀ ଓପନିଂ ବ୍ୟାଟ୍ସମ୍ୟାନ ଇମାମ ଉଲ ହକଙ୍କ ନାମରେ ଥିଲା, ଯିଏ ୨୭ ଇନିଂସରେ ୧୩୮୧ ରନ ସଂଗ୍ରହ କରିଥିଲେ। ଅନ୍ୟପକ୍ଷରେ ଗିଲ ୨୭ ଇନିଂସରେ ୧୪୩୭ ରନ ରହିଛି। ସେ ହାରାହାରି ୬୨.୪୮ରେ ସ୍କୋର କରିଛନ୍ତି।
ୱେଷ୍ଟଇଣ୍ଡିଜ ବିପକ୍ଷ ତୃତୀୟ ଦିନିକିଆରେ ଶୁବମାନ ଗିଲ ୮୫ ରନ ସଂଗ୍ରହ କରିଥିଲେ, ଇଶାନ କିଶନ ୭୭, ସଞ୍ଜୁ ସାମସନ ୫୧ ଏବଂ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଅପରାଜିତ ୭୦ ରନ ସ୍କୋର କରିଥିଲେ। ଏହି କାରଣରୁ ଭାରତୀୟ ଦଳ ୫୦ ଓଭରରେ ୫ ଉଇକେଟ ହରାଇ ୩୫୨ କରିବାରେ ସଫଳ ହୋଇଥିଲା। ଏହା ପରେ ବୋଲରଙ୍କ ଭଲ ପ୍ରଦର୍ଶନ ଆଧାରରେ ଟିମ ଇଣ୍ଡିଆ ଏହି ମ୍ୟାଚ ୨୦୦ ରନ୍ରେ ଜିତିଥିଲା।
