ପୁରୁଣା ଭୁବନେଶ୍ୱର,୧୦।୨(ଡି.ଏନ୍.ଏ.): ପ୍ରଭୁ ଶ୍ରୀ ଲିଙ୍ଗରାଜଙ୍କ ଶହ ଶହ ଏକର ଜମି ଏବେ ଚଞ୍ଚକତା ପୂର୍ବକ କିଣାବିକା ଜାରି ରହିଛି। ଶ୍ରୀଲିଙ୍ଗରାଜଙ୍କ ନୂଆ ଗାଁ ମୌଜାସ୍ଥିତ କୁଡ଼ୁଆ ସମ୍ପତ୍ତି ହେଉ ବା ରଥ ରୋଡ ସ୍ଥିତ ସମ୍ପତ୍ତି ମୂଳ ମାଲିକାନା ପରିବର୍ତ୍ତନ କରାଯାଇ କଙ୍କ୍ରିଟ ଏବଂ ବହୁ ଅଟ୍ଟାଳିକା ନିର୍ମାଣ ଚାଲିଛି। ଜମି ମାଫିଆ ବିଭାଗୀୟ ଅଧିକାରୀଙ୍କୁ ହାତ କରି କିସମ ବଦଳାଇ ଠାକୁରଙ୍କର ଏହି ମୂଲ୍ୟବାନ ଭୂସମ୍ପତ୍ତିକୁ ଲୁଟ୍ କରୁଛନ୍ତି। ଏହି କ୍ରମରେ ଭୀମପୁର ମୌଜା ଖାତା ନଂ. ୧୯୩୫, ପ୍ଲଟ ନଂ.୬୭ରେ ଥିବା ଏ୧.୧୬୦ଡିସିମିଲ ପରିମିତ ସମ୍ପତ୍ତି ଏକଦା ଶ୍ରୀଲିଙ୍ଗରାଜ ପ୍ରଭୁ ମାର୍ଫତ ସୁଦର୍ଶନ ଭାରତୀଙ୍କ ଓଗେରଙ୍କ ନାମରେ ଥିଲା। ମାତ୍ର ୧୯୮୯ରେ ବେ-ବନ୍ଦୋବସ୍ତ ବେଳେ ଜଣେ ଚାଷୀଙ୍କ ନାମରେ ତାହା ହୋଇଥିଲା। କିନ୍ତୁ ପରେ ସେହି ପ୍ଲଟରୁ ଏ୦.୨୨୮ଡି ସମ୍ପତ୍ତି ମୟୂରଭଞ୍ଜ ବେତନଟିର ଜଣେ ବ୍ୟକ୍ତିଙ୍କ ନାମରେ ଏବଂ ସମ୍ପୃକ୍ତ ବ୍ୟକ୍ତି ଅନ୍ୟ ଜଣକ ନାମରେ କିଣାବିକା କରିଥିଲେ। ଏହି ଘଟଣା ଜଣାପଡ଼ିବା ପରେ ଏକାମ୍ର ଜନ ଜାଗରଣ ମଞ୍ଚ ପକ୍ଷରୁ ତା୧୪.୦୯.୨୦୨୦ରିଖରେ ବୋର୍ଡ ଅଫ୍ ରେଭିନ୍ୟୁକୁ ଅଭିଯୋଗ ହୋଇଥିଲା। ଏହି ଅଭିଯୋଗ ପରେ ବିଭାଗ ପକ୍ଷରୁ ଏଠାରେ କୌଣସି ନିର୍ମାଣ କାର୍ଯ୍ୟ ନ କରିବା ଲାଗି ନିର୍ଦ୍ଦେଶ ଦେଇଥିଲେ। କିନ୍ତୁ ଏହାକୁ ଅବମାନନା କରି ମାଫିଆମନେ ଏଠାରେ ଜୋର ଜବରଦସ୍ତ କାର୍ଯ୍ୟ ଜାରି ରଖିଛନ୍ତି। ଏହି ଘଟଣା ନେଇ ମଞ୍ଚ ପକ୍ଷରୁ ପୁନଃ ଏୟାରଫିଲ୍ଡ ଥାନାରେ ଲିଖିତ ଅଭିଯୋଗ କରାଯାଇଥିଲା। ହେଲେ ପୋଲିସ ଅଭିଯୋଗ ଲେଖି ଦେଇ ନୀରବ ରହିଯାଇଛି। ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ତେଣୁ ମନ୍ଦିର ପ୍ରଶାସନ, ଦେବୋତ୍ତର ବିଭାଗ ଶ୍ରୀଲିଙ୍ଗରାଜଙ୍କ ଏହି ବହୁମୂଲ୍ୟ ସମ୍ପତ୍ତି କିଣା ବିକା ଉପରେ ରୋକ ଲଗାଇବା ସହ ତୁରନ୍ତ ବେଆଇନ ନିର୍ମାଣ ବନ୍ଦ କରିବାକୁ ମଞ୍ଚ ଦାବି କରିଛି।
