ମସ୍କୋ,୧୨।୩ : ଗତ ୨୪ଘଣ୍ଟା ମଧ୍ୟରେ ପୂର୍ବ ୟୁକ୍ରେନ ସହର ବାଖମୁତରେ ରୁଷିଆ ସେନାକୁ ବଡ଼ ଝଟ୍କା ଲାଗିଛି। ଏଠାରେ ୫୦୦ରୁ ଅଧିକ ରୁଷିଆ ସୈନିକ ନିହତ କିମ୍ବା ଆହତ ହୋଇଛନ୍ତି। ୟୁକ୍ରେନ ସେନାର ମୁଖପାତ୍ର ଏନେଇ ସୂଚନା ପ୍ରଦାନ କରିଛନ୍ତି। ପୂର୍ବ କ୍ଷେତ୍ରର ସୈନ୍ୟବାହିନୀର ମୁଖପାତ୍ର ସେରି ଚେରେଭେଟ କହିଛନ୍ତି ଯେ ଗତ ୨୪ ଘଣ୍ଟା ମଧ୍ୟରେ ରୁଷିଆ ସମୁଦାୟ ୧୬ ଥର ଆକ୍ରମଣ କରିଥିଲା। ବାଖମୁତରେ ଦୁଇପକ୍ଷ ୨୩ ଥର ମୁହାଁମୁହିଁ ହୋଇଥିଲେ।
ସେ ଜାତୀୟ ଟେଲିଭିଜନ ଚ୍ୟାନେଲକୁ କହିଛନ୍ତି ଯେ ଯୁଦ୍ଧ ସମୟରେ ଶତ୍ରୁ ଦେଶ ରୁଷିଆର ୨୨୧ ସୈନିକ ନିହତ ହୋଇଥିବାବେଳେ ୩୧୪ ଜଣ ଆହତ ହୋଇଛନ୍ତି। ତେବେ ଶୁକ୍ରବାର କିମ୍ବା ଗତ ୨୪ ଘଣ୍ଟା ମଧ୍ୟରେ ସେ ମୃତ୍ୟୁ ବିଷୟରେ କହୁଛନ୍ତି କି ନାହିଁ ତାଙ୍କ ମନ୍ତବ୍ୟରୁ ସ୍ପଷ୍ଟ ହୋଇନାହିଁ। ନ୍ୟୁଜ ଏଜେନ୍ସି ରଏଟର୍ସ ଚେରଭେଟଙ୍କ ଦାବି ଯାଞ୍ଚ କରିବାରେ ସକ୍ଷମ ହୋଇ ନାହିଁ।
ସୂଚନାଯୋଗ୍ୟ ଯେ ୟୁକ୍ରେନରେ ଶନିବାର ରୁଷିଆ ଆକ୍ରମଣ କରିଥିଲା। ଏଥିରେ ୪ଜଣଙ୍କର ମୃତ୍ୟୁ ହୋଇଥିଲା। ଅଧିକାରୀ କହିଛନ୍ତି ଯେ ଖେରସନରେ ତିନି ଜଣଙ୍କର ମୃତ୍ୟୁ ହୋଇଥିବାବେଳେ ଡୋନେଟସ୍କ ଅଞ୍ଚଳରେ ଜଣଙ୍କର ମୃତ୍ୟୁ ଘଟିଛି। ଆଞ୍ଚଳିକ ରାଜ୍ୟପାଳ ଆଲେକ୍ସଜାଣ୍ଡାର୍ ପ୍ରୋକୁଡିନ କହିଛନ୍ତି ଯେ ଜଣେ ବୃଦ୍ଧା ଙ୍କ ସମେତ ଅନ୍ୟ ତିନି ଜଣ ଆହତ ହୋଇଛନ୍ତି। ପ୍ରୋକୁଡିନ କହିଛନ୍ତି ଯେ ଖେରସନରେ ଦୁଇପକ୍ଷଙ୍କ ମଧ୍ୟରେ ଗୁଳି ବିନିମୟରେ ଅନେକ ବସ ମଧ୍ୟ କ୍ଷତିଗ୍ରସ୍ତ ହୋଇଛି।
