ଦୁବାଇ,୧୫।୧୧: ପାକିସ୍ତାନ କ୍ରିକେଟ ଦଳର ପୂର୍ବତନ ଅଧିନାୟକ ଶୋଏବ ମଲିକ ଆଜିକାଲି ଚର୍ଚ୍ଚାରେ ଅଛନ୍ତି। ନିକଟରେ ପାକିସ୍ତାନୀ ଅଭିନେତ୍ରୀ ଆୟେଶା ଉମରଙ୍କ ସହ ତାଙ୍କର ଅନେକ ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା। ଆୟେଶା ଏହି ଫଟୋଗୁଡ଼ିକୁ ଶୋଏବଙ୍କ ସହ ନିଜ ଇନ୍ଷ୍ଟାଗ୍ରାମ ଆକାଉଣ୍ଟରେ ଶେୟାର କରିଛନ୍ତି। ତାଙ୍କ ଦ୍ୱାରା ଫଟୋ ଶେୟାର କରିବା ପରେ ପ୍ରଶଂସକଙ୍କଠାରୁ ଜବରଦସ୍ତ ପ୍ରତିକ୍ରିୟା ଆସିଛି। ଏହା ପରେ ଅନେକ ପ୍ରଶଂସକ ସାନିଆଙ୍କୁ ସତର୍କ ରହିବାକୁ ପରାମର୍ଶ ଦେବା ଆରମ୍ଭ କରିଥିବାବେଳେ କେତେକ କହିଛନ୍ତି ଯେ ଶୋଏବ ତାଙ୍କ ସ୍ତ୍ରୀଙ୍କୁ ଛାଡପତ୍ର ଦେବାକୁ ପ୍ରସ୍ତୁତ ହେଉଛନ୍ତି୧
ଭାଇରାଲ ହୋଇଥିବା ଫଟୋରେ ଶୋଏବ ମଲିକ ଅଭିନେତ୍ରୀ ଆୟେଶା ଉମରଙ୍କ ସହ ସୁଇମିଂ ପୁଲରେ ନଜର ଆସିଛନ୍ତି। ଉଭୟଙ୍କୁ ଫଟୋରେ ରୋମାଣ୍ଟିକ ଅନ୍ଦାଜରେ ଦେଖିବାକୁ ମିଳିଛି। ଏହି ଗ୍ଲାମରସ ଫଟୋ ଭାଇରାଲ ହେବା ପରେ ଶୋଏବ ମଲିକ ତାଙ୍କ ସ୍ତ୍ରୀ ସାନିଆ ମିର୍ଜାଙ୍କ ସମ୍ପର୍କକୁ ନେଇ ଚର୍ଚ୍ଚା ଉଠିଛି। ଶୋଏବଙ୍କ ସହ ଆୟେଶାଙ୍କ ଘନିଷ୍ଠତା ଦେଖି କିଛି ପ୍ରଶଂସକ ସାନିଆଙ୍କୁ ମଲିକଠାରୁ ଦୂରେଇ ଯିବାକୁ କହିଛନ୍ତି। କେତେକ ପ୍ରଶଂସକ ସାନିଆଙ୍କୁ ସତର୍କ ରହିବାକୁ ପରାମର୍ଶ ଦେଇଛନ୍ତି। ଟି -୨୦ ବିଶ୍ୱକପରେ ସ୍କଟଲ୍ୟାଣ୍ଡ ବିପକ୍ଷରେ ପାକିସ୍ତାନର ବିଜୟ ପରେ ଆୟେଶା ଏହି ଫଟୋଗୁଡ଼ିକୁ ଇନଷ୍ଟାଗ୍ରାମରେ ଶେୟାର କରିଛନ୍ତି।
ଶୋଏବ ମଲିକ ଏବଂ ଆୟେଶା ଉମରଙ୍କ ଏହି ଭାଇରାଲ ଫଟୋଗୁଡ଼ିକ ପ୍ରାୟ ଏକ ମାସ ପୂର୍ବର ବୋଲି କୁହାଯାଇଛି। ଏକ ସ୍ଥାନୀୟ ପତ୍ରିକା ପାଇଁ ଏହା ଶୁଟ କରାଯାଇଥିଲା। ଶୋଏବ ଏବଂ ଆୟେଶା ଏହି ପତ୍ରିକା ପାଇଁ ବିଭିନ୍ନ ଶୈଳୀରେ ପୋଜ କରିଥିଲେ। ଏହି ଫଟୋଗୁଡ଼ିକ ମଧ୍ୟରୁ ଅଧିକାଂଶ ପାକିସ୍ତାନୀ ଅଭିନେତ୍ରୀ ନିଜେ ସୋସିଆଲ ମିଡିଆରେ ଶେୟାର କରିଛନ୍ତି।
ପ୍ରଶଂସକଙ୍କ ଦ୍ୱାରା ଆଲୋଚନା ହେବା ପରେ ଆୟେଶା ନୀରବତା ଭାଙ୍ଗିଛନ୍ତି। ସେ କହିଛନ୍ତି, ଶୋଏବ ଜଣେ ବିବାହିତ ପୁରୁଷ, ସେ ତାଙ୍କ ସ୍ତ୍ରୀ ସାନିଆଙ୍କ ସହ ବହୁତ ଖୁସି, ଉଭୟଙ୍କ ପ୍ରତି ମୋର ବହୁତ ସମ୍ମାନ ଅଛି। ଭଲ ବନ୍ଧୁ ହେବା ବ୍ୟତୀତ, ଆମେ ଦୁହେଁ ପରସ୍ପରର ଶୁଭେଚ୍ଛୁ ବୋଲି ସେ କହିଛନ୍ତି।
