ବାରିପଦା ଅଫିସ,୩।୪-ଜାତୀୟ ଉଦ୍ୟାନ ଶିମିଳିପାଳ ଅଭୟାରଣ୍ୟରେ ଦିନକୁ ଦିନ ନିଆଁ ବଢିବାରେ ଲାଗିଛି। ଏକ ମାସ ଧରି ଅଭୟାରଣ୍ୟ ଜଳୁଥିବା ବେଳେ ଏହାକୁ ଆୟତ୍ତ କରିବାରେ ବନବିଭାଗର ଉଦ୍ୟମ ଫେଲ୍ ମାରିଛି ା ଶୁକ୍ରବାର ୫୧ଟି ସ୍ଥାନରେ ନିଆଁ ଲାଗିଥିବା ଜଣାପଡିବା ପରେ ବନ କର୍ମଚାରୀ, ଓଡ୍ରାଫ ଟିମ୍ ଓ ସ୍ଥାନୀୟ ଜନସାଧାରଣ ନିଆଁ ଲିଭାଇବାରେ ଲାଗି ପଡିଛନ୍ତି। ଗୋଟିଏପଟେ ଲାଗିଥିବା ନିଆଁକୁ ଆୟତ୍ତ କରିବା ବେଳକୁ ଅନ୍ୟପଟେ ନିଆଁ ଜଳୁଥିବାରୁ କର୍ମଚାରୀମାନେ ନୟାନ୍ତ ହୋଇପଡିଲେଣି। ଆବଶ୍ୟକ କର୍ମଚାରୀ ପଦବୀ ଫାଙ୍କା ପଡିଥିବା ଯୋଗୁ ପରିସ୍ଥିତି ଅଣାୟତ୍ତ ହୋଇପଡ଼ିଛି। ଅନ୍ୟପକ୍ଷରେ ବିଭାଗ ପକ୍ଷରୁ ବ୍ୟାପକ ସଚେତନତା କାର୍ଯ୍ୟକ୍ରମ କରାଯାଉଥିଲେ ମଧ୍ୟ ଶିକାରୀମାନଙ୍କ ପାଇଁ ନିଆଁ ପ୍ରଶମିତ ହେବାରେ ବିଳମ୍ବ ହେଉଛି। ଅଭୟାରଣ୍ୟରେ ଥିବା ଜୀବଜନ୍ତୁ ଓ ବୃକ୍ଷଲତା ପୋଡି ପାଉଁଶ ହୋଇଯାଉଥିବାରୁ ପରିବେଶବିତ୍ଙ୍କ ମଧ୍ୟରେ ଉଦ୍ବେଗ ପ୍ରକାଶ ପାଇଛି।
ଶୁକ୍ରବାର ଅଭୟାରଣ୍ୟର ଦକ୍ଷିଣ ଡିଭିଜନର ୩୮ ଓ ଉତ୍ତର ଡିଭିଜନର ୧୩ଟି ସ୍ଥାନରେ ନିଆଁ ଲାଗିଥିବା ବ୍ୟାଘ୍ର ସଂରକ୍ଷଣ ପ୍ରକଳ୍ପର କ୍ଷେତ୍ର ନିର୍ଦ୍ଦେଶକ ଏମ୍. ଜଗଜୟାନନ୍ଦ କହିଛନ୍ତି। ଏହାକୁ ଆୟତ୍ତ କରିବା ପାଇଁ ନିୟୋଜିତ ୬ଟି ଓଡ୍ରାଫ ଟିମ୍ର ୫୦ରୁ ଊର୍ଦ୍ଧ୍ୱ କର୍ମଚାରୀଙ୍କ ସହ ଅଗ୍ନିଶମ, ୬୦୦ ବନ କର୍ମଚାରୀ କାର୍ଯ୍ୟ କରୁଛନ୍ତି ା ଦକ୍ଷିଣରେ ଥିବା ଜେନାବିଲ, ଡୁକୁରା, ନଅଁଣା ସାଉଥ୍ ଓ ନର୍ଥ, ଉପରବାରାହାକୁମଡ଼ା, କେନ୍ଦୁମୁଣ୍ଡି, ପିଠାବଟା, ଚହଲା ଓ ଜାତୀୟ ଉଦ୍ୟାନ ରେଞ୍ଜର ବିଭିନ୍ନ ସେକ୍ସନର ବିଟ୍ରେ ଏହି ନିଆଁ ଦେଖିବାକୁ ମିଳୁଛି। ତେବେ ବୁଧବାର ୪୭, ଗୁରୁବାର ୩୭ ଓ ଶୁକ୍ରବାର ୫୧ଟି ସ୍ଥାନରେ ନିଆଁ ଜଳୁଥିବା ବେଳେ ସେଗୁଡିକୁ ଆୟତ୍ତ କରିବା ପାଇଁ ଅକ୍ଳାନ୍ତ ପରିଶ୍ରମ ଜାରି ରହିଛି ା ତେବେ ବର୍ଷା ଅଭାବରୁ ଶୁଖିଲା ପଡିଥିବା ଜଙ୍ଗଲର କାଠପତ୍ର ଖୁବ୍ଶୀଘ୍ର ନିଆଁରେ ପୋଡ଼ିଯାଉଛି। ତେବେ ନିଆଁ ଲାଗିବାର କାରଣ ଖୋଜି ବାହାର କରିବା ସହିତ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ପରିବେଶବିତ୍ମାନେ ଦାବି କରୁଛନ୍ତି। ଏକ ମାସ ଧରି ବିଭାଗ ପକ୍ଷରୁ ବ୍ୟାପକ ଜନସଚେତନତା କାର୍ଯ୍ୟକ୍ରମ ଜାରି ରହିବା ପରେ ମଧ୍ୟ ନିଆଁ ଲାଗିବା ବନ୍ଦ ହେଉନି। ଯଦି ଏବେଠାରୁ ଆବଶ୍ୟକ ପଦକ୍ଷେପ ଗ୍ରହଣ କରା ନ ଯାଏ ତେବେ ଅଭୟାରଣ୍ୟ ଜଳି ପାଉଁଶ ହୋଇଯିବ ବୋଲି ଅଞ୍ଚଳବାସୀ ପ୍ରକାଶ କରିଛନ୍ତି।
