ବାରିପଦା ଅଫିସ,୪।୪: ଶିମିଳିପାଳରେ ଦିନରାତି ନିଆଁ ଜଳୁଛି। ସବୁଜ ସୁନ୍ଦର ଏହି ଅଭୟାରଣ୍ୟକୁ ଗ୍ରାସ କରିଚାଲିଛି ବାନାଗ୍ନି। ସରୀସୃପଠାରୁ ଆରମ୍ଭ କରି ବନ୍ୟଜନ୍ତୁମାନେ ନିଆଁ ଯୋଗୁ ବେଶ୍ ପ୍ରଭାବିତ ହୋଇଛନ୍ତି। ଗତ ୪ ଦିନ ହେଲା ଅଭୟାରଣ୍ୟର ବିଭିନ୍ନ ସ୍ଥାନରେ ନିଆଁ ଜଳୁଥିବା ବେଳେ ଏହାକୁ ଆୟତ୍ତ କରିବାରେ ବନ କର୍ମଚାରୀ, ଓଡ୍ରାଫ୍ ଟିମ୍ ଓ ସ୍ଥାନୀୟ ଜନସାଧାରଣ ପ୍ରୟାସ ଜାରି ରଖିଛନ୍ତି। ଶନିବାର ୨୨ଟି ସ୍ଥାନରେ ଜଙ୍ଗଲ ଜଳୁଥିବା ନେଇ ବ୍ୟାଘ୍ର ସଂରକ୍ଷଣ ପ୍ରକଳ୍ପର କ୍ଷେତ୍ର ନିର୍ଦ୍ଦେଶକ ଏମ.ଜଗଜୟାନନ୍ଦ କହିଛନ୍ତି । ଅଭୟାରଣ୍ୟର ଦକ୍ଷିଣ ଡିଭିଜନର ୧୦ ଓ ଉତ୍ତର ଡିଭିଜନର ୧୨ଟି ସ୍ଥାନରେ ନିଆଁ ଲାଗିଛି। ଦକ୍ଷିଣରେ ଥିବା ଡୁକୁରା, ଜେନାବିଲ, ପିଠାବଟା ରେଞ୍ଜ ଓ ଉତ୍ତରରେ ଥିବା ନଅଁଣା ସାଉଥ୍, କେନ୍ଦୁମୁଣ୍ଡି ରେଞ୍ଜରେ ନିଆଁ ଲାଗଛି। ବୁଧବାରଠାରୁ ଶନିବାର ମଧ୍ୟରେ ଅଭୟାରଣ୍ୟର ୧୫୭ଟି ସ୍ଥାନରେ ନିଆଁ ଲାଗିଥିବା ସୂଚନା ମିଳିଛି। ନିଆଁ ସାଙ୍ଗକୁ ପ୍ରଚଣ୍ଡ ରୌଦ୍ରତାପରେ ବନ୍ୟଜନ୍ତୁ ଅସୁରକ୍ଷିତ ଅବସ୍ଥାରେ ଘୁରି ବୁଲୁଛନ୍ତି। ଏହାର ସୁଯୋଗ ନେଇ ଶିକାରୀମାନେ ସେମାନଙ୍କୁ ଶିକାର କରୁଛନ୍ତି। ଅଭୟାରଣ୍ୟର ସୁରକ୍ଷା ଦିଗରେ ଆବଶ୍ୟକ କର୍ମଚାରୀ ନିୟୋଜିତ କରିବା ପାଇଁ ପ୍ରାକ୍ତନ ଅବୈତନିକ ବନ୍ୟପ୍ରାଣୀ ସଂରକ୍ଷକ ଭାନୁମିତ୍ର ଆଚାର୍ଯ୍ୟ ଦାବି କରିଛନ୍ତି। ତେବେ ଶନିବାର ଅପରାହ୍ନରେ ଯଶିପୁର ଅଞ୍ଚଳରେ କୁଆପଥର ସହ ପ୍ରବଳ ବର୍ଷା ହୋଇଛି । ଆକାଶ ମେଘାଚ୍ଛନ୍ନ ରହିଥିବା ବେଳେ ସ୍ଥାନେସ୍ଥାନେ ସାମାନ୍ୟ ବର୍ଷା ହୋଇଥିବା ଜଣାପଡ଼ିଛି। ବନବିଭାଗ ପକ୍ଷରୁ ଅଭୟାରଣ୍ୟ ସଂଲଗ୍ନ ଅଞ୍ଚଳଗୁଡ଼ିକରେ ଶିମିଳିପାଳ ସୁରକ୍ଷା ଅଭିଯାନ କାର୍ଯ୍ୟକ୍ରମ ଜାରି ରହିଛି। ବନକର୍ମଚାରୀମାନେ ଗଁା ଗଁା ବୁଲି ଲୋକମାନଙ୍କୁ ଜଙ୍ଗଲର ସୁରକ୍ଷା ଦିଗରେ ସଚେତନ କରୁଥିବା ଦେଖିବାକୁ ମିଳୁଛି।
