ଛତ୍ରପୁର, ୬।୭(ଦିଲ୍ଲୀପ ସାମଲ): ଗଞ୍ଜାମ ଜିଲା ପୁରୁଷୋତ୍ତମପୁର ବ୍ଲକ ଅନ୍ତର୍ଗତ ବାଘଳା ପଂଚାୟତର ପାଲିଆମ୍ମା ଗ୍ରାମର ମା’ କାଳୀଜାଇ ସ୍ବୟଂ ସହାୟିକା ଗୋଷ୍ଠୀର ଋଣ ଟଙ୍କା ସିଆରପି ଏବଂ ବ୍ୟାଙ୍କ ମ୍ୟାନେଜର ମିଳିତ ଭାବେ ହେରଫେର୍ କରିଥିବା ନେଇ ଏସଏଚଜି ଗ୍ରୁପର ବହୁ ମହିଳାମାନେ ଜିଲାପାଳଙ୍କ ଦ୍ୱାରସ୍ଥ ହୋଇଛନ୍ତି । ଜିଲାପାଳଙ୍କ ଅନୁପସ୍ଥିତିରେ ଅତିରିକ୍ତ ଜିଲାପାଳ ( ସାଧାରଣ) ସଚ୍ଚିଦାନନ୍ଦ ନାୟକଙ୍କୁ ଭେଟି ଲିଖିତ ଦାବିପତ୍ର ପ୍ରଦାନ କରିଛନ୍ତି । ସରକାରଙ୍କ ପକ୍ଷରୁ ଏସଏଚଜି ଗ୍ରୁପ୍ମାନଙ୍କୁ ଋଣ ଦେଇ ସ୍ବାବଲମ୍ବୀ କରିବା ନିମନ୍ତେ ବିଭିନ୍ନ ସୁବିଧା କରିଥିବା ବେଳେ ତାହାକୁ ବାଟମାରଣା କରାଯାଉଛି । କିଛି ଅଶିକ୍ଷିତ ଏବଂ ବୟସ୍କ ମହିଳାମାନେ ଏହାର ଶିକାର ହେଉଛନ୍ତି । ମା କାଳୀଜାଇ ସ୍ବୟଂ ସହାୟିକା ଗୋଷ୍ଠୀ ପକ୍ଷରୁ ଏପରି ଘଟଣାର ଅଭିଯୋଗ ଆସିଛି । ସେମାନେ ୧୦ ଲକ୍ଷ ଟଙ୍କା ଋଣ ଆଣିବା ନିମନ୍ତେ ଓଡ଼ିଶା ଗ୍ରାମୀଣ ବ୍ୟାଙ୍କ ଯାଇଥିଲେl ମାତ୍ର ସେମାନଙ୍କୁ ୧୦ ଲକ୍ଷ ଟଙ୍କା ବଦଳରେ ୯ ଲକ୍ଷ ୩୯ ହଜାର ୧୫୪ ଟଙ୍କା ଦିଆଯାଇଛି l ଏହାସହ ଜଣଙ୍କୁ ୮୨ ହଜାର ଟଙ୍କା ଦିଆଯାଇଛି । ଏ ସମ୍ପର୍କରେ ଗ୍ରୁପ ସଭାନେତ୍ରୀ, ସମ୍ପାଦିକା, ସିଆରପି ଏବଂ ବ୍ୟାଙ୍କ ମ୍ୟାନେଜରଙ୍କୁ ପଚାରିଥିଲେ ମଧ୍ୟ କିଏ ବି ସଠିକ୍ ଉତ୍ତର ଦେଉ ନାହାନ୍ତି । ଏଣୁ ଏହାର ସଠିକ୍ ଭାବେ ତଦନ୍ତ କରି ନ୍ୟାୟ ପ୍ରଦାନ କରିବା ନିମନ୍ତେ ସେମାନେ ଅନୁରୋଧ କରିଛନ୍ତି ।
Odisha’s No.1 Odia Daily
