ନୂଆଦିଲ୍ଲୀ,୫।୪: ଗୁରୁବାର ଆଇପିଏଲ ୨୦୨୪ରେ ପଞ୍ଜାବ କିଙ୍ଗସ ସବୁଠୁ ବଡ ଲକ୍ଷ୍ୟ ହାସଲ କରିଛି । ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଏକ ରୋମାଞ୍ଚକର ମ୍ୟାଚରେ ପଞ୍ଜାବ କିଙ୍ଗସ ଗୋଟିଏ ବଲରେ ଗୁଜୁରାଟ ଟାଇଟାନ୍ସକୁ ତିନି ୱିକେଟରେ ପରାସ୍ତ କରିଛି।
ଅଲରାଉଣ୍ଡର ଶଶାଙ୍କ ସିଂ ପଞ୍ଜାବ କିଙ୍ଗ୍ସର ବିଜୟର ହିରୋ ଥିଲେ, ଯିଏ ୬ ଟି ଚୌକା ଓ ୪ଛକା ସହାୟତାରେ ୨୯ବଲରେ ଅପରାଜିତ ୬୧ ରନ ସ୍କୋର କରିଥିଲେ। ତାଙ୍କ ଇନିଂସ ସହାୟତାରେ ପଞ୍ଜାବ କିଙ୍ଗ୍ସ ସଫଳତାର ସହ ୨୦୦ ରନ ହାସଲ କରିଥିଲା। ଏକ ସମୟରେ ପଞ୍ଜାବ ଦଳ ୭୦ ରନ ପାଇଁ ଚାରିଟି ୱିକେଟ ହରାଇଥିଲା ଏବଂ ପରେ ଲାଗୁଥିଲା ଯେ କ୍ରମାଗତ ତୃତୀୟ ପରାଜୟର ସାମ୍ନା କରିବାକୁ ପଡିବ।
ତେବେ ଶଶାଙ୍କ ସିଂ ଏବଂ ଆଶୁତୋଷ ଶର୍ମାଙ୍କର ଅନ୍ୟ ଉଦ୍ଦେଶ୍ୟ ଥିଲା ଏବଂ ଉଭୟ ପଞ୍ଜାବକୁ ଏକ ରୋମାଞ୍ଚକର ବିଜୟ ଆଡକୁ ନେଇଥିଲେ। ଯେତେବେଳେ ଶଶାଙ୍କ ସିଂ ଦର୍ଶନ ନାଲକାଣ୍ଡେଙ୍କ ଓଭରର ପଞ୍ଚମ ବଲରେ ବିଜୟ ରନ ସ୍କୋର କରିଥିଲେ, ପଞ୍ଜାବ କିଙ୍ଗ୍ସର ସହ-ମାଲିକ ତଥା ବଲିଉଡ ଅଭିନେତ୍ରୀ ପ୍ରୀତି ଜିଣ୍ଟା ଆନନ୍ଦରେ ନିଜ ଚେୟାରରୁ ଡେଇଁପଡି ଷ୍ଟାଣ୍ଡରୁ ବିଜୟ ଉତ୍ସବ ପାଳନ କରିବାକୁ ଲାଗିଲେ। ପ୍ରୀତି ଜିଣ୍ଟାଙ୍କ ଏହି ମଜାଳିଆ ଶୈଳୀର ଭିଡିଓ ଭାଇରାଲ ହୋଇଛି।
ସୂଚନାଯୋଗ୍ୟ, ଗତ ବର୍ଷ ଆଇପିଏଲ ନିଲାମରେ ଶଶାଙ୍କ ସିଂଙ୍କୁ କିଣିବାରେ କିଛି ଦ୍ୱନ୍ଦ୍ୱ ରହିଥିଲା। ପଞ୍ଜାବ କିଙ୍ଗ୍ସ ଶଶାଙ୍କ ସିଂଙ୍କୁ ଭୁଲରେ ସେମାନଙ୍କ କ୍ୟାମ୍ପରେ ଅନ୍ତର୍ଭୁକ୍ତ କରିଥିଲା। ଏହା ଅନେକ ହେଡଲାଇନ ସୃଷ୍ଟି କରିଥିଲା ଏବଂ ବର୍ତ୍ତମାନ କ୍ରିକେଟର ତାଙ୍କ ପ୍ରଦର୍ଶନରେ ସମସ୍ତଙ୍କୁ ଚୁପ କରାଇ ଦେଇଛନ୍ତି। ଶଶାଙ୍କ ସିଂ ମାତ୍ର ୨୯ ବଲରେ ୬ ଚୌକା ଓ ଚାରି ଛକା ସହାୟତାରେ ଅପରାଜିତ ୬୧ ରନ ସ୍କୋର କରି ଦଳକୁ ବିଜୟ ଆଡକୁ ନେଇଥିଲେ।
