ପାର୍ଲ,୨୦।୧: ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଦିନିକିଆରେ ବଲ ସହ ପ୍ରଦର୍ଶନ କରିବାରେ ବିଫଳ ହୋଇଥିବା ଭାରତୀୟ ଅଲରାଉଣ୍ଡର ଶାର୍ଦ୍ଦୁଳ ଠାକୁର ନିମ୍ନକ୍ରମରେ ବ୍ୟାଟିଂ କରିବାକୁ ଆସି ଅର୍ଦ୍ଧଶତକୀୟ ଇନିଂସ ଖେଳିଥିଲେ। ତାଙ୍କର ଏହି ଇନିଂସ ଭାରତୀୟ ଦଳକୁ ପରାଜୟରୁ ବଞ୍ଚାଇ ପାରି ନ ଥିଲା। ମାତ୍ର ତାଙ୍କ ଯୋଗୁ ପରାଜୟର ବ୍ୟବଧାନ ହ୍ରାସ ପାଇଥିଲା। ଏଥିଯୋଗୁ ସେ ସବା କରିମ, ଲାନ୍ସ କ୍ଲୁଜନର, ଆଣ୍ଡ୍ର୍ୟୁ ହଲ ଓ ରିୟାନ ମ୍ୟାକ୍ଲରେନ ବ୍ୟାଟରଙ୍କ ତାଲିକାରେ ସାମିଲ ହୋଇଛନ୍ତି।
ଭାରତୀୟ ଦଳ ୨୧୪ ରନ୍ରେ ୮ମ ଉଇକେଟ ହରାଇଥିଲା। ଦଳକୁ ଜିତିବା ପାଇଁ ୮୩ ରନ୍ ଦରକାର ଥାଏ। ମ୍ୟାଚ୍ ସମ୍ପୂର୍ଣ୍ଣ ରୂପେ ଘରୋଇ ଦଳର ହାତରେ ଥିଲା। ଏଭଳି ପରିସ୍ଥିତିରେ ୯ମ ଉଇକେଟ ପାଇଁ ଯଶପ୍ରୀତ ବୁମରାଙ୍କ ସହ ମିଶି ଶାର୍ଦ୍ଦୁଳ ୪୬ ବଲରେ ଯୋଡ଼ିଥିଲେ ୫୧ ରନ୍। ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଇଥିବା ଦିନିକିଆ ଇତିହାସରେ ୯ମ କ୍ରମରେ ବ୍ୟାଟିଂ କରିବାକୁ ଆସି ଅର୍ଦ୍ଧଶତକ ହାସଲ କରିବାରେ ଶାର୍ଦ୍ଦୁଳ ୫ମ ବ୍ୟାଟର। କ୍ଲୁଜନର ୨୦୦୦ରେ ନାଗପୁରଠାରେ ୭୫*, ମ୍ୟାକଲରେନ ୨୦୧୩ରେ କାର୍ଡିଫଠାରେ ୭୧*, ହଲ ୨୦୦୬ରେ କେପ ଟାଉନରେ ୫୬, କରିମ ୧୯୯୭ରେ ବ୍ଲୁମଫୋନଟେନ ୫୫ ରନ୍ର ପାଳି ଖେଳିଥିଲେ।
