ମୁମ୍ବାଇ,୧ ।୫: କିଛିଦିନ ହେବ ସାରା ଦେଶରେ ସାଂପ୍ରଦାୟିକ ହିଂସା ଓ ଏହା ଉପରେ ଆଲୋଚନା ବଢିବାରେ ଲାଗିଛି । ଉତ୍ସବ ସମୟରେ ପଥରମାଡ ହେଉ ଅବା ଲାଉଡସ୍ପିକର ବିବାଦ ପୁଣି ହନୁମାନ ଚାଳିଶାକୁ ନେଇ ବିବାଦ । ଏମିତି ସବୁ ବିଷୟକୁ ନେଇ ରାଜନୀତିର ପାଣିପାଗ ବେଳକୁ ବେଳ ଉଷ୍ମ ହେବାରେ ଲାଗିଛି । ଏବେ ଏହାକୁ ନେଇ ଏନସିପି ମୁଖ୍ୟ ଶରଦ ପାୱାର ଏକ ବୟାନ ଦେଇଛନ୍ତି । ସେ କହିଛନ୍ତି ଆବଶ୍ୟକ ବିଷୟକୁ ବାଦ ଦେଇ ଦେଶରେ ଜାତି ଓ ଧର୍ମ ଭଳି ବିଷୟକୁ ନେଇ ଆଲୋଚନା ସମାଲୋଚନା ଚାଲିଛି, ଯାହା ଦେଶକୁ ପଛକୁ ଟାଣୁଛି ।
ବରିଷ୍ଠ ନେତା ପାୱାର କହିଛନ୍ତି, କିଛିଦିନ ହେବ ଦେଶରେ ଜାତି ଓ ଧର୍ମକୁ ନେଇ ଟଣା ଭିଡା ଚାଲିଛି । ହେଲେ ମୁଖ୍ୟ ବିଷୟକୁ ଯେମିତି ସମସ୍ତେ ଭୁଲି ଯାଇଛନ୍ତି । ଦେଶରେ ଦରଦାମ ବୃଦ୍ଧି, ବେକାରୀ ଭଳି ସମସାକୁ ନେଇ କଥା ହେବା ବା ଆଲୋଚନା ହେବା ଜରୁରୀ, ହେଲେ କେହି ଏପଟକୁ ଧ୍ୟାନ ଦେଉନାହାନ୍ତି । ଏହା ପୂର୍ବରୁ ମଧ୍ୟ ପାୱାର କହିଥିଲେ ରାଜଧାନୀ ଦିଲ୍ଲୀ ଭଳି ମହାରାଷ୍ଟ୍ରରେ ବି ସାଂପ୍ରଦାୟିକ ହିଂସା ବଢାଇବାକୁ ଚେଷ୍ଟା କରାଯାଉଛି । ଲଗାତାର ଭାବେ ଲୋକ ଓ ସମାଜକୁ ଉସକାଇବା ଭଳି କାମ କରାଯାଉଛି । ପରିସ୍ଥିତିକୁ ଖରାପ କରିବାକୁ ଚେଷ୍ଟା କରାଯାଉଛି । ହେଲେ ହିନ୍ଦୁ-ମୁସଲିମ ସମାଜରେ ଭାଇଚାର ବଜାୟ ରଖିବା ଦରକାର ।
