କେନ୍ଦୁଝର,୨୭ା୯(ନରେଶ ଚନ୍ଦ୍ର ପଟ୍ଟନାୟକ): ହରିଚନ୍ଦନପୁର ବ୍ଲକ ବଡ଼ପଳାଶପାଳ ପଞ୍ଚାୟତର ଗରଗଡ଼ ବାହାଳ ଗ୍ରାମର ସରକାରୀ ପ୍ରାଥମିକ ବିଦ୍ୟାଳୟରେ ବୁଧବାର ଏକ ଲଜ୍ଜାଜନକ ଘଟଣା ଦେଖିବାକୁ ମିଳିଛି। ଆଜ ସକାଳ ପ୍ରାୟ ୯.୩୦ରେ ବିଦ୍ୟାଳୟର ପ୍ରଧାନଶିକ୍ଷକ ନିଶାଶକ୍ତ ହୋଇ ସ୍କୁଲ ଆସିଥିଲେ। ନିଶାରେ ଟଳମଳ ହୋଇ ବହୁ କଷ୍ଟରେ ଗେଟ୍ ଖୋଲି ଭିତରକୁ ପଶିଥିଲେ। କିନ୍ତୁ ସ୍କୁଲ ବାରଣ୍ଡା ରେ ପହଞ୍ଚିିବା ପୂର୍ବରୁ ତଳେ ପଡ଼ିଯାଇଥିଲେ। ପ୍ରଧାନଶିକ୍ଷକ ବସନ୍ତ କୁମାର ମୁଣ୍ଡାଙ୍କ ଏଭଳି ଅବସ୍ଥାକୁ କୁନି କୁନି ପିଲାମାନେ ଦେଖୁଥିଲେ। ସାର୍ଙ୍କ ଏଭଳି ଅବସ୍ଥା ଦେଖି ପିଲାମାନେ କିଛି ବୁଝି ପାରୁ ନ ଥିଲେ। ପରେ ଗ୍ରାମରେ ଜଣାଇଥିଲେ। ବିଦ୍ୟାଳୟ ପରିସରରେ ଏକ ଗଛ ମୂଳରେ ଗଡୁଥିବା ଦେଖି ଗ୍ରାମବାସୀ ପହଞ୍ଚି ପାଣି ସିଞ୍ଚି ଉଠାଇବାକୁ ଚେଷ୍ଟା କରିଥିଲେ ହେଁ ଦୀର୍ଘ ଘଣ୍ଟା ଧରି ଉଠିପାରି ନ ଥିଲେ। ଗ୍ରାମବାସୀ ପ୍ରଧାନଶିକ୍ଷକଙ୍କ ଏଭଳି ଅବସ୍ଥା ଦେଖି ଗାଳିଗୁଲଜ କରିଥିଲେ। କେତେକ ଭିଡିଓ ରେକର୍ଡ କରି ଭାଇରାଲ କରିଥିଲେ। ଘଟଣାର ଭିଡିଓ ଚାରିଆଡ଼େ ଭାଇରାଲ ହେବା ପରେ ଅଭିଭାବକମାନେ ବ୍ଲକ ଶିକ୍ଷା ଅଧିକାରୀଙ୍କୁ ସୂଚନା ଦେଇଥିଲେ।
ଏହି ସ୍କୁଲରେ ପ୍ରଥମରୁ ପଞ୍ଚମ ଶ୍ରେଣୀରେ ପାଖାପାଖି ଶହେ ପିଲା ପଢୁଛନ୍ତି। ଏହି ସ୍କୁଲରେ ପ୍ରଧାନଶିକ୍ଷକଙ୍କୁ ମିଶାଇ ଦୁଇ ଜଣ ଶିକ୍ଷକ ଥିବା ବେଳେ ଏଭଳି ମଦ୍ୟପାନ କରି ଶିକ୍ଷକ ବିଦ୍ୟାଳୟକୁ ଆସିବା ଫଳରେ ପିଲାମାନଙ୍କ ଉପରେ ଖରାପ ପ୍ରଭାବ ପଡୁଛି। ଏଣୁ ଏହାର ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଭିଭାବକମାନେ ଦାବି କରିଛନ୍ତି। ଏନେଇ ଜିଲା ଶିକ୍ଷା ଅଧିକାରୀ ଗୌରୀରାଣୀ ନାୟକ କହିଛନ୍ତି, ଘଟଣା ସମ୍ପର୍କରେ ଅବଗତ ଅଛନ୍ତି। ଏନେଇ ବ୍ଲକ ଶିକ୍ଷା ଅଧିକାରୀ ତଦନ୍ତ କରିବାକୁ ସ୍ଥାନୀୟ ସିଆରସିସିଙ୍କୁ ପଠାଇଛନ୍ତି। ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ତେବେ ବିଦ୍ୟାଳୟରେ ପାଠ ପଢ଼ା ହୋଇଥିଲା ଏବଂ ପିଲାମାନଙ୍କୁ ମିଡ୍ ଡେ’ ମିଲ୍ ଦିଆଯାଇଥିବା ସେ କହିଛନ୍ତି।
