ମୁମ୍ବାଇ, ୧୨। ୩: ଦେଶରେ ରେଳ ଯାତ୍ରାକୁ ସୁଗମ କରିବା ପାଇଁ କେନ୍ଦ୍ର ସରକାରଙ୍କ ତରଫରୁ ଅନେକ ଯୋଜନା ପ୍ରସ୍ତୁତ କରାଯାଉଛି। ନୂଆ ଜ୍ଞାନ କୌଶଳରେ ନିର୍ମିତ ଟ୍ରେନ୍ ମଧ୍ୟ ଦେଶର ବହୁ ପ୍ରାନ୍ତରେ ଚାଲିବା ଆରମ୍ଭ ହେଲାଣି। ଏପରି କି ଭାରତୀୟ ରେଳ ବ୍ୟବସ୍ଥାକୁ ବିଶ୍ୱରେ ଏକ ନମ୍ବର କରିବା ଦିଗରେ ସରକାର ନାନା ରକମର ପ୍ରସ୍ତୁତି ଆରମ୍ଭ କରିଛନ୍ତି। ଏତେସବୁ ସୁବିଧା ପରେ ମଧ୍ୟ ମହାରାଷ୍ଟ୍ରର ଶକୁନ୍ତଳା ରେଲ୍ଓ୍ବେ ଏବେ ବି ବ୍ରିଟିଶ୍ କମ୍ପାନୀ ଅଧୀନରେ ରହିଛି। ମହାରାଷ୍ଟ୍ରର ୟାଭତମାଲରୁ ମୂର୍ତ୍ତିଜାପୁର ପର୍ଯ୍ୟନ୍ତ ପ୍ରାୟ ୧୯୦ କିଲୋମିଟର ଦୂର ଏହି ରେଳଧାରଣା ଲମ୍ବିଛି। ବ୍ରିଟିଶ୍ ସରକାର ଭାରତକୁ ଶାସନ କରିବା ସମୟରେ ଏହି ରେଲ୍ଓ୍ବେ ନିର୍ମାଣ କରାଯାଇଥିଲା।
୧୯୫୨ରେ ଭାରତ ସରକାରଙ୍କ ପକ୍ଷରୁ ଦେଶର ସମସ୍ତ ରେଳ ଲାଇନ୍କୁ ଜାତୀୟକରଣ କରାଯାଇଥିଲା। ସେ ସମୟରେ ସରକାର ଶକୁନ୍ତଳା ରେଳଷ୍ଟେଶନ୍କୁ ତାଲିକା ଭୁକ୍ତ କରି ନ ଥିଲେ, ଯଦ୍ଦ୍ବାରା ଏହି ରେଳଧାରଣାରେ ଟ୍ରେନ୍ ଚଳାଚଳ ବାବଦକୁ ସରକାର ବାର୍ଷିକ ୧ କୋଟି ଟଙ୍କା ଦେଉଛନ୍ତି। ୧୯୧୦ ମସିହାରେ କିଲ୍ଲିକ୍-ନିକ୍ସୋନ୍ ନାମକ ଏକ ଘରୋଇ ପ୍ରାଇଭେଟ୍ କମ୍ପାନୀ ଶକୁନ୍ତଳା ରେଲ୍ଓ୍ବେ ନିର୍ମାଣ କରିଥିଲା। ଶକୁନ୍ତଳା ଷ୍ଟେସନରୁ ବାହାରି ଅଧିକାଂଶ ଯାତ୍ରୀ ୟଭତମାଲରୁ ଅମରାବତୀ ଜିଲା ଅଚଲପୁର ଗାଁକୁ ଯାତାୟାତ କରିଥାନ୍ତି। ଏଥିରେ ପାଖାପାଖି ୨୦ ଘଣ୍ଟା ସମୟ ଲାଗିଥାଏ। ଏହି ଦୁଇ ଗାଁର ଲୋକଙ୍କ ପାଇଁ ଏହି ରେଳପଥ ଏକମାତ୍ର ମାଧ୍ୟମ। ରେଲ୍ଓ୍ବେରେ ଚଳାଚଳ କରୁଥିବା ଟ୍ରେନ୍ରେ ବାଷ୍ପଚାଳିତ ଇଞ୍ଜିନ୍ ଖଞ୍ଜାଯାଇଥିଲା, ଯାହା ୧୯୨୧ରେ ମନ୍ଚେଷ୍ଟରରେ ନିର୍ମାଣ ହୋଇଥିଲା। ଏହାର ୭୦ ବର୍ଷ ପରେ ଅର୍ଥାତ୍ ୧୯୯୪ ଏପ୍ରିଲ ୧୫ରେ ଇଞ୍ଜିନ୍ ବଦଳାଇ ଟ୍ରେନ୍ରେ ଡିଜେଲ୍ ଇଞ୍ଜିନ୍କୁ ଲଗାଯାଇଥିଲା। ସାଧାରଣ ରେଲ୍ଓ୍ବେ ତୁଳନାରେ ଶକୁନ୍ତଳା ରେଲଓ୍ବେ ଅପେକ୍ଷାକୃତ ସଙ୍କୀର୍ଣ୍ଣ। ତେବେ ବ୍ରିଟିଶ ସରକାର ଏହି ରେଳବାଇକୁ ୟଭତମାଲରୁ ମୁମ୍ବାଇ ତୁଳା ଟ୍ରାନ୍ସପୋର୍ଟ ପାଇଁ ନିର୍ମାଣ କରିଥିଲେ। କିନ୍ତୁ ପରବର୍ତ୍ତୀ ସମୟରେ ଏଥିରେ ଲୋକ ଯିବାଆସିବା ଆରମ୍ଭ କଲେ। ଶକୁନ୍ତଳା ରେଳ ଷ୍ଟେଶନରେ ଏବେ ୭ କର୍ମଚାରୀ କାର୍ଯ୍ୟରତ ଅଛନ୍ତି। ୟଭତମାଲରୁ ଅଚଲପୁର ଯିବା ପାଇଁ ଟିକେଟ୍ ଭଡ଼ା ୧୫୦ ଟଙ୍କା। ଏହି ସଙ୍କୀର୍ଣ୍ଣ ରେଳବାଇର ଉନ୍ନତିକରଣ ପାଇଁ ପୂର୍ବତନ ରେଳମନ୍ତ୍ରୀ ସୁରେଶ ପ୍ରଭୁ ୧୫,୦୦୦ କୋଟି ଟଙ୍କା ବ୍ୟୟ ବରାଦ କରିଥିଲେ।
