ଢେଙ୍କାନାଳ ଅଫିସ, ୧୨।୩ ଢେଙ୍କାନାଳରେ ଥିବା ଜିଲାର ଏକମାତ୍ର ଜନଜାତି ସଂଗ୍ରହାଳୟର କଳେବର ବଦଳିବ। ପର୍ଯ୍ୟଟକ, ଛାତ୍ରୀଛାତ୍ରଙ୍କୁ ଆକର୍ଷିତ କରିବା ଲାଗି ଏଠାରେ ଆବଶ୍ୟକ ଭିତ୍ତିଭୂମିର ବିକାଶ କରାଯିବ। ଏଥିଲାଗି ଜିଲା ପ୍ରଶାସନ ପକ୍ଷରୁ ନୀଳନକ୍ସା ପ୍ରସ୍ତୁତ କରାଯାଇଥିବାବେଳେ ନିକଟରେ ଜିଲାପାଳ ସରୋଜ କୁମାର ସେଠୀ ଏହାର ସମୀକ୍ଷା କରିଛନ୍ତି।
ଢେଙ୍କାନାଳ ବଳରାମ ମନ୍ଦିର ନିକଟରେ ଥିବା ଜନଜାତି ସଂଗ୍ରହାଳୟ ଆଦିମ ଜନଜାତିଙ୍କ କାହାଣୀ ବଖାଣୁଛି। ଏଠାରେ ପ୍ରଦର୍ଶିତ ହେଉଛି ଜିଲାର ବିଭିନ୍ନ ଆଦିବାସୀ ସମ୍ପ୍ରଦାୟ ବ୍ୟବହାର କରୁଥିବା ବାଦ୍ୟଯନ୍ତ୍ର, ପାରମ୍ପରିକ ଅସ୍ତ୍ରଶସ୍ତ୍ର, ବେଶ ପୋଷାକ, ବାଉଁଶ ତିଆରି ମାଛଧରା ଉପକରଣ, ମାଟିପାତ୍ର ସମେତ ସେମାନେ ଦୈନନ୍ଦିନ ବ୍ୟବହାର କରୁଥିବା ଉପକରଣ। ଏଥିସହ ମୁଣ୍ଡାଘର, ସାନ୍ତାଳୀ ଘର, ଜୁଆଙ୍ଗ ଘରର ନମୁନା ମଧ୍ୟ ରହିଛି। ବନବାସୀଙ୍କ ଜନଜୀବନର ଗହନ କଥା ଜାଣିବା ଲାଗି ବିଭିନ୍ନ ସମୟରେ ଏଠାକୁ ଆସିଥାଆନ୍ତି ପର୍ଯ୍ୟଟକ, ଗବେଷକ ଏବଂ ଛାତ୍ରୀଛାତ୍ର। ତେଣୁ ଏହାକୁ ଜନଜାତି ଶିକ୍ଷା ସାଧନ କେନ୍ଦ୍ର ବୋଲି କୁହାଯାଉଛି। ଶିକ୍ଷା ବିଭାଗ ପରିଚାଳନାରେ ଥିବା ଏହି ସଂଗ୍ରହାଳୟକୁ ନୂଆ ରୂପ ଦେବାକୁ ବିଭିନ୍ନ ସମୟରେ ଦାବି ହୋଇ ଆସୁଥିଲା। ବିଳମ୍ବରେ ହେଲେ ବି ଏଥିପ୍ରତି ପ୍ରଶାସନ ଆଗ୍ରହ ଦେଖାଇଛି। ଏହାକୁ ଆକର୍ଷଣୀୟ କରିବା ଲାଗି ଆବଶ୍ୟକ ପଦକ୍ଷେପ ନିଆଯିବ। ଫଳରେ ଢେଙ୍କାନାଳ ଜିଲାରେ କେଉଁ ଆବହମାନ କାଳରୁ ରହି ଆସୁଥିବା ଜନଜାତି ବର୍ଗଙ୍କ ଜୀବନ ଜୀବିକା ସମ୍ପର୍କରେ ଏବେକାର ପିଢ଼ି ଜ୍ଞାନ ଆହରଣ କରିପାରିବେ।
ଚଳିତ ସପ୍ତାହରେ ଜିଲାପାଳ ସେଠୀ ସଂଗ୍ରହାଳୟ ପରିଦର୍ଶନ କରିବା ସହ ଏହାର ବିକାଶ ପାଇଁ କିପରି ଭିତ୍ତିଭୂମି ପ୍ରସ୍ତୁତ ହେବ ସେ ସମ୍ପର୍କରେ ସମୀକ୍ଷା କରିଥିଲେ। ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ମୁଖ୍ୟ କାର୍ଯ୍ୟନିର୍ବାହୀ ତନ୍ମୟ କୁମାର ଦରୱାନ, ଜିଲା ସମନ୍ବୟ ଓ ପରିସଂଖ୍ୟାନ ବିଭାଗ ଉପନିର୍ଦ୍ଦେଶକ ସରୋଜ କୁମାର ସେଠୀ, ଜିଲା ଶିକ୍ଷା ଅଧିକାରୀ ନିବେଦିତା ପାଣି ପ୍ରମୁଖ ଉପସ୍ଥିତ ଥିଲେ। ଖୁବ୍ଶୀଘ୍ର ଜନଜାତି ସଂଗ୍ରହାଳୟକୁ ନୂଆ ରୂପ ଦିଆଯିବ। ଫଳରେ ଏଠାକୁ ଅଧିକ ପର୍ଯ୍ୟଟକ ଆସିବା ଲାଗି ଆଗ୍ରହୀ ହେବେ ବୋଲି ଜିଲା ଶିକ୍ଷାଧିକାରୀ ସୂଚନା ଦେଇଛନ୍ତି।
