ଭଦ୍ରକ,୨୩।୬ (ସନାତନ ରାଉତ): ଭଦ୍ରକ ଉପଖଣ୍ଡ ବିଚାର ବିଭାଗୀୟ ମାଜିଷ୍ଟ୍ରେଟ ଚିନ୍ମୟ କୁମାର ପାଢ଼ୀ ଏକ ଯୌତୁକ ନିର୍ଯାତନା ମାମଲାର ବିଚାର କରି ରାୟ ଶୁଣାଇଛନ୍ତି। ଏହି ମାମଲାରେ ଅଭିଯୋଗକାରୀ ମହିଳାଙ୍କ ସ୍ବାମୀ ଭଦ୍ରକ ଗ୍ରାମାଞ୍ଚଳ ଥାନା ଅଧୀନ ଜଳଙ୍ଗା ଗ୍ରାମର ମୁକ୍ତିକାନ୍ତ ସାହୁ, ଶ୍ୱଶୁର ଭାଗବତ ସାହୁ ଓ ଶାଶୁ ଶାନ୍ତିଲତା ସାହୁଙ୍କୁ ଦୋଷୀ ସାବ୍ୟସ୍ତ କରି କୋର୍ଟ ୨ବର୍ଷ ସଶ୍ରମ କାରାଦଣ୍ଡ ନିର୍ଦ୍ଦେଶ ଦେଇଛନ୍ତି। ଏଥିସହ ୫ହଜାର ଟଙ୍କା ଜରିମାନା ଓ ଅନାଦେୟ ଆଉ ୪ ମାସ ଜେଲ, ଯୌତୁକ ନିର୍ଯାତନା ନିରୋଧ ଆଇନର ଧାରା-୪ ଅନୁଯାୟୀ ୬ ମାସ ସଶ୍ରମ କାରାଦାଣ୍ଡ ଓ ୫ ହଜାର ଟଙ୍କା ଜରିମାନା ଦେବେ।
ସୂଚନାଯୋଗ୍ୟ, ମୁକ୍ତିକାନ୍ତ ଆଗରପଡ଼ା ଥାନା ଅଧୀନ ଚାରିଗଁାର ରେବତୀଙ୍କୁ ୨୦୦୮ ଅଗଷ୍ଟ ୧୩ରେ ବିବାହ କରିଥିଲେ। ବାହାଘର ସମୟରେ ନଗଦ ୫୦ ହଜାର ଟଙ୍କା ଯୌତୁକ ଦାବି କରିଥିଲେ। ସେଥିମଧ୍ୟରୁ ୪୦ ହଜାର ଟଙ୍କା ଦିଆଯାଇଥିବା ବେଳେ ୧୦ ହଜାର ବାକି ରହିଥିଲା। ବିବାହ ପରେ ରେବତୀଙ୍କ ବାପଘର ଲୋକେ ଅବଶିଷ୍ଟ ୧୦ ହଜାର ଟଙ୍କା ନ ଦେବାରୁ ଶାଶୁଘର ପକ୍ଷରୁ ତାଙ୍କୁ ନିର୍ଯାତନା ଦିଆଯାଉଥିଲା। ୨୦୧୦ ମେ ୧ରେ ମୁକ୍ତିକାନ୍ତ ରେବତୀଙ୍କୁ ବାପଘରେ ଛାଡ଼ି ଦେଇ ପରେ ଅନ୍ୟ ଜଣେ ଯୁବତୀଙ୍କୁ ଦ୍ୱିତୀୟ ବିବାହ କରିଥିଲେ। ଏନେଇ ରେବତୀ ଗ୍ରାମାଞ୍ଚଳ ଥାନାରେ ଅଭିଯୋଗ କରିଥିଲେ ମଧ୍ୟ ପୋଲିସ କେସ୍ ରେଜେଷ୍ଟ୍ରି କରି ନ ଥିଲା। ଶେଷରେ କୋର୍ଟରେ କେସ୍ ଦାଖଲ କରିବା ପରେ କୋର୍ଟ ନିର୍ଦ୍ଦେଶ ଅନୁଯାୟୀ ମାମଲା (ନଂ.୨୩୮/୨୦) ରୁଜୁ କରି ପୋଲିସ ସମସ୍ତ ଅଭିଯୁକ୍ତଙ୍କୁ ଗିରଫ କରିଥିଲା।
