କଲମ୍ବୋ,୨।୭: ଚଳିତ ମାସ ଶେଷରେ ହେବାକୁ ଥିବା ସୀମିତ ଓଭର ସିରିଜ ପାଇଁ ଶ୍ରୀଲଙ୍କାର ବିଶ୍ୱକପ୍ ବିଜେତା ଅଧିନାୟକ ଅର୍ଜୁନ ରାଣାତୁଙ୍ଗା ତାଙ୍କ ଦେଶର କ୍ରିକେଟ ବୋର୍ଡର ସମାଲୋଚନା କରିଛନ୍ତି। ସେ ନିଜର ବାସଭବନରେ ଗଣମାଧ୍ୟମକୁ କହିଛନ୍ତି, ଏହା ଦ୍ୱିତୀୟ ଶ୍ରେଣୀର ଭାରତୀୟ ଟିମ୍। ସେମାନେ ଏଠାକୁ ଆସିବା ଆମ କ୍ରିକେଟର ଅପମାନ। ଟେଲିଭିଜନ ମାର୍କେଟିଂର ଆବଶ୍ୟକତା ପୂରଣ କରିବା ପାଇଁ ସେମାନଙ୍କ ସହ ଖେଳିବାକୁ ରାଜି ହୋଇଥିବାରୁ ସେ ବର୍ତ୍ତମାନର ପ୍ରଶାସନକୁ ଦାୟୀ କରିଛନ୍ତି। ଭାରତ ନିଜର ଶ୍ରେଷ୍ଠ ଦଳ ଇଂଲଣ୍ଡକୁ ପଠାଇଛି। ଦୁର୍ବଳ ଦଳକୁ ଏଠାକୁ ପଠାଇଛି। ଏଥିପାଇଁ ସେ ବୋର୍ଡକୁ ଦାୟୀ କରୁଛନ୍ତି ବୋଲି ପ୍ରତିକ୍ରିୟା ଦେଇଛନ୍ତି।
ପ୍ରକାଶ ଯେ, ଜୁଲାଇ ୧୩ରୁ ଭାରତ-ଶ୍ରୀଲଙ୍କା ମଧ୍ୟରେ ୩ଦିନିକିଆ ଏବଂ ସମାନ ସଂଖ୍ୟକ ଟି୨୦ ମ୍ୟାଚ୍ ଖେଳାଯିବ। ଆଗାମୀ ଟେଷ୍ଟ ସିରିଜ ପାଇଁ ଭାରତୀୟ ଅଧିନାୟକ ବିରାଟ କୋହଲି ଏବଂ ସୀମିତ ଓଭର ଉପଅଧିନାୟକ ରୋହିତ ଶର୍ମା ଇଂଲଣ୍ଡ ଗସ୍ତରେ ଅଛନ୍ତି। ଏଣୁ ଶିଖର ଧଓ୍ବନଙ୍କ ନେତୃତ୍ୱରେ ଏକ କମ୍ ଅଭିଜ୍ଞ ଦଳ ଶ୍ରୀଲଙ୍କା ପଠାଯାଇଛି। ଏହି ଟିମ୍ରେ ଅନ୍ତର୍ଜାତୀୟ ମ୍ୟାଚ୍ ଖେଳି ନ ଥିବା ୬ ଖେଳାଳି ଅଛନ୍ତି।
