ଖୋର୍ଦ୍ଧା ଅଫିସ,୨୮ା୫: ରାଜ୍ୟରେ ପ୍ରଚଣ୍ଡ ଗ୍ରୀଷ୍ମ ପ୍ରଭାବ ରହିଛି। ଖୋର୍ଦ୍ଧା ସହର ତାପମାତ୍ରା ୩୮ରୁ ୪୦ ଡିଗ୍ରୀ ରହୁଛି। ପୂର୍ବାହ୍ନ ୧୦ଟା ପରେ ଘରୁ ବାହାରି ହେଉନି। ଲୋକଙ୍କ ପାଇଁ ପୌର ପ୍ରଶାସନ ପକ୍ଷରୁ ଜଳଛତ୍ର ଖୋଲାଯାଇଛି। ତେବେ ପୌର ପ୍ରଶାସନ ପକ୍ଷରୁ ଯଦିଓ କିଛି ସ୍ଥାନରେ ଜୀବଜନ୍ତୁଙ୍କ ଲାଗି ସିମେଣ୍ଟ ପାଣିକୁଣ୍ଡ କରାଯାଇଛି, ତେବେ ତାହା ସମୁଦ୍ରକୁ ଶଙ୍ଖେ ଭଳି। ଥରେ ପାଣି ଭର୍ତ୍ତି କରିବା ପରେ ପ୍ରଶାସନର ଦାୟିତ୍ୱ ସରିଲା। ଗୋରୁଗାଈ, କୁକୁର ପାଣି ପାଇଁ ଏଣେତେଣେ ବୁଲୁଥିବା ଦେଖିବାକୁ ମିଳିଛି। ଏଭଳି ସମୟରେ ଏମାନଙ୍କ ପାଇଁ ସାହାରା ପାଲଟିଛନ୍ତି ଶାନ୍ତିଲତା ବେହେରା। ନିଜର ବୋଲି କେହି ନାହାନ୍ତି। ଖୋର୍ଦ୍ଧାର ରାସ୍ତାକଡ଼, ସରକାରୀ କାର୍ଯ୍ୟାଳୟ ବାରଣ୍ଡା ହେଉଛି ତାଙ୍କ ଘର। ଦୀର୍ଘ ୩୦ ବର୍ଷ ହେବ ଜୀବଜନ୍ତୁଙ୍କ ସେବା କରୁଛନ୍ତି। ଶାନ୍ତିଲତା କେତେବେଳେ ପରିବା ତ ଆଉ କେତେବେଳେ ମାଛ ବିକ୍ରିକରି ରୋଜଗାର କରୁଛନ୍ତି। ରୋଜଗାର ଟଙ୍କା ନିଜ ପାଇଁ ଖର୍ଚ୍ଚ କରିବା ପରିବର୍ତ୍ତେ ଜୀବଜନ୍ତୁଙ୍କ ପିଛା ଖର୍ଚ୍ଚ କରନ୍ତି। ଦୈନିକ ୩ରୁ ୪ଶହ ଟଙ୍କା ଖର୍ଚ୍ଚ କରୁଥିବା ସେ କହିଛନ୍ତି। ଗୋରୁଗାଈଙ୍କ ପାଇଁ ଦୋକାନ ଦୋକାନ ବୁଲି ପନିପରିବା ସଂଗ୍ରହ କରିଥାନ୍ତି। କୁକୁରଙ୍କ ପାଇଁ ପାଉଁରୁଟି, ବିସ୍କୁଟ, ଛଣା ଖାଦ୍ୟ ଯେଉଁଠୁ ପାଇଲେ, ସେମାନଙ୍କୁ ବୁଲି ଦେଉଛନ୍ତି। ଖରାକୁ ଖାତିର ନ କରି ବୁଲି ବୁଲି କୁକୁରଙ୍କୁ ପାଣି ଆଣି ପିଇବା ପାଇଁ ଦେଇଥାନ୍ତି। ବିଭିନ୍ନ ଛକରେ ତାଙ୍କର ଏଭଳି ନୀରବଛିନ୍ନ ସେବା ଜାରି ରହିଥାଏ। ରାସ୍ତାରେ ଯାଉଥିବା ଲୋକେ ମଧ୍ୟ ତାଙ୍କର ଏଭଳି ସେବା ଦେଖି ପ୍ରଶଂସା କରିଥାନ୍ତି। ଅନେକ ଯୁବକ ମଧ୍ୟ ତାଙ୍କୁ ସହଯୋଗର ହାତ ବଢ଼ାଇଥାନ୍ତି। କିଏ ୨୦ ଟଙ୍କା ତ ଆଉ କିଏ ୩୦ ଟଙ୍କା, ଜଳଖିଆ ପୁଡିଆ ଆଣି ଦେଇଥାନ୍ତି। ତେବେ ସେ ଏହାକୁ ସେବା ସମର୍ପଣ ଭାବେ ଗ୍ରହଣ କରି ଜୀବଜନ୍ତୁଙ୍କ ପିଛା ଖର୍ଚ୍ଚ କରନ୍ତି। ରାସ୍ତାକଡ଼ ପଲିଥିନ, ପ୍ଲାଷ୍ଟିକ୍, ମାଟିପତ୍ର ସଂଗ୍ରହ କରି ସେଥିରେ ପାଣି ଭର୍ତ୍ତିକରି କୁକୁରଙ୍କୁ ପିଇବା ପାଇଁ ଦେଇଥାନ୍ତି। କୁକୁରଗୁଡ଼ିକ ମଧ୍ୟ ଯେପରି ତାଙ୍କ ଆସିବା ବାଟକୁ ଅପେକ୍ଷା କରିଥାନ୍ତି। ଏପରିକି ସେ କୁକୁରମାନଙ୍କୁ ଗାଧୋଇ ଦେଇଥାନ୍ତି। ସେ କୁକୁର, ଗୋରୁଗାଈଙ୍କ ନାମକରଣ କରିଛନ୍ତି। ନଁା ଧରି ଡାକିଲେ ସେମାନେ ତାଙ୍କ ନିକଟକୁ ଆସୁଥିବା ଦେଖିବାକୁ ମିଳିଛି।
