ଭଞ୍ଜନଗର,୧୮।୮(ବାବୁଲା ପ୍ରଧାନ): ଭଞ୍ଜନଗର ନିର୍ବାଚନ ମଣ୍ଡଳୀର ଜଣାଶୁଣା ନେତା ତଥା ସାମାଜିକ କର୍ମୀ
ହରିବନ୍ଧୁ ପ୍ରଧାନଙ୍କର (୭୩) ସୋମବାର ପରଲୋକ ଘଟିଛି। ତାଙ୍କର ବିୟୋଗରେ ସଂପୃକ୍ତ ଅଞ୍ଚଳରେ ଶୋକର ଛାୟା ଖେଳିଯାଇଛି। ସେ ଜଣେ ରାଜନେତା ସହ ବିଭିନ୍ନ ଧର୍ମ ଅନୁଷ୍ଠାନ ସହ ଜଡ଼ିତ ଥିଲେ। ଏଥିସହ ମୁଜାଗଡ଼ ଗ୍ରାମ ସଭାପତି, ନାଟ୍ୟ ସଂଘ ସଭାପତି, କୁରୁମ କ୍ଷତ୍ରିୟ ସଂସ୍ଥାର ବିଭିନ୍ନ ପଦପଦବୀରେ ସେ ମଧ୍ୟ ଥିଲେ। ସେ ମୁଜାଗଡ ପଞ୍ଚାୟତରେ ସରପଞ୍ଚ ଭାବେ ଏକାଧିକ ଥର ପ୍ରତିଦ୍ବନ୍ଦିତା କରିଥିଲେ। ଆଜି ସନ୍ଧ୍ୟାରେ କଟକରୁ ତାଙ୍କ ଶବ ଆସି ଗ୍ରାମରେ ପହଞ୍ଚିବା ପରେ ଗ୍ରାମ ଶ୍ମଶାନରେ ଅନ୍ତିମ ସତ୍କାର କରାଯାଇଥିଲା । ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକଙ୍କ ସମେତ ବିଭିନ୍ନ ଦଳର ଅନେକ ସରପଞ୍ଚ, ସମିତିସଭ୍ୟ ପ୍ରମୁଖ ହରିବନ୍ଧୁଙ୍କ ବିୟୋଗରେ ଗଭୀର ଶୋକ ବ୍ୟକ୍ତ କରିଛନ୍ତି। ସୂଚନା ଯୋଗ୍ୟ ଯେ, ହରିବନ୍ଧୁ ଦୁଇଦିନ ପୂର୍ବେ ଅସୁସ୍ଥ ଅନୁଭବ କରିଥିଲେ। ଏହାପରେ ତାଙ୍କୁ ଚିକିତ୍ସା ପାଇଁ କଟକ ବଡ଼ ଡ଼ାକ୍ତରଖାନାରେ ଭର୍ତ୍ତି କରାଯାଇଥିଲା। ଆଜି ତାଙ୍କର ପରଲୋକ ହୋଇଛି। ହରିବନ୍ଧୁ ହେଉଛନ୍ତି ମୁଜାଗଡ ପଂଚାୟତର ପୂର୍ବତନ ସରପଞ୍ଚ ତଥା
ବର୍ତ୍ତମାନର କନ୍ଧମାଳ ଏମପିଙ୍କ ଗଞ୍ଜାମ ଜିଲା ପରିଷଦ ସଭ୍ୟ ଶିବ ଶଙ୍କର ପ୍ରଧାନଙ୍କ ବାପା।
