ଓ୍ବାଶିଂଟନ,୪।୧: ଏପର୍ଯ୍ୟନ୍ତ ଆମେରିକା କେବଳ ଅନ୍ୟ ଦେଶର ଇଞ୍ଜିନିୟର ଏବଂ ଡାକ୍ତରମାନଙ୍କୁ ଆଉଟସୋର୍ସ କରୁଥିଲା। ଏବେ ଆମେରିକା ତା’ର କଏଦୀମାନଙ୍କ ପାଇଁ ଜେଲଗୁଡ଼ିକୁ ଆଉଟସୋର୍ସ କରିପାରିବ। ଆମେରିକା ଏବଂ ଏଲ ସାଲଭାଡୋର ଏକ ଅତ୍ୟନ୍ତ ସ୍ବତନ୍ତ୍ର ଚୁକ୍ତିରେ ପହଞ୍ଚିଛନ୍ତି। ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ଏହାକୁ ଅବୈଧ ପ୍ରବାସୀଙ୍କୁ ଆହୁରି ରୋକିବା ପାଇଁ ‘ସବୁଠାରୁ ଅଭୂତପୂର୍ବ ଏବଂ ଅସାଧାରଣ’ ଚୁକ୍ତି ବୋଲି ବର୍ଣ୍ଣନା କରିଛନ୍ତି। ସାଲଭାଡୋର ରାଷ୍ଟ୍ରପତି ନାୟିବ ବୁକେଲ ରାଜଧାନୀ ସାନ ସାଲଭାଡୋରର ଲେକ କୋଟେପେକରେ ଥିବା ତାଙ୍କ ବାସଭବନରେ ରୁବିଓଙ୍କ ସହ ପ୍ରାୟ ତିନି ଘଣ୍ଟା ଧରି ଆଲୋଚନା କରିଥିଲେ। ବୈଠକ ପରେ, ରୁବିଓ ସୋମବାର ଘୋଷଣା କରିଥିଲେ ଯେ ଏଲ ସାଲଭାଡୋରର ରାଷ୍ଟ୍ରପତି ଆମେରିକାର ଯେକୌଣସି ଜାତୀୟତାର ଅବୈଧ ପ୍ରବାସୀଙ୍କୁ ତାଙ୍କ ଦେଶକୁ ନେବାକୁ ରାଜି ହୋଇଛନ୍ତି, ଯେଉଁଥିରେ ଆମେରିକାର ଜେଲରେ ବନ୍ଦୀ ଥିବା ହିଂସାତ୍ମକ ଅପରାଧୀ ମଧ୍ୟ ସାମିଲ ଅଛନ୍ତି।
ରାଷ୍ଟ୍ରପତି ବୁକେଲ ବିଶ୍ୱର ସବୁଠାରୁ ଅଭୂତପୂର୍ବ ଏବଂ ଅସାଧାରଣ ପ୍ରବାସ ଚୁକ୍ତିନାମା ପ୍ରଦାନ କରିଛନ୍ତି, ଏଲ ସାଲଭାଡୋରର ବୈଦେଶିକ ମନ୍ତ୍ରୀଙ୍କ ସହ ଏକ ବେସାମରିକ ପରମାଣୁ ଚୁକ୍ତିନାମା ସ୍ବାକ୍ଷର କରିବା ପରେ ରୁବିଓ ଏହା କହିଛନ୍ତି। ସେ ଏହା ମଧ୍ୟ କହିଥିଲେ ଯେ ସେ ଆମେରିକାର ସବୁଠାରୁ ବିପଦଜନକ ଅପରାଧୀଙ୍କୁ ମଧ୍ୟ ତାଙ୍କ ଜେଲକୁ ନେବାକୁ ପ୍ରସ୍ତୁତ, ସେମାନେ ଆମେରିକୀୟ ନାଗରିକ ହୁଅନ୍ତୁ କିମ୍ବା ଆଇନଗତ ବାସିନ୍ଦା ହୁଅନ୍ତୁ। ଟାଇମର ରିପୋର୍ଟ ଅନୁଯାୟୀ, ଜଣେ ଆମେରିକୀୟ ଅଧିକାରୀ ସ୍ପଷ୍ଟ କରିଛନ୍ତି ଯେ ଟ୍ରମ୍ପ ପ୍ରଶାସନର ଆମେରିକୀୟ ନାଗରିକଙ୍କୁ ଦେଶାନ୍ତର କରିବାର କୌଣସି ଯୋଜନା ନାହିଁ। କିନ୍ତୁ ରାଷ୍ଟ୍ରପତି ବୁକେଲଙ୍କ ପ୍ରସ୍ତାବ ଗୁରୁତ୍ୱପୂର୍ଣ୍ଣ। ଆମେରିକା ସରକାର ନିଜ ନାଗରିକଙ୍କୁ ଦେଶରୁ ବାହାର କରିପାରିବେ ନାହିଁ। ଏପରି ପଦକ୍ଷେପ ଆମେରିକା ପାଇଁ ଏକ ଆଇନଗତ ଚ୍ୟାଲେଞ୍ଜ ସୃଷ୍ଟି କରିପାରେ।
ପ୍ରବାସୀଙ୍କ ଉପରେ ଏକ ବଡ଼ କାର୍ଯ୍ୟାନୁଷ୍ଠାନ ଦାବି କରିବା ପାଇଁ ରୁବିଓ ଏଲ ସାଲଭାଡୋରରେ ପହଞ୍ଚିଥିଲେ। ଏଲ ସାଲଭାଡୋରର ଜେଲ ବିଶ୍ୱର ସବୁଠାରୁ ବିପଦପୂର୍ଣ୍ଣ ଜେଲ ମଧ୍ୟରୁ ଗୋଟିଏ। ରାଷ୍ଟ୍ରପତି ବୁକେଲେ ଏକ୍ସରେ ଏକ ପୋଷ୍ଟରେ ଲେଖିଛନ୍ତି, ‘ଆମେ ଆମର ଜେଲ ବ୍ୟବସ୍ଥାର ଏକ ଅଂଶକୁ ଆଉଟସୋର୍ସ କରିବା ପାଇଁ ଆମେରିକାକୁ ପ୍ରସ୍ତାବ ଦେଇଛୁ। ଆମେ ଅଳ୍ପ କିଛି ଫି ବିନିମୟରେ କେବଳ ଦୋଷୀ ସାବ୍ୟସ୍ତ ଅପରାଧୀଙ୍କୁ ଆମର ମେଗା ଜେଲକୁ ନେବାକୁ ପ୍ରସ୍ତୁତ। ଏହି ଦେୟ ଆମେରିକା ପାଇଁ ବହୁତ କମ ହେବ, କିନ୍ତୁ ଆମ ପାଇଁ ଗୁରୁତ୍ୱପୂର୍ଣ୍ଣ। ଏହା ଆମର ସମ୍ପୂର୍ଣ୍ଣ ଜେଲ ବ୍ୟବସ୍ଥାକୁ ସ୍ଥାୟୀ କରିବ।’ ସେ କଏଦୀମାନେ ବସିଥିବା ଏବଂ ରକ୍ଷୀମାନଙ୍କୁ ନିୟୋଜିତ କରାଯାଇଥିବା ଫଟୋ ମଧ୍ୟ ସେୟାର କରିଛନ୍ତି।
