କୁହାଯାଏ ବଞ୍ଚିଥିବା ମଣିଷର ମୁଖ୍ୟ ଅଙ୍ଗ ହେଉଛି ହାର୍ଟ ବା ହୃଦୟ । ଏହା ଯଦି କିଛି ସେକେଣ୍ଡ ପାଇଁ ବନ୍ଦ ହୋଇଯାଏ ତେବେ ମଣିଷର ମୃତ୍ୟୁ ଘଟିଥାଏ ବୋଲି କୁହାଯାଏ । ହେଲେ ବ୍ରିଟେନରେ ଏମିତି ଜଣେ ମହିଳା ଅଛନ୍ତି ଯିଏ ନିଜ ହାର୍ଟକୁ ବ୍ୟାଗରେ ରଖି ବଞ୍ଚିଛନ୍ତି । ସଲୱା ହୁସେନ ନାମକ ଏହି ମହିଳାଙ୍କ ଜୀବନ ଆଶ୍ଚର୍ଯ୍ୟଠାରୁ କିଛି କମ୍ ନୁହେଁ । ଏକ ବ୍ରିଟିଶ ଖବର କାଗଜର ରିପୋର୍ଟ ଅନୁଯାୟୀ, ୩୯ ବର୍ଷୀୟା ସଲୱା ଏକମାତ୍ର ବ୍ୟକ୍ତି ଯିଏ ନିଜ ହାର୍ଟକୁ ବ୍ୟାଗରେ ରଖି ଜୀବନ ବିତାଉଛନ୍ତି । ଅବଶ୍ୟ ସେ ବିବାହିତା ଓ ତାଙ୍କର ଦୁଇଟି ସନ୍ତାନ ଅଛନ୍ତି । ତେବେ ତାଙ୍କ ହୃଦୟଟି ଯେଉଁ ବ୍ୟାଗରେ ରହିଛି ସେ ତାକୁ ସୁବବେଳେ ପାଖରେ ରଖିଥାଆନ୍ତି । ତାଙ୍କ ଛାତିରେ ଏକ ପାୱାର ପ୍ଲାଷ୍ଟିକ ଚାମ୍ବର ଲାଗିଛି । ଏଥିରୁ ୨ଟି ପାଇପ ବାହାରକୁ ବାହାରିଛି । ଏହି ପମ୍ପ ବ୍ୟାଟେରି ମାଧ୍ୟମରେ ଚାଲୁଥିବା ବିଜୁଳି ମୋଟରରେ ଚାଲିବା ସହ ପ୍ଲାଷ୍ଟିମ ଚାମ୍ବରକୁ ବାୟୁ ଯୋଗାଉଛି । ଏହି ବାୟୁ ଦ୍ୱାରା ଚାମ୍ବର ହାର୍ଟଭଳି କାମ କରୁଛି ଓ ସମ୍ପୂର୍ଣ୍ଣ ଶରୀରକୁ ରକ୍ତ ଯୋଗାଉଛି । ଏଥିରେ ଚାମ୍ବର ସଲୱାଙ୍କ ଛାତି ଭିତରେ ଥିବା ବେଳେ ପମ୍ପ, ମୋଟର ଓ ବ୍ୟାଟେରି ବାହାରେ ରହିଛି । ଏହି ୩ଟି ଜିନିଷକୁ ସବୁବେଳେ ସାଙ୍ଗରେ ଧରି ସଲୱା ଚାଲିଥାଆନ୍ତି । ତେବେ ତାଙ୍କ ସ୍ୱାମୀଙ୍କୁ ସବୁବେଳେ ଭୟ ଥାଏ ଯେ କେତେବେଳେ ଯଦି ବ୍ୟାଟେରି କାମ କରିବା ବନ୍ଦ କରିଦେବ ତେବେ ସଲୱାଙ୍କର ମୃତ୍ୟୁ ହେବ । କାରଣ ନୂଆ ବ୍ୟାଟେରି ଲଗାଇବାକୁ ତାଙ୍କ ପାଖରେ ମାତ୍ର ୯୦ ସେକେଣ୍ଡ ସମୟ ରହିଛି । ତେବେ ଏତେ ବଡ ସମସ୍ୟା ପରେ ବି ସଲୱା ଖୁସିରେ ଜୀବନ କାଟୁଛନ୍ତି ।
