ଦଶମନ୍ତପୁର,୧୭ା୮ ( ଅରବିନ୍ଦ ନାୟକ )କୌଣସି ମୌଳିକ ସୁବିଧା ସୁଯୋଗ ପାଉ ନ ଥିବା ଲୋରେଶ ଗ୍ରାମବାସୀ ସୋମବାର ବିଡିଓ ଡମ୍ବରୁଧର ମଲ୍ଲିକଙ୍କୁ ଭେଟି ଦାବିପତ୍ର ଦେଇଛନ୍ତି। ସରକାରଙ୍କ କାର୍ଯ୍ୟକାରୀ ବିଭିନ୍ନ ଯୋଜନାରୁ ସେମାନେ ସୁଫଳ ପାଉ ନ ଥିବା ଅଭିଯୋଗ କରିଛନ୍ତି। ଏପରିକି ଗ୍ରାମକୁ ରାସ୍ତା ନ ଥିବାରୁ ପକ୍କାଘର ଅବା ଆବାସ ଯୋଜନାରେ ସେମାନଙ୍କୁ ମିଳୁଥିବା ଘର ନିର୍ମାଣ କରିବା ସେମାନଙ୍କ ପାଇଁ କଷ୍ଟକର ହୋଇପଡୁଛି। ଫଳରେ ସେମାନେ ବାଧ୍ୟହୋଇ ଏହାକୁ ଅନ୍ୟ ଗ୍ରାମର ଲୋକଙ୍କୁ ବିକ୍ରିକରି ଦେଉଥିବା ପ୍ରକାଶ କରିଛନ୍ତି ଲୋରେଶବାସୀ। କୋରାପୁଟ ଜିଲା ଦଶମନ୍ତପୁର ବ୍ଲକ ପିଣ୍ଡାପଦର ପଞ୍ଚାୟତର ଲୋରେଶ ଗ୍ରାମ କ୍ଷେତ୍ରରେ ଏପରି ଦେଖିବାକୁ ମିଳିଛି।
ଏହି ଗ୍ରାମରେ ୩୦ ଘର ଆଦିବାସୀ ସମ୍ପ୍ରଦାୟର ଲୋକେ ବସବାସ କରିଥାନ୍ତି। ଗ୍ରାମବାସୀ ଏଯାଏ ସରକାରଙ୍କ କୌଣସି ଯୋଜନାରୁ କିଛି ସୁଫଳ ପାଇ ନ ଥିବା ଅଭିଯୋଗ କରିଛନ୍ତି। ଗ୍ରାମଟି ଦଶମନ୍ତପୁର ବ୍ଲକଠାରୁ ୯ କି.ମି. ଦୂରରେ ଥିବା ବେଳେ ମରିଚଗୁଡ଼ା ଗ୍ରାମଠାରୁ ୫ କି.ମି. ଦୂରରେ ରହିଛି। ମରିଚଗୁଡ଼ା ଗ୍ରାମ ନିକଟରେ ପ୍ରବାହିତ ଅନ୍ଧରୀଗାଡ଼ ନଦୀ ଏବଂ ଖଣ୍ଡାଧାର ପାହାଡ଼ ସେମାନଙ୍କ ଉନ୍ନତିରେ ପ୍ରତିବନ୍ଧକ ସାଜିଥିବା ଗ୍ରାମବାସୀ ପ୍ରକାଶ କରିଛନ୍ତି। କେବଳ ସ୍ବାସ୍ଥ୍ୟସେବା ବ୍ୟତୀତ ପକ୍କାରାସ୍ତା, ଶିକ୍ଷା, ପାନୀୟ ଜଳ, ଖାଉଟି ଯୋଜନା, ବିଦ୍ୟୁତୀକରଣରୁ ଏଯାଏ ବଞ୍ଚତ୍ତ ହୋଇ ରହିଛନ୍ତି ବୋଲି ଗ୍ରାମର ରାଜୀବ ଜମ୍ବେକା, ଧନୁର୍ଜୟ କମାର, ଭୀମ ପାଇକ, ଇଶୁଦାସ ସାଉଁନ୍ତା, ପ୍ରତାପ ସାଉଁନ୍ତା, ରଞ୍ଜ ମିଣିଆକା, ଜୁନେଶ ସାଉଁନ୍ତା କହିଛନ୍ତି। ଗ୍ରାମ ରାସ୍ତା ମରଣଯନ୍ତା ପାଲଟିଥିବାରୁ ସାଇକେଲରେ ଯିବା ମଧ୍ୟ କଷ୍ଟକର ହୋଇପଡିଛ। ଗ୍ରାମରେ ବିଦ୍ୟାଳୟଟିଏ ନାହିଁ। ଗ୍ରାମର ପାଠ ପଢୁଥିବା ୧୬ ଛାତ୍ରୀଛାତ୍ର ଜୀବନକୁ ବାଜି ଲଗାଇ ଖଣ୍ଡାଧାର ପାହାଡ଼ ଡେଇଁ ମରିଚଗୁଡ଼ା ବିଦ୍ୟାଳୟକୁ ଯାଉଥିବା ସେମାନେ କହିଛନ୍ତି। ରାସ୍ତା ନ ଥିବାରୁ ପକ୍କା ଘର ଅବା ଅବାସ ଯୋଜନାରେ ମିଳୁଥିବା ଘର ନିର୍ମାଣ କରିବା ସେମାନଙ୍କ ପାଇଁ କଷ୍ଟକର ହୋଇପଡୁଛି। ଫଳରେ ସେମାନେ ବାଧ୍ୟ ହୋଇ ଏହାକୁ ଅନ୍ୟ ଗ୍ରାମର ଲୋକଙ୍କୁ ବିକ୍ରିକରି ଦେଉଥିବା ଗ୍ରାମର ଉଦ୍ଧବ ସାଉଁନ୍ତା, ଚନ୍ଦ୍ର ପାଇକ, କାଳିଆ ଜାନୀ, ଲୋଚ ସାଉଁନ୍ତା, କୁମ କମାର କହିିଛନ୍ତି। ଏ ସମ୍ପର୍କରେ ବିଡିଓ ମଲ୍ଲିକଙ୍କୁ ପଚାରିବାରୁ ସେ କହିଲେ, ଗ୍ରାମ ପାଇଁ ମୁଖ୍ୟତଃ ରାସ୍ତା ସମସ୍ୟା ଯୋଗୁ ଯୋଜନାର ସୁଫଳ ଳୋକଙ୍କ ନିକଟରେ ପହଞ୍ଚତ୍ପାରୁନାହିଁ। ଏ ଦିଗରେ କ’ଣ କରାଯାଇପାରିବ ସେ ପଦକ୍ଷେପନେଇ ବ୍ୟବସ୍ଥା କରିବେ ବୋଲି କହିଛନ୍ତି।
