ଭୁବନେଶ୍ୱର,(ବ୍ୟୁରୋ)/ବାଲେଶ୍ୱର ଅଫିସ୍, ୯।୯:ନିଶା କାରବାରର ପେଣ୍ଠସ୍ଥଳ ପାଲଟିଥିବା ବାଲେଶ୍ୱରରୁ ପୁଣି କୋଟିଏରୁ ଅଧିକ ଟଙ୍କା ମୂଲ୍ୟର ବ୍ରାଉନସୁଗାର ଜବତ ହୋଇଛି। କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ(ଏସ୍ଟିଏଫ୍) ସହଦେବଖୁଣ୍ଟା ଆଦର୍ଶ ଥାନା ପୋଲିସ ସହାୟତାରେ ସ୍ଥାନୀୟ ଅରଡ଼ବଜାର ଅଞ୍ଚଳରେ ଚଢ଼ାଉ କରି ଜଣେ ଆନ୍ତଃରାଜ୍ୟ ନିଶା ବେପାରୀଙ୍କୁ ଗିରଫ କରିଛି। ସେ ହେଲେ ପଶ୍ଚିମବଙ୍ଗ ରଞ୍ଚ ପଞ୍ଚକୁଲାରର ସେକ୍ ରଫିକ୍ ଓରଫ ରୁଗା। ତାଙ୍କଠାରୁ ୧ କେଜି ୩୮୦ ଗ୍ରାମ୍ ଓଜନର ବ୍ରାଉନସୁଗାର ଜବତ କରାଯାଇଛି। ଏହାର ଆନୁମାନିକ ମୂଲ୍ୟ ୧ କୋଟି ୩୦ ଲକ୍ଷ ଟଙ୍କାରୁ ଊର୍ଦ୍ଧ୍ୱ ହେବ। ତାଙ୍କ ନାମରେ ପୂର୍ବରୁ ୩ଟି ନିଶା କାରବାର ସମ୍ପର୍କିତ ଆପରାଧିକ ମାମଲା ରହିଥିବା ଏସ୍ଟିଏଫ୍ ଏସ୍ପି କିଶୋର କୁମାର ପାଣିଗ୍ରାହୀ କହିଛନ୍ତି। ତେବେ ବେଆଇନ ବ୍ରାଉନସୁଗାର ଚୋରା ଚାଲାଣ ମାମଲାରେ ସେ ଗିରଫ ହୋଇ ଜେଲ୍ ଯାଇଥିଲେ। ଜାମିନରେ ଆସିବା ପରେ ପୁଣି ଏହି କାରବାର ଚଳାଇଥିଲେ। ସେ ମୁର୍ଶିଦାବାଦରୁ ବ୍ରାଉନସୁଗାର ଆଣି ବାଲେଶ୍ୱରର ବିଭିନ୍ନ ଅଞ୍ଚଳରେ ବେପାର କରୁଥିବା ଜଣାପଡିଛି। ଏନେଇ ଏସ୍ଟିଏଫ୍ ମାମଲା (ନଂ.୧୮/୨୨) ରୁଜୁ କରି ଅଭିଯୁକ୍ତ ରଫିକ୍ଙ୍କୁ କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଛି। ତେବେ ତାଙ୍କର ଏହି ନିଶାବେପାରରେ ଆଉ କେଉଁମାନେ ସଂପୃକ୍ତ ଅଛନ୍ତି ସେ ନେଇ ତଦନ୍ତ ଚାଲିଥିବା ଏସ୍ଟିଏଫ ଏସ୍ପି କହିଛନ୍ତି। ସୂଚନାଯୋଗ୍ୟ, ୨୦୨୦ରୁ ଏଯାବତ୍ ଏସଟିଏଫ୍ ୫୭ କେ.ଜି.ରୁ ଅଧିକ ବ୍ରାଉନସୁଗାର, ୨୦୨ଗ୍ରାମ କୋକେନ ଓ ୧୧୧ କୁଇଣ୍ଟାଲ ଗଞ୍ଜେଇ ଏବଂ ୭୫୦ ଗ୍ରାମ ଅଫିମ ଜବତ କରିଛି। ଏଥିସହ ନିଶା କାରବାର ମାମଲାରେ ସଂପୃକ୍ତ ଥିବା ୧୫୮ରୁ ଅଧିକ ନିଶା ବେପାରୀଙ୍କୁ ଗିରଫ କରାଯାଇଛି।
